فوتو: akorda.kz
باسقوسۋدا كولەڭكەلى ەكونوميكاعا قارسى ءىس-قيمىل جونىندەگى ءىس-شارالاردىڭ 2023-2025 جىلدارعا ارنالعان كەشەندى جوسپارىن جۇزەگە اسىرۋ بارىسى قارالدى.
وتىرىستا مەملەكەت باسشىسىنىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋ الدىنداعى باعدارلاماسىندا كولەڭكەلى ەكونوميكا دەڭگەيىن تومەندەتۋ مىندەتى قويىلعانى ايتىلدى.
بۇل باعدارلامانى ىسكە اسىرۋ جانە باقىلانبايتىن ەكونوميكاعا قارسى ءىس-قيمىل اياسىندا جۇمىستى جۇيەلى تۇردە جالعاستىرۋدى قامتاماسىز ەتۋ ءۇشىن ۇكىمەتتىڭ بىلتىر 2023-2025 جىلدارعا ارنالعان جاڭا كەشەندى جوسپاردى بەكىتكەنى اتاپ ءوتىلدى.
ناقتى ايتقاندا, قۇجات مۇناي جانە مۇناي ونىمدەرىنىڭ, ءدارى-دارمەكتىڭ, تسيفرلىق اكتيۆتەردىڭ اينالىمى سياقتى باعىتتارعا قاتىستى ءىس-شارالارمەن تولىقتىرىلدى.
وسى ماسەلە بويىنشا قارجى مونيتورينگى اگەنتتىگى, قارجى, ۇلتتىق ەكونوميكا, ساۋدا جانە ينتەگراتسيا مينيسترلىكتەرى, «سامۇرىق-قازىنا» اق باسشىلارىنىڭ باياندامالارى تىڭدالدى.
مەملەكەتتىك كەڭەسشى كەشەندى جوسپاردا قاراستىرىلعان ءىس-شارالاردى ساپالى ورىنداۋدىڭ, نەگىزگى كورسەتكىشتەرگە قول جەتكىزۋدىڭ, تاجىريبەنى ەسكەرىپ, كولەڭكەلى قىزمەتكە بەيىم باسقا سالالاردى انىقتاۋدىڭ جانە قابىلدانىپ جاتقان شارالاردى جاڭارتىپ وتىرۋدىڭ ماڭىزدىلىعىن ەرەكشە اتاپ ءوتتى.
مەملەكەتتىك ورگاندار مەن مەكەمەلەرگە جوسپارداعى ءتيىستى شارالاردى تولىق ورىنداۋ تۋرالى تاپسىرما بەرىلدى.
جيىن بارىسىنداعى تالقىلاۋدى ەسكەرە وتىرىپ, كوميسسيا ناقتى ۇسىنىمدار ازىرلەدى. وتىرىستى قورىتىندىلاي كەلە, مەملەكەتتىك كەڭەسشى بىرقاتار تاپسىرما بەردى جانە ونىڭ ورىندالۋى باقىلاۋعا الىندى.
