وتكەن جىلى تامىز ايىنىڭ 28-ىندە جانىبەك اۋدانىندا وقىس وقيعا بولعان ەدى. اۋدان ورتالىعىنان ۇزىنكول اۋلىنا بەت العان بالالى ايەلدى كولىك ەلدى مەكەننىڭ جانىنان ءتۇسىرىپ كەتە بارعان. كۇن كەشكىرىپ, كوز بايلانا باستاعان شاق ەكەن. اناسى سوڭىنان ەرىپ كەلە جاتقان ءۇش جاسار قىزى ايارۋدىڭ وزىنەن قالىپ قويعانىن قاپەلىمدە بايقاماپتى. كەيىن اينالا جۇگىرىپ ىزدەگەنىمەن, تابا الماعان. جانۇشىرعان كەلىنشەك امالسىز پوليتسياعا حابارلاعان.
ارينە, وقيعا ورنىنا پوليتسيا قىزمەتكەرلەرى جەدەل جەتتى. بولعان جاعدايدان اۋىل حالقى دا حاباردار بولدى. ىسكە توتەنشە جاعدايلار ءبولىمى, شەكارا قىزمەتى, جەرگىلىكتى اكىمدىك تۇگەل جۇمىلدى. 200-دەن اسا ادام ءتۇن ىشىندە قارشاداي قىزدى ىزدەۋگە كىرىستى.
– تۇنگى ساعات 12-لەر شاماسىندا ماعان حابار كەلدى. تەز ارادا «رويتەر» اتتى ءيتىمدى الىپ, ۇزىنكولگە جەتتىم. ايارۋدىڭ كيىمىنىڭ ءيىسىن العان سوڭ-اق ءيتىم اۋىلدان الىسقا تارتا بەردى. وسىلايشا, 5-6 شاقىرىمداي ۇزاپ شىقتىق. جانىمداعى سەرىكتەرىمنىڭ بارىنەن الىستاپ, جالعىز كەتتىم. ءسويتىپ كەلە جاتىپ, ءبۇرىسىپ وتىرعان قىزدىڭ ۇستىنەن تۇستىك. سول كۇنى ءتۇن سالقىن بولاتىن. ايارۋدىڭ قولدارى قىزارىپ كەتىپتى. ءوزى ابدەن قورقىپ قالعان. بىردەن جىلى كيىم جاۋىپ, قۇشاعىما قىسىپ الىپ, اۋىلعا جۇگىردىم, – دەيدى سول كۇنگى وقيعانى ەسىنە العان «قايرات» شەكارا بولىمشەسىنىڭ اعا سەرجانتى رافحات تايكەنجين.
كىشكەنتاي قىز اناسىن كورگەندە عانا ءوز-وزىنە كەلىپتى. تاڭعالاتىن جاعداي – ايارۋ اۋىل ماڭىندا سۋ جۇرەتىن تەرەڭ ارنانىڭ ءدال جانىنا كەلىپ توقتاعان ەكەن. پەرىشتەسى قاقتى دەگەن وسى شىعار. ايتپەسە تاس قاراڭعى تۇندە سۋعا قۇلاپ كەتسە, شىناشاقتاي قىزدىڭ امان قالۋى ەكىتالاي ەدى. ابىروي بولعاندا, ءبىر اۋىلدى اياعىنان تىك تۇرعىزعان وقيعا تاڭعى ساعات 4-تە قۋانىشپەن اياقتالدى.
اعا سەرجانت ر.تايكەنجين شەكارا قىزمەتىندە ەڭبەك ەتىپ ءجۇر. وتان الدىنداعى بورىشىن الماتى قالاسىنداعى 5572 اسكەري بولىمدە وتەگەن رافحات ماقاش ۇلى 2012 جىلى قىركۇيەك ايىنان باستاپ شەكارا قىزمەتىنىڭ جانىبەك اۋدانى باسقارماسىنا جۇمىسقا تۇرعان. ال 2016 جىلدان بەرى قىزمەتتىك يتتەردى باۋلۋعا كىرىسىپتى. بۇگىندە اعا نۇسقاۋشى لاۋازىمىندا جۇرگەن شەكاراشى ايارۋدى اجالدان قۇتقارعان ەڭبەگىن سولاي بولۋعا ءتيىس قالىپتى وقيعا دەپ سانايدى.
– قىزمەت بارىسىندا حالىققا كومەكتەسۋ – ءبىزدىڭ پارىزىمىز, اسكەري بورىشىمىز. قازاقستان رەسپۋبليكاسىنا ءاردايىم قىزمەت ەتەمىن! – دەيدى ر.تايكەنجين.
باتىس قازاقستان وبلىسى
