فوتو: قورعانىس مينيسترلىگى
ءىس-شارا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ۇيىمداستىرىلدى. وعان قورعانىس مينيسترلىگى باسشىلىعىنىڭ وكىلدەرى, قر قارۋلى كۇشتەرىنىڭ ارداگەرلەرى, ساعادات قوجاحمەت ۇلىنىڭ كوزىن كورگەندەر, باتىردىڭ ەسىمىمەن اتالاتىن ەلوردالىق اسكەري كوللەدجدىڭ وقىتۋشىلارى, ستۋدەنتتەرى, كادەتتەرى جانە «جاس سارباز» بالالار-جاسوسپىرىمدەر اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى.
كونفەرەنتسياعا قاتىسۋشىلارعا ارنالعان العى سوزىندە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ كونفەرەنتسيانىڭ نەگىزگى ماقساتى – ارميا گەنەرالى س.ق. نۇرماعامبەتوۆتىڭ اسكەري مۇراسىن زەردەلەۋ, باتىردىڭ تاۋەلسىز قازاقستاننىڭ قارۋلى كۇشتەرىن قۇرۋعا جانە ونى دامىتۋعا قوسقان ۇلەسىن باعالاۋ ەكەنىن اتاپ ءوتتى.
«قازاق دالاسى ەجەلدەن داڭقتى باتىرلارىمەن بەلگىلى, ولاردىڭ ەسىمدەرى تاريحتا دا, حالىق جادىندا دا ماڭگى ساقتالعان. تۋعان حالقى ءۇشىن ءومىرىن بەرۋگە دايىن ۇلداردىڭ ءبىرى, ناعىز وتان قورعاۋشى – ساعادات قوجاحمەت ۇلى ەدى. ءبىز ونىڭ قالدىرعان مۇراسىن مۇقيات ساقتاپ, ۇرپاققا ونەگە رەتىندە كوبەيتىپ, جەتكىزۋىمىز كەرەك», دەدى رەكتور.
قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باستىعى ادىلەت پولكوۆنيگى تىلەۋحان باسقوجاەۆ ءبىرىنشى قورعانىس ءمينيسترىن ەسكە الۋ تۋرالى ۆەدومستۆونىڭ جوسپارىنداعى جۇمىس جايلى ايتىپ بەردى. ول س. نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىندا باتىردىڭ 100 جىلدىعىنا ارنالعان «اسكەري انت» وتاندىق سەريالى ءتۇسىرىلىپ, ەكرانعا شىققانىن ەسكە سالدى.
جاستارعا اسكەري-پاتريوتتىق تاربيە بەرۋدەگى سوعىس باتىرى تۇلعاسىنىڭ ماڭىزدىلىعىن ەۇۋ اسكەري كافەدراسىنىڭ وقىتۋشىسى زاپاستاعى پولكوۆنيك اتىعاي بالعابەكوۆ تە اتاپ ءوتتى.
«گەنەرال نۇرماعامبەتوۆ كوزى تىرىسىندە وتە كىشىپەيىل ادام بولعان, مەن باتىرمىن دەمەگەن, بايلىق پەن اتاق-داڭققا ۇمتىلماعان. جەكە باسىنىڭ قاسيەتتەرى, ۇستانعان مورالدىق قاعيداتتارى, قيىندىققا تولى ءومىر جولى وسكەلەڭ ۇرپاققا ۇلگى بولۋعا ءتيىس», دەپ تولىقتىردى ا. بالعابەكوۆ.
ەۇۋ اسكەري كافەدراسىنىڭ وقىتۋشىسى ابۋباكىر سمايىلوۆ ساعادات نۇرماعامبەتوۆ سياقتى ادامدار ءجۇز جىلدا ءبىر رەت تۋىلاتىنىن اتاپ ءوتتى.
ء«وزىنىڭ ەلى ءۇشىن ەكى رەت ەرلىك جاساعان ۇلى تۇلعا. العاش رەت 19 جاسىندا وتان قورعاۋعا اتتانىپ, نەبارى 20 جاسىندا كەڭەس وداعىنىڭ باتىرى اتاعىن الدى, ەكىنشى رەت تاۋەلسىز قازاقستان ارمياسىن قۇرۋعا ولشەۋسىز ەڭبەك ەتتى. 2005 جىلى بۇۇ باس اسسامبلەياسىنىڭ 60 جىلدىعىنا ارنالعان وتىرىستا ساعادات نۇرماعامبەتوۆ الەمدىك تريبۋنادان ءسوز سويلەگەن جالعىز مايدانگەر بولدى. بۇل بىرەگەي تاريحي كادرلار بىزگە بۇۇ-نىڭ مۇراعاتىنان الدىق. ارميا گەنەرالىنىڭ وسى باعا جەتپەس كادرلاردا ايتقانىنىڭ ءبارى بۇگىنگى كۇنگە دەيىن وزەكتى. جاس ۇرپاق اتا-بابالارىمىزدىڭ ەڭ قۇندى مۇراسى – جەرىمىزدەگى بەيبىتشىلىكتى ساقتاۋى ءتيىس», دەپ اتاپ ءوتتى ابۋباكىر سمايىلوۆ.
گەنەرال-لەيتەنانت اباي تاسبولاتوۆ تاساعادات نۇرماعامبەتوۆ تۋرالى ەستەلىكتەرىن ءبولىستى.
«مەن ءۇشىن اكەمدەي بولدى. ءبىز ول كىسىنى ۇلگى ەتىپ وستىك. كوپ نارسەنى ۇيرەتتى. كادرلاردى قالاي تاڭداۋ كەرەكتىگىن جاقسى بىلەتىن. ءومىردىڭ بارلىق قيىندىقتارىنا قاراماستان, ول سىنعان جوق, قايتا رۋحى كۇشەيە ءتۇستى. سىنعا شىڭدالا تۇسەتىن, ناعىز كۇرەسكەر ادام ەدى. بىزگە دە قيىندىققا مويىماۋدى ۇيرەتتى. ەندىگى جەردە ءبىزدىڭ مىندەتىمىز – كەلەر ۇرپاقتى ەلىن, جەرىن قاستەرلەۋگە تاربيەلەۋ», دەدى ارداگەر.
كونفەرەنتسيا بارىسىندا باتىردىڭ نەمەرەسى ليرا نۇرماعامبەتوۆانىڭ ەستەلىكتەرى دە ايتىلدى. ونىڭ ايتۋىنشا, ساعادات قوجاحمەت ۇلى وتە قاراپايىم, بىراق تالاپشىل جانە جاۋاپتى ادام بولعان. ەستە ساقتاۋ قابىلەتىنىڭ مىقتىلىعى سونداي ول ومىرىندەگى كوپتەگەن وقيعالاردى بۇگە-شىگەسىنە ايتا الاتىن. باتىر وتانعا جانە حالىققا ادال ءارى جانقيارلىق قىزمەتىمەن ۇلگى بولىپ, ماڭگى ەل جادىندا ساقتالارى ءسوزسىز.
