اكتسيا باستالعان 9 ءساۋىر كۇنى وبلىس اكىمى نۇرلىبەك نالىباەۆ ۇندەۋ جاريالاپ, وندا ءار ءۇيدىڭ تازالىعى تۇتاس قالا مەن اۋىلدىڭ تازالىعى ەكەنىن ايتقان ەدى. «تازا ولكە» اتاۋىمەن باستالعان اكتسياعا العاشقى قاتاردا ءۇن قوسقان سىرداريا اۋدانىنداعى ناعي ءىلياسوۆ اۋىلى بولدى. وبلىستاعى «ۇلگىلى اۋىل» بايقاۋىنىڭ جەڭىمپازى اتانعان ەلدى مەكەن تۇرعىندارىنىڭ سانى 2 مىڭنان اسادى. سولاردىڭ 150-گە جۋىعى «تازا ولكە» اپتالىعىن باستاپ, اۋىلداعى اللەيالار جانە ارىقتاردى تازارتتى.
جالپى, جىل باسىنان بەرى اۋداندا 6 مىڭعا جۋىق اعاش وتىرعىزىلىپ, تازالىق جۇمىستارى جۇيەلى ۇيىمداستىرىلىپ كەلەدى. تازالىققا ارنالعان «كيەلى مەكەن», «جاسىل ايماق», «ونەگەلى ۇرپاق», ء«مولدىر بۇلاق» اپتالىقتارىندا دا وبلىس حالقى ۇيىمشىلدىق تانىتىپ, ورتاق ىسكە ۇلكەن ۇلەس قوستى.
بىلتىردان باستاپ وبلىستا «ۇلگىلى ەلدى مەكەن» كونكۋرسى تۇراقتى وتكىزىلىپ كەلەدى. ونداعى ءار اتالىم بويىنشا جەڭىمپازدارعا وسى ۋاقىتقا دەيىن 29 ارناۋلى تەحنيكا تابىستالىپتى. بۇل ءوڭىر جۇرتىنىڭ قورشاعان ورتا تازالىعىن ساقتاپ, اينالاسىن اباتتاندىرۋعا ايرىقشا ءمان بەرەتىنىن بايقاتسا كەرەك.
اكتسيا اياسىنداعى ءار اپتا تىندىرىمدى ىستەرمەن تۇيىندەلىپ تۇردى. «جاسىل ايماق» اپتالىعىندا اۋەجايدان وبلىس ورتالىعىنا جەتكىزەر كۇرە جول بويىنداعى «رامىزدەر الاڭىندا» تال ەگىلدى. وبلىس اكىمى ن.نالىباەۆ پەن وڭىردە ساپاردا جۇرگەن سەناتورلار قاتىسقان سەنبىلىكتە بوي كوتەرگەنىنە كوپ بولماعان الاڭ اۋماعى كوشەتتەرمەن كومكەرىلدى. وسى كۇنى جاڭادان شاڭىراق كوتەرگەن 10 وتباسى بىلتىر عانا ەل يگىلىگىنە بەرىلگەن وتباسى ورتالىعى الاڭىنا اعاش كوشەتتەرىن وتىرعىزدى. جاڭا ءومىر باستاعان جاستاردىڭ بۇل باستاماسىن جۇرتشىلىق جىلى قابىلدادى. شيەلى اۋدانىنداعى «رۋ-6» مەن «Semizbai-U» سەرىكتەستىكتەرىنىڭ قىزمەتكەرلەرى مەكەمە اۋماعىن اباتتاندىرىپ, 500 ءتۇپ اعاش ەكتى. بارلىق اۋدان مەن اۋىلدا جالعاسقان «جاسىل ايماق» اپتالىعى ناتيجەسىندە وڭىردە 7 مىڭنان اسا تال وتىرعىزىلعانى بەلگىلى بولدى.
جالپى, قىسى قاتال, جازى اپتاپ سىردا تال-داراق ەگۋگە ەرەكشە قارايدى. بيىل وبلىس ورتالىعىنان 2 گەكتارلىق جەر ارشىلىپ, 3 تۇقىمباق ازىرلەنىپ جاتىر. قىزىلوردا–استانا باعىتىندا سالىنىپ جاتقان باستى جولدىڭ قوس قاپتالىنا دا جاسىل بەلدەۋ قالىپتاستىرىلادى.
تۇتاس ەلدى قامتىعان اكتسيا قورىتىندىسىنداعى ء«مولدىر بۇلاق» اپتالىعى دا سىردا ەرەكشە ءوتتى. وعان مەملەكەتتىك مەكەمەلەر, جەكە ۇيىم وكىلدەرى, جاستار مەن ۆولونتەرلەر, تۇرعىندار قاتىسىپ, بارلىعى 245 تەحنيكا جۇمىلدىرىلدى. ونىڭ اياسىندا سىرداريا وزەنىنىڭ جاعالاۋى, «اققۇمشىق» جاعاجايى, «كارىبوگەت» كوپىرى, «لايكول», «قامباش», «جالاڭاش», «شومىشكول», «رايىم», «تۇششى», «يىركول», «قاراوزەك», «الىمكول», «جامانكول» كولدەرى مەن «قالعانداريا», «ەلتاي», «شىركەيلى» ارنالارىنىڭ جاعالاۋى قوقىستان, تۇرمىستىق قالدىقتان تازارتىلدى. سۋ ايدىندارى مەن اياقسۋ ارىقتارىنان 40 توننادان اسا قوقىس پوليگوندارعا جەتكىزىلدى.
وبلىستا كۇن جىلىپ, جەر جىبىگەننەن-اق ەكى ايلىق سانيتارلىق تازالىق, كوركەيتۋ-كوگالداندىرۋ شاراسى باستالعان ەدى. ناۋرىزدان مامىر ايىنا دەيىن سوزىلاتىن ەكى ايلىق اياسىندا دا 35 مىڭ ءتۇپ سايالى اعاش ەگىلدى. ولارعا وبلىس ورتالىعىندا جاڭادان قۇرىلعان «جاسىل-قىزىلوردا» مەكەمەسى كۇتىم جاسايدى.
قىزىلوردا
