ارال تەڭىزىنىڭ تابانىنان قازىلاتىن تۇزدىڭ ءدامى كوپ مەملەكەتتىڭ اس مازىرىندە ءجۇر. ال قىزىلوردا قالاسىندا ورنالاسقان «التىن وردا» جشس – يودتالعان اس تۇزىن وندىرۋدە كوشباسشى كومپانيالاردىڭ ءبىرى. اتالعان سەرىكتەستىك 1997 جىلدان بەرى جۇمىس ىستەيدى.
بۇعان دەيىن كوپتەگەن بيزنەس جوبانى ىسكە اسىرىپ كەلگەن سەرىكتەستىك 2016 جىلدان باستاپ بارلىق تالاپ پەن ساپا ستاندارتتارىنا سايكەس «اسسول» جانە «سافيا» برەندتەرىمەن اس تۇزىن وندىرەدى. كاسىپورىندا ەكى زاۋىت بار. العاشقىسى 2016 جىلى ىسكە قوسىلىپ, ساعاتىنا 3 توننا تۇز شىعارا باستادى. ال وسىدان ەكى جىل بۇرىن ساعاتىنا 10 توننا ءونىم شىعاراتىن زاماناۋي تسەح ورناتىلىپ, ەكىنشى زاۋىت جۇمىسىن باستادى.
«باستاپقىدا ءونىم كولەمى از بولدى. بىراق, ەڭ باستىسى, ساپاعا عانا جۇمىس ىستەدىك. بۇل ءۇردىس ءالى دە جوعالعان جوق. قانشا مىڭ توننا اس تۇزىن شىعارساق تا, الدىمەن تۇتىنۋشىلاردىڭ قاۋىپسىزدىگى مەن دەنساۋلىعىنا كەپىلدىك بەرەمىز. ياعني شيكىزات پەن وزگە ماتەريالداردى 100 پايىز قاداعالاپ وتىرامىز. سونىڭ ارقاسىندا 2021 جىلى كومپانيا پرەزيدەنتتىڭ ونىمدەر مەن قىزمەتتەر ساپاسى سالاسىنداعى «التىن ساپا» سىيلىعىنىڭ جەڭىمپازى بولدى. ال بىلتىر جىل سوڭىندا رەسپۋبليكاداعى « ۇلى دالا ەلى» بىرىڭعاي برەندىن پايدالانۋ قۇقىعىن بەرۋگە ارنالعان كونكۋرستىڭ جەڭىمپازى اتاندىق», دەيدى كاسىپورىن ديرەكتورى ناريمان ابجانوۆ.
ونىڭ ايتۋىنشا, بىلتىر مەملەكەت باسشىسى قاسىم-جومارت توقاەۆ سىر ەلىنە جۇمىس ساپارى كەزىندە زاۋىتتا بولىپ, كاسىپورىننىڭ الەۋەتىنە جوعارى باعا بەرىپتى.
كومپانيادا 150-دەن استام ادام جۇمىس ىستەيدى. سەرىكتەستىكتىڭ ماقساتى دا سول, جەرگىلىكتى تۇرعىنداردى جۇمىسپەن قامتۋعا باسىمدىق بەرگەن. ورتاشا ايلىق 170 مىڭ تەڭگە كولەمىندە. سونداي-اق كاسىپورىن وڭىردەگى كوپتەگەن قايىرىمدىلىق شاراسىندا دا بەلسەندى. سەرىكتەس كومپانيالارمەن بىرىگىپ, ولكەنىڭ وركەندەۋىنە, دامۋىنا ءوز ۇلەسىن قوسىپ كەلەدى.
«كاسىپورىن ىشكى نارىقتا, ياعني بارلىق ءوڭىردى قامتىپ وتىر. سونداي-اق ءونىم سىرت مەملەكەتتەرگە دە تاسىمالدانادى. بۇل – ءوڭىردىڭ الەۋمەتتىك-ەكونوميكالىق جاعدايىنا وڭ اسەر ەتىپ جاتىر. قازىر بىزدەگى «اسسول» جانە «سافيا» ساۋدا بەلگىسىمەن دايىندالاتىن اس تۇزى رەسەي, بەلارۋس, گرۋزيا, قىرعىزستان, موڭعوليا مەملەكەتتەرىنە جانە بالتىق ەلدەرىنە جىبەرىلەدى. ەكسپورتتالاتىن مەملەكەت قاتارىنا تاعى ءبىر ەل قوسىلدى. ول – قىتاي حالىق رەسپۋبليكاسى. مامىر ايىنىڭ باسىندا ءونىمدى ءبىرىنشى رەت سوندا جىبەردىك. ايتا كەتۋ كەرەك, قىتاي ەلى ەڭ ءبىرىنشى ءونىم ساپاسىنا, ونىڭ تابيعيلىعىنا اسا قاتتى نازار اۋدارادى. وسىنداي تالاپتاردان وتكەن ءبىزدىڭ ءونىمدى الداعى ۋاقىتتا تاعى دا كوپتەگەن ەلگە جىبەرۋ تۋرالى جوسپارىمىز بار», دەيدى كاسىپورىن باسشىسى.
كومپانيا اس تۇزىنان بولەك, تەحنيكالىق تۇز دا وندىرەدى. تاپسىرىس اياسىندا جىلىنا 60 مىڭ تونناعا دەيىن دايىندايدى. بۇل ءونىم قازاقستاننان بولەك كوبىنە-كوپ رەسەيگە جونەلتىلەدى. قىسى قاتتى, قار كوپ جاۋاتىن ەلدىڭ جول تازالاۋ جۇمىستارىنا پايدالانىلىپ, كوكتايعاقتىڭ الدىن السا كەرەك. سونداي-اق ءارتۇرلى ءوندىرىس ورنى مەن مۇناي كومپانياسىنان دا تاپسىرىس ءجيى ءتۇسىپ تۇر.
ايتا كەتەيىك, اتالعان كاسىپورىننىڭ ناعىز شيكىزاتى وڭىردەن قازىلىپ الىنادى. وبلىس اۋماعى مەن ۇلىتاۋ وبلىسى شەكاراسىنا جاقىن, قىزىلوردا قالاسىنان 180 شاقىرىم جەردەگى «ارىس» كەن ورنىنان زاۋىتقا ارنايى تەحنيكامەن تاسىلادى.
الداعى جوسپارلارىمەن بولىسكەن ناريمان ابجانوۆ ەندىگى ماقسات – ءۇشىنشى تۇز ءوندىرۋ زاۋىتىن ىسكە قوسۋ ەكەنىن ايتىپ وتىر. وسى ارقىلى اس تۇزىن ءوندىرۋ مەجەسىن جىلىنا 100 مىڭ تونناعا دەيىن جەتكىزبەك. وعان كاسىپورىننىڭ ىشكى مۇمكىندىگى دە جەتكىلىكتى ەكەن.
