جاستارىمىزدىڭ تاريحتا وتكەن ۇلى تۇلعالارعا قاراپ بوي تۇزەۋى, ولاردىڭ ونەگەلى ءومىر جولىنان عيبرات الۋى تاربيەمىزدىڭ باستى قۇرالى. بىلىمگە قۇشتار, ارمانشىل ۇرپاق ءوز حالقىنىڭ جاسامپاز بولمىسى مەن ومىرشەڭ داستۇرىمەن قارۋلانىپ, ۇلى تۇلعالارىن ۇلىقتاپ, سولاردى ۇلگى تۇتسا, ۇلت رۋحىنىڭ اسقاقتاي بەرۋىنە سەرت بەرە الامىز.
وسى ماقساتتا وتكىزىلگەن ەسسە جانە بەينەباياندار سايىسى جاستارىمىزدىڭ بىلىمگە دەگەن قۇلشىنىسىن كورسەتىپ, وتانشىلدىق, ۇلتجاندىلىق تانىمىنا قوزعاۋ سالعانىن كورسەتىپ بەردى.
ۋنيۆەرسيتەتتىڭ تاريحي مۇراجايى ۇيىمداستىرعان بۇل تانىمدىق سايىسقا قازاقستان جازۋشىلار وداعىنىڭ مۇشەسى, ساتباەۆتانۋشى-عالىم اسپانديار ادەن ۇلى توراعالىق ەتىپ, جۇزدەن جۇيرىك شىققانداردى انىقتادى.
ماراپاتتاۋ راسىمىنە بارلىق ايماقتاردان ەسسە جازعان تالانتتى وقۋشىلار مەن ولاردىڭ جەتەكشى-ۇستازدارى قاتىسىپ, ءسوز سويلەپ, ءوز ويلارىن ءبولىستى. ەسسە جازىپ, بەينەبايان تۇسىرگەن وقۋشىلار زەرتتەۋ, جازۋ كەزەڭىندەگى ءوز اسەرلەرىمەن ءبولىسىپ ۇلى عالىم تۋرالى تانىمدىق سۇراقتارعا دا جاۋاپ بەردى.
سايىس جەڭىمپازدارى ءتۇرلى سىيلىقتارمەن ماراپاتتالدى.
1-ورىن العان جەتىسۋ وبلىسى, اقسۋ اۋدانىنىڭ 11-سىنىپ وقۋشىسى وقۋ ورنىمىزدىڭ گرانتىنا يە بولدى.
2-ورىندى اقتوبە جانە تۇركىستان قالالارىنىڭ وقۋشىلارى الدى.
3-ورىندى پاۆلودار وبلىسى, ەكىباستۇز قالاسى, الماتى وبلىسى, قاسكەلەڭ قالاسى جانە تۇركىستان وبلىسى, سوزاق اۋدانىنىڭ وقۋشىلارى الدى. سونىمەن قاتار بارلىق قاتىسۋشىلارعا العىس حاتتار مەن شىعارماشىلىق دارىنى ءۇشىن نوميناتسياسى تابىستالدى. ماراپاتتاۋ بارىسىندا ۋنيۆەرسيتەتىمىزدىڭ پروفەسسورى بايباتشا ءادىلحان بەكدىلدا ۇلى سايىس جەڭىمپازدارىن قۇتتىقتاپ, ولارعا الداعى ۋاقىتتا دا ۇلكەن بەلەستەردى باعىندىرۋىنا تىلەكتەستىگىن ءبىلدىردى.
ساۋلەت جانە قۇرىلىس ينستيتۋتىنىڭ 4-كۋرس ستۋدەنتى اللابەرگەن بەردىبەكوۆ ق.ساتباەۆتىڭ ا.زاتاەۆيچكە جازدىرعان اندەرى ىشىنەن حالىق ءانى «وباعاندى» شىرقاسا, وزگە دە تالانتتى ستۋدەنتتەر ءبىرتۋار تۇلعاعا ارنالعان جىرلارىن وقىدى.
اسەرلى وتكەن تانىمدىق ءىس-شارا جاستارىمىزدىڭ قۇشتار كوڭىلىنە قوزعاۋ سالىپ, تەحنيكالىق ءبىلىمنىڭ قارا شاڭىراعى ساتباەۆ ۋنيۆەرسيتەتىنە دەگەن شىنايى پىكىرلەرى مەن ايرىقشا اسەرلەرىن پاش ەتىپ, كەيبىرى وسى وقۋ ورنىنا تۇسۋگە تالپىنىس جاسايتىنىن اڭعارتتى.
زاماناۋي تەحنيكا مەن تەحنولوگيانى ەركىن مەڭگەرگەن جاستارىمىز وسى مۇمكىندىكتى ەركىن پايدالانىپ, اسەرلى دە تارتىمدى بەينەباياندار جاساعانى ۇيىمداستىرۋشىلاردى ءبىر ءسۇيسىنتىپ تاستادى.
ايتا كەتەيىك, بۇل ء ىس-شارا ساتباەۆ ۋنيۆەرسيتەتى رەكتورىنىڭ باستاماسىمەن ەلىمىزدەگى بارلىق ساتباەۆ اتىنداعى مەكتەپتەرمەن ىنتىماقتاستىق مەموراندۋم جاساۋ ارقىلى ىسكە اسىرىلۋدا. الداعى ۋاقىتتا دا ۋنيۆەرسيتەت رەسپۋبليكاداعى ساتباەۆ اتىنداعى مەكتەپتەردى ءوز اياسىنا الۋعا, ءتۇرلى ءىس-شارالاردى بىرلەسە وتىرىپ اتقاراتىنىنا مۇددەلى ەكەنىن ايقىندادى. ويتكەنى بارلىق ءبىلىمنىڭ باستاپقى باسپالداعى مەكتەپ ەكەنى ءسوزسىز.
سايىستىڭ ءوز دارەجەسىندە وتۋىنە مۇرىندىق بولعان, ۋنيۆەرسيتەت تاريحي مۇراجايىنىڭ ديرەكتورى, ءارى دارىندى سۋرەتشى جەڭىس مولدابەكوۆكە قاتىسۋشىلار تاراپىنان العىس ايتىپ, راقمەتىن جاۋدىردى.
