فوتو: سەنات
«بيىل قازاق جەرىنىڭ تۇتاستاي ءبىر رەسپۋبليكاعا بىرىگىپ, ەلىمىزدىڭ قازىرگى شەكاراسىنىڭ ايقىندالعانىنا ءجۇز جىل – ءبىر عاسىر تولىپ وتىر. مەملەكەتىمىزدىڭ تۇتاستىعى ءۇشىن بۇل ماڭىزدى وقيعا ەلەۋسىز قالماۋى ءتيىس. ءاليحان بوكەيحان, احمەت بايتۇرسىن ۇلى, مىرجاقىپ دۋلات ۇلى, ءالىمحان ەرمەكوۆ سەكىلدى الاش قايراتكەرلەرى باستاعان تاريحي پروتسەستى سول كەزدە بيلىكتە بولعان تۇرار رىسقۇلوۆ, سۇلتانبەك قوجانوۆ, سەيىتقالي مەڭدەشەۆ, سانجار اسفەندياروۆ, تەمىربەك جۇرگەنوۆ, جالاۋ مىڭباەۆ سياقتى تۇلعالار اياقتاپ شىقتى. قازاق اتىن قايتارعان ساكەن سەيفۋللين مەن اشارشىلىققا قارسى كۇرەسكەن الاش قايراتكەرلەرىن قامقورلىققا العان تۇرار رىسقۇلوۆتى قۇر كوممۋنيست اتى نەمەسە ءوزىن قورعاۋ ماقساتىندا جازعان حاتى ءۇشىن جازعىرۋ – ابەستىك», دەدى سەناتور.
تۇلعالار تۋرالى ءسوز قوزعاعاندا ادەپتەن وزباۋ تۋرالى ايتقان سەناتور بارىمىزدى باعالاۋ, ىرىلەردى الالاماۋ تۋرالى اتاپ ءوتتى. الاش ارىستارى اتقارعان ۇلى ىستەردى بۇگىنگى ۇرپاق ىزگى ىستەرمەن جالعاستىرىپ وتىرۋى ءتيىس. 2000 جىلى اعا ۇرپاق وكىلدەرى باستاماسىمەن حالىق شارۋاشىلىعى ينستيتۋتى ۇلتتىق ەكونوميكالىق ۋنيۆەرسيتەتكە اينالىپ, وعان رىسقۇلوۆتىڭ ەسىمى بەرىلگەن ەدى. كەيىن وقۋ ورنى جەكەمەنشىككە ءوتىپ, ت.رىسقۇلوۆتىڭ اتىن الىپ تاستادى. سەناتور ۇكىمەت قاۋلىسىنا سايكەس بەرىلگەن اتاۋدى جوو قانداي باسقارۋ تۇرىنە جاتاتىنىنا قاراماي, اۋىستىرۋعا قۇقى جوق ەكەنىن اتاپ ءوتتى.
«بيىل ساكەن سەيفۋللين, ءىلياس جانسۇگىروۆ, بەيىمبەت مايلين, تۇرار رىسقۇلوۆ, سۇلتانبەك قوجانوۆتىڭ تۋعانىنا 130 جىل تولىپ وتىر. تۇعىرلى تۇلعالاردىڭ مەرەيتويلارىن داڭعازاسىز, تاعىلىمدى ەتىپ اتاپ ءوتۋ كەرەك. بۇل رەتتە ونوماستيكا ماسەلەسىنە دە نازار اۋدارۋ قاجەت. شەكارامىزدى ايقىنداۋعا ايرىقشا ۇلەس قوسقان ءالىمحان ەرمەكوۆ سياقتى تۇلعالار ەلەۋسىز قالماۋى ءتيىس. الاش ارىستارىنىڭ كوبى قايدا جەرلەنگەنى بەلگىسىز. جۋىردا الماتى ىرگەسىندەگى جاڭالىق اۋىلىندا ساياسي رەپرەسسياعا ۇشىراعان 163 ادامنىڭ سۇيەگىنە زەرتتەۋ جۇرگىزىلىپ, گەنەتيكالىق تالداۋ ارقىلى 50 ادامنىڭ دەرەگى انىقتالدى. قاراجات بولىنسە, وسىنداي ءادىس ارقىلى احمەت بايتۇرسىن ۇلى, ءىلياس جانسۇگىروۆ سەكىلدى تۇلعالار تۋرالى دەرەكتەر ناقتىلانار ەدى», دەدى سەنات دەپۋتاتى.
د.قىدىرالى دەپۋتاتتىق ساۋالىندا قاراۋسىز جاتقان قاندىسايعا نەمەسە جاڭالىق اۋىلىنا اتا-بەيىت سياقتى ىرگەلى كەشەن تۇرعىزۋ – پەرزەنتتىك پارىز ەكەنىن اتاپ ءوتتى.
