مۇددەلىلىك مىندەتتەرى

كەشە مەملەكەت باسشىسى نۇرسۇلتان نازارباەۆ پرەمەر-مينيستر ك.ءماسىموۆتىڭ, پرەزيدەنت اكىمشىلىگىنىڭ باسشىسى ا.ءمۋسيننىڭ, قاۋىپ­سىز­دىك كەڭەسىنىڭ حاتشىسى م.ءتاجيننىڭ قاتىسۋىمەن جۇمىس كەڭەسىن ءوت­كىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. كەڭەستە پرەمەر-مينيستر ك.ءماسىموۆتىڭ ەلىمىزدىڭ الەۋمەتتىك-ەكونوميكالىق دامۋىنىڭ اعىم­داع­ى ناتيجەلەرى, سونداي-اق يندۋستريا­لىق-يننوۆاتسيالىق دامۋ ستراتە­گيا­سىن ىسكە اسىرۋ تۋرالى ەسەبى تىڭ­دالدى. وسى كەزەڭدە ءىجو ءوسىمى 8,3 %-دى قۇرادى. كەزدەسۋ بارىسىندا قاۋىپسىزدىك كەڭەسىنىڭ حاتشىسى م.ءتاجين ەلى­مىزدىڭ پرەزيدەنتىن ماسكەۋدە 14 ماۋ­سىمدا بولىپ وتكەن ۇجىمدىق قاۋىپسىزدىك تۋرالى شارت ۇيىمىنا (ۇقشۇ) قاتىسۋشى ەلدەردىڭ قاۋىپسىزدىك كەڭەسى حاتشىلارىنىڭ قىرعىزستانداعى احۋالدى رەتتەۋ تۋرالى توتەنشە كونسۋلتاتسيالارى جايىنان حاباردار ەتتى. بۇگىندە ۇقشۇ قىرعىز­ستان­داعى جاعدايدى تۇراقتاندىرۋدا جانە رەتتەۋدە ماڭىزدى ءرول اتقارۋ­عا قابىلەتتى بارىنشا ىقپالدى ۇيىم بولىپ تابىلادى. كەزدەسۋدىڭ قورىتىندىسى بوي­ىنشا نۇرسۇلتان نازارباەۆ ءبىر­قاتار ناقتى تاپسىرمالار بەردى. كەڭەس اياقتالعاننان كەيىن قا­زاق­ستان پرەزيدەنتى قىسقاشا ءما­لىمدەمە جاسادى: – ءبىز العاشقى جارتى­جىل­دىق­تىڭ الدىن الا قورىتىندىلارىن تال­قىلادىق. ءبىز قارجى جۇيەسىن تۇ­راقتاندىرىپ, قارىزداردى قايتا قۇ­رىلىمداعانىمىزدى قاناعاتتا­نار­لىقپەن اتاپ وتەمىن. ينۆەستي­تسيا­لار بويىنشا دا, سول سەكىلدى بانك­تىك جۇيە بويىنشا دا قازىر قازاق­ستانعا قىزىعۋشىلىق ارتا تۇسۋدە. يندۋستريالىق-يننوۆاتسيالىق دامۋ باعدارلاماسى بويىنشا بيىل­عى جىلى 144 نىسان, سونىڭ ىشىندە ءبىرىنشى جارتىجىلدىقتا 72 نىسان پايدالانۋعا بەرىلەدى. ولاردىڭ بار­لىعى ەكىنشى جارتىجىلدىقتا ىسكە قوسىلىپ, جۇمىس ىستەي باستايدى. قازىرگى كەزدە ەكونوميكانىڭ ءوڭ­دەۋ سالاسىنىڭ كولەمى ارتىپ كەلە جاتقانى قۋانتادى. بيۋدجەتتىڭ كىرىس بولىگى تولىعا تۇسۋدە. ينفليا­تسيا بەلگىلەنگەن شەگىندە. جۇمىس­سىزدىق دەڭگەيى ءوسىپ وتىرعان جوق, تومەندەپ كەلەدى. بۇل ەكونوميكانىڭ وسۋىمەن ادامداردىڭ ءال-اۋقاتى جاقسارا تۇسەتىنىن بىلدىرەدى. ءبىز تالقىلاعان ەكىنشى ماسەلە, بۇل – قىرعىزستانداعى احۋال. ول ءبىزدىڭ جاقىن كورشىمىز. قازاقستان بۇل مەملەكەتتە جاعدايدى تۇراق­تاندىرۋعا ابدەن مۇددەلى. سوراقىلىقپەن قان توگىلۋگە جول بەرىلدى. ءبىز وندا قازا بولعان بار­لىق ادامداردىڭ تۋىستارىنا كوڭىل ايتامىز. قازاقستان بارلىق مۇمكىن بولا­تىن كومەكتى كورسەتەدى. ءبىز ءوز ءىس-ارە­كەتىمىزدى, اسىرەسە كورشىلەس ەل­دەر­مەن – رەسەيمەن جانە وزبەك­ستان­مەن تىعىز ۇيلەستىرىپ وتىرامىز. ءبىزدىڭ ەلدەرىمىزدىڭ قاۋىپسىزدىك كەڭەسىنىڭ حاتشىلارى ءبىز قابىل­دايتىن ناقتى شارالاردى انىقتاۋ ءۇشىن قىرعىزستانداعى احۋالعا سا­راپ­تاما جۇرگىزۋىنە ۋاعدالاستىق. بۇل جۇمىستى قىرعىزستاننىڭ ۋا­قىت­شا ۇكىمەتىمەن بىرلەسىپ جۇرگىزەمىز. مەن حالىقارالىق ۇيىمدار, وزگە ەلدەر تاراپىنان قىرعىز­ستان­عا گۋمانيتارلىق كومەك كورسەتۋ ءما­سە­لەسى تۋرالى باستاما كوتەرەمىن. دە­گەنمەن, كومەك كورسەتكەندەر ونىڭ مەجەلى مەكەن-جايعا دەيىن باراتىنىنا سەنىمدى بولۋلارى ءتيىس. بۇل رەتتە بىزگە ءوزىمىزدىڭ ءىس-ارەكەت­تەرىمىزدى ۇيلەستىرىپ وتىرۋ دا كەرەك. بۇگىندە ەقىۇ وكىلى ج.كارىب­جانوۆ سوندا جۇمىس ىستەۋدە. سون­داي-اق بۇۇ-نىڭ, قىزىل كرەستىڭ جانە باسقا ۇيىمداردىڭ وكىلدەرى جۇمىس ىستەپ جاتىر. بارلىعى دا وسى ەلدەگى جاعدايعا الاڭداۋلى. قىر­عىزستاننىڭ ۋاقىتشا ۇكىمەتى مەن قىرعىزداردىڭ وزدەرى ەل ءىشىن­دەگى جاعدايدى تۇراقتاندىراتىنىنا ءۇمىت ارتامىز. مەن قاقتىعىستارعا جول بەرۋشى بارلىق تاراپتى قارۋدى جيىپ قويىپ, كەلىسسوز ۇستەلىنە وتىرىپ, بارلىق قالعان ماسەلەنى بىرلەسىپ شەشۋگە شاقىرامىن.