وڭىردە ناۋرىز ايىنىڭ سوڭىندا اۋەلى قالدىعايتى, اڭقاتى, شىدەرتى سەكىلدى شاعىن وزەندەر تاسىسا, كەيىن ترانسشەكارالىق قاراوزەن مەن سارىوزەن, شاعان مەن دەركول, جايىق وزەندەرى دە ارناسىنان اسىپ, اساۋ مىنەز كورسەتتى. تاسىعان سۋ كوپ جەردە تۇرعىن ءۇي مەن مال-م ۇلىكتى عانا ەمەس, الەۋمەتتىك قۇرىلىمدارعا, سونىڭ ىشىندە اۋىزسۋمەن قامتۋ جۇيەسىنە دە زاقىم كەلتىردى.
وبلىستىق سانيتارلىق-ەپيدەميولوگيالىق باقىلاۋ باسقارماسىنىڭ دەرەگىنشە, سۋ كەتكەن اۋدانداردىڭ ەلدى مەكەندەرىندە, ياعني بايتەرەك, قاراتوبە, ءبورلى, تەرەكتى, سىرىم اۋداندارىنداعى تۇرعىن ۇيلەردى, سونداي-اق قازتالوۆ اۋدانىنىڭ سۋ باسقان 2 سۋ قۇبىرىن دەزينفەكتسيالاۋ شاراسى اياقتالىپ قالعان. بۇل جەرلەردە ەندى سۋ ساراپتاماسى جۇرگىزىلمەك.
قازىر قالپىنا كەلتىرىلگەن ورتالىقتاندىرىلعان سۋ جۇيەسىندەگى سۋ دا زەرتتەلىپ, قاۋىپسىزدىك شاراسى جاسالىپ جاتىر ەكەن. سۋ تاسقىنى باستالعاننان بەرى ماماندار بارلىعى 1 625 مارتە سۋ سىناماسىن زەرتتەۋگە العان. ونىڭ ىشىندە 817 سىناماعا ميكروبيولوگيالىق زەرتتەۋ, 808 سىناماعا سانيتارلىق-حيميالىق زەرتتەۋ جاسالعان.
بۇعان قوسا ورتالىقتاندىرىلماعان سۋمەن جابدىقتاۋ جۇيەسىن دە زەرتتەۋگە سانيتارلىق-ميكروبيولوگيالىق 17 سىناما جانە سانيتارلىق-حيميالىق زەرتتەۋلەرگە 17 سىناما الىنىپتى.
«زەرتحانالىق تالداۋ ناتيجەلەرى سۋدىڭ ساپاسى تالاپقا ساي ەكەنىن, قاۋىپسىزدىگىن, الىنعان بارلىق سىنامادا جۇقپالى اۋرۋلاردىڭ ءورشۋ قاۋپى جوقتىعىن كورسەتتى», دەيدى ماماندار.
بۇگىنگە دەيىن بارلىعى 724 تۇرعىن ءۇي, 577 كارىز, 3 سۋ قۇبىرى دەزينفەكتسيالانعان. سونىڭ ىشىندە سىرىم اۋدانى قوسارال اۋىلىنىڭ 1 سۋ قۇبىرى, قازتالوۆ اۋدانىنداعى ورتالىق قۇبىر مەن ءاجىباي اۋىلىنىڭ سۋ قۇبىرى بار.
ورال قالاسى ماڭىنداعى ساياجايلاردا دەزينفەكتسيالاۋ جۇمىسى سۋ كەتكەن سوڭ باستالادى. جايىق بويىن جاعالاي جاتقان اقجايىق اۋدانىندا 45 ەلدى مەكەن بولسا, سونىڭ 32-ءسى وزەن بويىندا ورنالاسقان. بيىلعى تاسقىننان اۋىلدار امان بولعانىمەن, 7 اۋىلدىق وكرۋگكە قاراستى 12 اۋىلدىڭ سۋ ايداۋ نىساندارى وتكەن اپتادا سۋ استىندا قالعان. قازىر بۇل اۋىلداردا الدىن الا رەزەرۆۋارلارعا جينالىپ الىنعان سۋ تۇرعىندارعا كەستەمەن بەرىلىپ جاتىر. ودان بولەك, اركىم ءوز اۋلاسىنداعى قۇيما قۇدىقتارعا سۋ جيناپ الىپ, امالداپ وتىر. كەي اۋىلدارعا اۋىزسۋدى كولىكپەن تاسىمالداۋ ۇيىمداستىرىلعان.
اقجايىق اۋدانى اكىمىنىڭ ورىنباسارى بەيىمبەت عيززاتوۆتىڭ ايتۋىنشا, اۋىزسۋدان تۇرعىندار تاپشىلىق كورمەيدى.
– حالىقتى اۋىزسۋمەن قامتۋ ماقساتىندا سۋ تاسيتىن 6 كولىك قىزمەت ەتىپ جاتىر. ونىڭ ەكەۋى «جايىقتەحسەرۆيس» كوممۋنالدىق مەكەمەسى قۇزىرىنداعى سۋ تاسىعىش تەحنيكاسى بولسا, قالعان تورتەۋى وبلىسقا ماتەريالدىق رەزەرۆتەن بەرىلگەن. سۋ دەڭگەيى تۇسكەن جاعدايدا سانيتارلىق تەكسەرۋ-تازالاۋ جۇمىسىن وتكەرىپ, ورتالىقتاندىرىلعان سۋ جۇيەسىن قايتادان قالپىنا كەلتىرەمىز, – دەيدى اۋدان اكىمى ورىنباسارى.
ايتا كەتەيىك, ەپيدەمياعا قارسى ءىس-شارالاردى وبلىس اكىمى ناريمان تورەعاليەۆ تىكەلەي ءوز باقىلاۋىندا ۇستاپ وتىر.
باتىس قازاقستان وبلىسى
