فوتو: مەملەكەتتىك باسقارۋ اكادەمياسى
5 كۇندىك تاعىلىمداما قازاقستان پرەزيدەنتى جانىنداعى مەملەكەتتىك باسقارۋ اكادەمياسى مەن تۇركيا رەسپۋبليكاسى پرەزيدەنتىنىڭ جانىنداعى ادام رەسۋرستارىن باسقارۋ جونىندەگى وفيس اراسىنداعى ىنتىماقتاستىق تۋرالى مەموراندۋم اياسىندا جۇزەگە اسىرىلدى. تاعىلىمداماعا ەلىمىز بويىنشا 6 ءوڭىردىڭ 13 مەملەكەتتىك قىزمەتشىسى قاتىستى.
تاعىلىمداماعا قاتىسىپ كەلگەن اباي وبلىسى ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى انزور اباەۆ كاسىبي داعدىلارىن ارتتىرىپ كەلگەنىن ايتتى.
«تاعىلىمداما بارىسىندا مەملەكەتتىك اپپاراتتىڭ قىزمەتىمەن جەكە تانىسۋعا, تىكەلەي ورىنداۋشىلارمەن جانە تۇركيانىڭ جەكەلەگەن مەملەكەتتىك ورگاندارىنىڭ باسشىلىعىمەن پىكىر الماسۋعا مۇمكىندىك تۋدى. تاعىلىمداما جوعارى دەڭگەيدە ۇيىمداستىرىلدى جانە ناتيجەلى ءوتتى. سونداي-اق تاعىلىمداما اياسىندا تۇركيا مەملەكەتتىك اپپاراتىنىڭ باسقارۋ جۇيەسىمەن, جەرگىلىكتى اكىمدىكتەردىڭ, سالالىق مينيسترلىكتەردىڭ قىزمەتىمەن تەرەڭىرەك تانىستىم. قازاقستان پرەزيدەنتىنىڭ جانىنداعى مەملەكەتتىك باسقارۋ اكادەمياسىنا بىزگە كاسىبي داعدىلارىمىز بەن قۇزىرەتتەرىمىزدى ارتتىرۋعا, بىلىمدەرىمىزدى كەڭەيتۋگە جانە تەرەڭدەتۋگە مۇمكىندىك بەرگەنى ءۇشىن العىسىمدى بىلدىرەمىن», دەدى مەملەكەتتىك قىزمەتشى.
تاعىلىمداما باعدارلاماسىنا ساي دەلەگاتسيا HR كەڭسەسىنىڭ قىزمەتىمەن, تسيفرلىق جۇيەنى پايدالانا وتىرىپ, تۇركيانىڭ ادامي رەسۋرستاردى باسقارۋ سالاسىنداعى تاجىريبەسىمەن تانىستى. مينيسترلىكتەر مەن ۆەدومستۆولىق باعىنىستى ۇيىمداردا, انكارا جانە كاپپادوكيا قالالارىنىڭ گۋبەرناتورلارىمەن بىرقاتار كەزدەسۋ ءوتتى. سونىمەن قاتار مەملەكەتتىك قىزمەتشىلەر ءۇشىن تۇركيانىڭ ىشكى ىستەر مينيسترلىگىنە قاراستى اپاتتار مەن توتەنشە جاعدايلاردى باسقارۋ كەڭسەسىندە (AFAD) سۋ تاسقىنى, جەر سىلكىنىسى كەزىندە ارەكەت ەتۋ, قۇتقارۋ وپەراتسيالارىن جۇزەگە اسىرۋ بويىنشا پراكتيكالىق ءدارىس وتكىزىلدى.
قاتىسۋشىلار تۇركيا رەسپۋبليكاسى مادەنيەت جانە تۋريزم مينيسترلىگى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ قىزمەتىمەن دە تانىستى. تاعىلىمداما ناتيجەسى بويىنشا مەملەكەتتىك قىزمەت سالاسىنداعى ورتاق ءىس-شارالار مەن جوبالاردى ىسكە اسىرۋ تۋرالى كەلىسىلدى.
