فوتو: اقوردا ءباسپاسوز قىزمەتى
«بىلتىر مەنىڭ جارلىعىممەن ەلىمىزدەگى ىرگەلى مادەنيەت وردالارىنا ۇلتتىق جانە اكادەميالىق مارتەبە بەرىلدى. بۇل شەشىم ونەر ۇجىمدارىنىڭ شىعارماشىلىق ءورىسىن كەڭەيتىپ, ولاردىڭ كاسىبي تۇرعىدا شىڭدالا تۇسۋىنە جول اشاتىنى ءسوزسىز. وسى باعىتتاعى جۇمىس بيىل دا جالعاسادى. ەلىمىزدەگى ەڭ باستى ءۇش مۋزەيگە, ياعني ءۇش مۇراجايعا ۇلتتىق مارتەبە بەرىلەدى», دەدى پرەزيدەنت.
سونداي-اق مەملەكەت باسشىسى مۋزەيدىڭ قازىرگى زامان تالابىنا ساي قوعامدىق سانانى جاڭعىرتۋعا ىقپالى زور وزىق مەكەمەگە اينالۋى كەرەكتىگىن تىلگە تيەك ەتتى.
«قازىرگى زامان تالابىنا ساي مۋزەي قوعام ساناسىن جاڭعىرتۋعا زور ىقپال ەتەتىن وزىق ينستيتۋتقا اينالۋى كەرەك. سول ارقىلى جاس ۇرپاق ءتول تاريحىمىز بەن سالت-ءداستۇرىمىزدى تەرەڭ تانىپ, ودان تاعىلىم الۋى قاجەت. جالپى, ەلىمىزدە تاريحي-مادەني مۇرانى ساقتاۋ جانە مولايتۋ ماقساتىندا اۋقىمدى ءارى ۇزدىكسىز جۇمىس جۇرگىزىلىپ كەلەدى. ۇزاق جىلدان بەرى العاش رەت جاقىندا ماتەريالدىق ەمەس مادەني مۇرانىڭ ۇلتتىق تىزبەسى ايتارلىقتاي كەڭەيدى. يۋنەسكو-نىڭ ماتەريالدىق ەمەس مادەني مۇرالار تىزىمىنە ءبىزدىڭ «سالبۋرىن» جانە «بەتاشار» سياقتى ۇلتتىق داستۇرلەرىمىزدى ەنگىزۋ ماسەلەسى پىسىقتالىپ جاتىر», دەدى قاسىم-جومارت توقاەۆ.
قاسىم-جومارت توقاەۆ استاناداعى قازاق ۇلتتىق ونەر ۋنيۆەرسيتەتىنە كۇلاش بايسەيىتوۆانىڭ ەسىمىن بەرۋ تۋرالى شەشىم قابىلداعانىن ايتتى.
«بۇل – ايگىلى انشىگە كورسەتىلگەن زور قۇرمەت ءارى ەرەكشە ونەرىمەن تاريحتا قالعان تۇلعالارعا ەل ىقىلاسىنىڭ ايرىقشا بەلگىسى. تۇپتەپ كەلگەندە, مۇنى تاريحي ادىلدىكتى قالپىنا كەلتىرۋ دەپ تۇسىنگەن ءجون. اعا بۋىننىڭ ونەردەگى جولىن قازىرگى جاستارىمىز دا لايىقتى جالعاستىرىپ كەلەدى. وسى ساباقتاستىقتى ساقتاۋ وتە ماڭىزدى», دەپ قوستى پرەزيدەنت.
قىرمىزى جۇماعاليقىزى,
ەۇۋ ستۋدەنتى
