كوللاجدى جاساعان – زاۋرەش سماعۇل ,«EQ»
بۇل تاريحي قۇندى ەسكەرتكىشتى مۋزەي قورىنا باقىتجان قاراتاەۆتىڭ كەلىنى ءبيبىاجار باقىتجانوۆا تاپسىرعان ەكەن. توسبەلگىدە اق مەتالدان جاسالعان رەسەي يمپەرياسىنىڭ گەربى بار جانە كوك ءتۇستى ەمالدى كرەست بەينەلەنگەن.
رەسەي يمپەرياسىندا توسبەلگىلەردى, ناگرادالاردى تاعۋ قاتال تارتىپپەن قاداعالانىپ وتىرعان كورىنەدى. توسبەلگىنىڭ مەرەكەلىك شەرۋگە جانە كۇندەلىكتى فراكقا تاعىلاتىن ەكى ءتۇرى بولعان. ونىڭ العاشقىسى كولەمدىرەك بولىپ, تەك سالتاناتتى شەرۋدە, جيىنداردا تاعىلسا, فراكقا تاعىلاتىن كىشكەنە بەلگىنى كۇندەلىكتى كيىمگە – كەۋدەنىڭ وڭ جاعىنا تاعۋعا رۇقسات ەتىلگەن. سۋرەتتە باقىتجان ءبيسالى ۇلىنىڭ كۇندەلىكتى تۇتىنعان بۇيىمى بەينەلەنگەن.
– قازاقتان شىققان تۇڭعىش زاڭگەر, مەملەكەت جانە قوعام قايراتكەرى, اعارتۋشى-دەموكرات باقىتجان قاراتاەۆتىڭ قايتىس بولعانىنا بيىل 90 جىل تولىپ وتىر. باقىتجان اتامىز پەتەربۋرگتەگى يمپەراتورلىق ۋنيۆەرسيتەتتىڭ زاڭ فاكۋلتەتىن ەرەكشە, ءوز اتى جازىلعان التىن مەدالمەن تامامداعان. «وسىناۋ دۇنيەلەردى ءوز كەزىندە باقىتجان بابامىز ۇستاپ-تۇتتى عوي» – دەگەن ويدىڭ وزىنەن-اق بۇل زاتتىڭ باعاسىن بىلەسىڭ. مۋزەي قورىنا تۇسكەن بۇل جادىگەر تالاي جىل تاريح بولىپ سويلەيتىنىنە ەش كۇمانىمىز جوق, – دەيدى باتىس قازاقستان تاريحي-ولكەتانۋ مۋزەيىنىڭ قور ساقتاۋشىسى مۇحتار وتەسوۆ.
باتىس قازاقستان وبلىسى
