فوتو: baq.kz
«جوبانىڭ باستى ماقساتى – ءاربىر باتىردىڭ, ءاربىر جاۋىنگەردىڭ تاريحتا ماڭگى تاڭبالانۋىن, لايىقتى تانىلۋىن قامتاماسىز ەتۋ», دەپ اتاپ ءوتتى مينيستر ايدا بالاەۆا. سايت دومەنى – batyrlargatagzym.kz.
مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ ءۇشىنشى وتىرىسىندا: «ەكىنشى دۇنيەجۇزىلىك سوعىس ەسكى شەجىرەگە اينالعان سايىن تاريحي جانە اسكەري تاقىرىپتاعى الىپ-قاشپا اڭىز اڭگىمەلەر كوبەيە ءتۇستى. قازاقستان ارقاشان تاريحي شىندىقتىڭ جانە ادامزات جىلناماسىنداعى ەڭ قاندى قاساپ تۋرالى شىنايى كوزقاراستىڭ ساقتالعانىن قالايدى. وتكەندى سارالاپ, وعان شىنايى باعا بەرۋدىڭ ماڭىزى زور. سول ءۇشىن مۇراعات ماتەريالدارىن مۇقيات زەرتتەۋ قاجەت. سۇراپىل سوعىس كەزىندەگى اعا بۋىننىڭ وشپەس ەرلىگى مەن ەرەن ەڭبەگىن ۇرپاق جادىندا جاڭعىرتۋ وتە ماڭىزدى. مەملەكەت بۇل باعىتتاعى جۇمىستى جالعاستىرا بەرەدى», دەدى.
سايتتا جۇكتەلگەن, ءتۇرلى سەنىمدى اقپارات كوزدەرىنەن جيناقتالعان مۇراعات ماتەريالدارى وتانداستارىمىزدىڭ سوعىس جىلدارىنداعى ەرلىك ىستەرىن, ەرەن ەڭبەگىن پاش ەتەدى. بۇل جوبا – قايتپاس, قايسار جاۋىنگەر اتا, اكەلەرىمىزدىڭ اسىل رۋحتارىنا قويىلعان ماڭگى ەسكەرتكىش. قاناتقاقتى جوبا 2023 جىلى جاريا ەتىلگەن ساتتەن ازاماتتىق قوعام مەن ۆولونتەرلەر تاراپىنان قىزىعۋشىلىق, قۇلشىنىس تۋدىردى. ءسويتىپ, جوبا ارناسى كەڭەيە كەلىپ, ەندى مىنە, دەرەكتەر تولىققاندى پورتالعا جۇيەلەنىپ وتىر.
«بۇگىندە پورتالدا 100 مىڭنان استام قازاقستاندىق ارداگەر تۋرالى اقپارات بار, ءبىز سوعىستىڭ 80 جىلدىعىنا قاراي پورتال بارلىق جاۋىنگەر تۋرالى مالىمەتتەردى بىرىكتىرەدى دەپ سەنەمىز», دەيدى ا.بالاەۆا.
مينيسترلىك ەل تۇرعىندارىن ارداگەرلەر تۋرالى وزدەرىندە بار مالىمەتتەردى ۇسىنۋ ارقىلى جوباعا ۇلەس قوسۋعا شاقىرادى. ءار ادام جەكە وتباسى مۇراعاتىندا ساقتالعان, فوتوسۋرەتتەر, قۇجاتتار, مايداننان كەلگەن حاتتار جانە باسقا دا ماتەريالدار ۇلگىسىندەگى ءتۇرلى دەرەكتەردى, قۇجاتتاردى كوشىرۋگە, جۇكتەۋگە بەرۋ ارقىلى جوباعا كومەكتەسە الادى.
«پورتال مادەنيەت جانە اقپارات مينيسترلىگىنىڭ, مەملەكەتتىك مۇراعاتتاردىڭ, قورعانىس مينيسترلىگىنىڭ, ۆولونتەرلەردىڭ جانە ازاماتتىق قوعامنىڭ بىرلەسكەن جۇمىسىنىڭ ناتيجەسى», دەدى ا.بالاەۆا.
بىرەگەي سايت – سۇراپىل سوعىستا جانقيارلىقپەن ەرلىك جاساعان, ەلى ءۇشىن جانىن قۇربان ەتكەن بابالار رۋحىنا تاعزىم ەتۋدىڭ, قيان-كەسكى ۇرىستان امان كەلگەن اتا-اجەلەردى قۇرمەتتەۋدىڭ تاعى ءبىر تاعىلىمدى ۇلگىسى. ارداگەرلەر بىزگە تەك جاۋىنگەرلىك ەرلىگىمەن ەمەس, ومىرلىك ونەگەسىمەن دە قىمبات. سول تۇرعىدا دوستىق, ەرلىك جانە باۋىرلاستىق ءتارىزدى ۇلاعاتتى ۇعىمدارمەن تىعىز بايلانىستى جەڭىس ساربازدارىن جان-جاقتى ۇلىقتاي بەرۋ – قاسيەتتى پارىز. وت پەن وقتىڭ ورتاسىندا ءجۇرىپ, ەرلىكتىڭ ەرەن ۇلگىسىن كورسەتكەن قازىنالى قارتتارىمىز قانداي قۇرمەت-قوشەمەتكە دە لايىق.
