جارىسقا قاتىسقان سەنات توراعاسى ماۋلەن اشىمباەۆ مەملەكەتتىڭ الەۋمەتتىك ساياساتىن ىسكە اسىرۋدا جانە ەرەكشە قاجەتتىلىگى بار ادامداردى وڭالتۋ ىسىندە سپورت ماڭىزدى ءرول اتقاراتىنىن اتاپ ءوتتى.
سونداي-اق پالاتا سپيكەرى مەملەكەت باسشىسى ەلىمىزدە ينكليۋزيۆتى قوعام قۇرۋعا جانە سوعان قاجەتتى بارلىق جاعدايدى جاساۋعا باسا ءمان بەرىپ كەلە جاتقانىن تىلگە تيەك ەتتى.
«Run for Autism» – جاي سپورت جارىسى ەمەس. بۇگىنگى جارىس كاسىبي سپورتشىلار مەن اۋەسقويلاردى, ەرەسەكتەر مەن بالالاردى بىرىكتىرگەن ماڭىزدى باستاما. بۇل سايىسقا ەكى مىڭنان استام بەلسەندى ازامات, ەرەكشە قاجەتتىلىگى بار بالالار جانە ولاردىڭ اتا-انالارى قاتىسىپ جاتىر. پرەزيدەنتىمىز قاسىم-جومارت كەمەل ۇلى توقاەۆ مۇمكىندىگى شەكتەۋلى ازاماتتاردى قولداۋعا جانە اۋىلدارىمىز بەن قالالارىمىزدا ينكليۋزيۆتى ورتا قالىپتاستىرۋعا ۇنەمى باسا ءمان بەرىپ كەلەدى. بۇگىن ءبىز وسى جارىس ارقىلى ەلىمىزدەگى ءار بالاعا ەرەكشە قاجەتتىلىگىنە قاراماستان ءبىلىم الىپ, دامۋى ءۇشىن تەڭ مۇمكىندىكتەر بەرۋ جولىندا تاعى ءبىر ماڭىزدى قادام جاساپ وتىرمىز. بارشاڭىزدى وسىنداي يگى باستامانى قولداۋعا, ءار بالانىڭ ءوز الەۋەتىن جۇزەگە اسىرۋىنا جاعداي جاسالعان ينكليۋزيۆتى قوعام قالىپتاستىرۋعا ۇلەس قوسۋعا شاقىرامىن, - دەگەن ماۋلەن اشىمباەۆ جارىستى ۇيىمداستىرۋشىلارعا العىس ءبىلدىردى.
ايتا كەتەيىك, بۇگىندە قازاقستاندا اۋتيزم دياگنوزى قويىلعان 15 مىڭنان استام بالا بار. جارىستى ۇيىمداستىرعان «بولاشاق» كورپوراتيۆتىك قورى 2015 جىلدان بەرى اۋتيزم جانە باسقا دا مەنتالدى بۇزىلۋ دەرتىنە شالدىققان بالالاردى وقىتۋعا ارنالعان باعدارلامانى ىسكە اسىرىپ كەلەدى. وسى ماقساتپەن قور ەلىمىزدىڭ 22 قالاسىندا ينكليۋزيانى قولداۋعا ارنالعان 57 كابينەت اشتى. سونىڭ ناتيجەسىندە 800-دەن استام ەرەكشە بالا مەكتەپكە بارىپ, ءبىلىم الۋ مۇمكىندىگىنە يە بولدى.
