كوللاجدى جاساعان – قونىسباي شەجىمباي, «EQ»
وڭىرلىك ءبولىنىس تۇرعىسىنان جولاۋشىلار تەمىرجول كولىگى سالاسىنا تيەسىلى ينۆەستيتسيانىڭ باسىم بولىگىن – 45,3 ملرد تەڭگەنى استانا يەلەنگەن. جۇك تەمىرجول كولىگى بويىنشا دا ەلوردا الدا – 21,5 ملرد تەڭگە. ۇشتىككە الماتى مەن قىزىلوردا وبلىسى كىرەدى.
بيىلعى ءۇش ايدا تەمىرجول كولىگى 5,2 ملن جولاۋشىنى تاسىمالداعان. ءبىر جىلمەن سالىستىرعاندا كورسەتكىش 8,1 پايىزعا ارتقان. سونىمەن قاتار پويىزدار 96,9 ملن توننا جۇك تاسىعان.
«ناۋرىزدىڭ قورىتىندىسى بويىنشا پويىزبەن تاسىمالداۋ باعاسى 5 پايىزعا ءوستى. سونىڭ ىشىندە قالا ماڭىنداعى پويىزبەن ءجۇرۋ ءبىر جىلدا 8,6 پايىزعا قىمباتتادى. جىلدىق ءوسىم الماتىدا (28,3 پايىزعا), سولتۇستىك قازاقستان وبلىسىندا (15,8 پايىزعا) جانە اقمولا وبلىسىندا (15,2 پايىزعا) بايقالدى», دەپ مالىمدەيدى «Finprom» تالداۋ ورتالىعى.
ال پويىزبەن جۇك تاسىمالداۋ كولەمى – 96,9 ملن توننا. بىلتىرعىدان 3,5 پايىزعا تومەن. بۇل تۇرعىدا باسىم كورسەتكىش پاۆلودار وبلىسىنا (10,6 ملن توننا), استانا قالاسىنا (10,5 ملن توننا), اقتوبە وبلىسىنا (8,8 ملن توننا) تيەسىلى.
ال اۋە تاسىمالى سالاسىنا جىبەرىلگەن ينۆەستيتسيا كولەمى ءبىرىنشى توقساندا 14 ملرد تەڭگە بولىپتى. بىلتىر كورسەتكىش 2 ملرد تەڭگەدەن ارەڭ اسقان-دى. دەمەك بۇل باعىتتا دا اجەپتاۋىر ىلگەرىلەۋ بار دەگەن ءسوز.
ءساۋىر ايىنىڭ قورىتىندىسىندا اۋە جولاۋشىلار تاسىمالى باعاسى 3 پايىزعا وسكەن (وتكەن جىلدىڭ ءساۋىر ايىمەن سالىستىرعاندا). بيلەت قىمباتشىلىعى, اسىرەسە تۇركىستان وبلىسىندا (30,5 پايىزعا), قوستاناي وبلىسىندا (28,9 پايىزعا), شىمكەنت قالاسىندا (22,7 پايىزعا), شىعىس قازاقستان وبلىسىندا (19,1 پايىزعا), سولتۇستىك قازاقستان وبلىسىندا (15,7 پايىزعا) سەزىلگەن. پاۆلودار وبلىسىندا از عانا قىمباتتاسا (0,5 پايىزعا), اقتوبە, قاراعاندى, جامبىل, ماڭعىستاۋ, جەتىسۋ جانە اباي وبلىستارىندا كەرىسىنشە باعا تومەندەگەن.
«بيىل ادەپكىدە ءۇش ايدا اۋە كولىگى قىزمەتى سالاسىنداعى نەگىزگى كاپيتالعا سالىنعان ينۆەستيتسيا 13,9 ملرد تەڭگەنى قۇرادى. ءبىر جىل بۇرىنعى كورسەتكىشتەن 6 ەسە كوپ. كاپيتالدىق سالىمنىڭ بارلىق كولەمى كومپانيالاردىڭ جەكە قاراجاتى ەسەبىنەن قامتاماسىز ەتىلدى. وڭىرلىك بولىنىستە ينۆەستيتسيانىڭ نەگىزگى بولىگى الماتى قالاسىنا (11,4 ملرد تەڭگە) تيەسىلى بولدى. ال اۋە كومپانيالارىنىڭ تابىسى 16,2 پايىزعا, 179,3 ملرد تەڭگەگە ءوستى. سونىڭ ىشىندە, جۇك پەن باگاج تاسىمالداۋدان تۇسكەن تابىس 3,2 ملرد تەڭگەگە جەتتى. جولاۋشىلاردان تۇسكەن تابىس سايكەسىنشە – 176 ملرد تەڭگە», دەپ حابارلايدى «Finprom».
جالپى, بيىلعى ءۇش ايدا اۋە كولىگى ارقىلى 3,3 ملن جولاۋشى دىتتەگەن مەكەنىنە جەتكەن. بىلتىرعىدان 20,2 پايىزعا كوپ, جىل ساناپ جولاۋشى تاسىمالى اعىنى ارتىپ كەلە جاتىر. وڭىرلىك بولىنىستە ەڭ كوپ تاسىمال ۇلەسى الماتى قالاسىنىڭ ەنشىسىندە – 1,2 ملن ادام. ودان كەيىن استانا قالاسى – 916 مىڭ ادام, شىمكەنت قالاسى – 268,8 مىڭ ادام, ماڭعىستاۋ وبلىسى – 233,1 مىڭ ادام, اتىراۋ وبلىسى – 189,9 مىڭ ادام.
