قوستانايدا بۇرىنعى قارجى پوليتسياسىنىڭ قىزمەتكەرلەرى جۇمىسسىز قالدى

قوستاناي. 10 قاڭتار. قوستاناي وبلىسىندا بۇرىنعى قارجى پوليتسياسى قىزمەتكەرلەرىنىڭ ۇشتەن ءبىرى قازىر جۇمىسسىز قالدى. بۇل جونىندە egemen.kz ءتىلشىسى حابارلادى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتى باسشىسىنىڭ ورىنباسارى اسقار شومانوۆتىڭ ايتۋىنشا, بۇرىن ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىندە 162 قىزمەتكەر, ال مەملەكەتتىك قىزمەت اگەنتتىگىنىڭ وبلىس بويىنشا باسقارماسىندا 15 ادام جۇمىس ىستەپتى. قازىر دەپارتامەنتتە 82 ادام قىزمەت اتقارادى. بۇرىنعى قارجى پوليتسەيلەرىنىڭ ءبىرازى قارجى مينيسترلىگىنىڭ بولىمشەلەرىنە قىزمەتكە تۇردى, بىراق وبلىستاعى بۇرىنعى قارجى پوليتسياسى قىزمەتكەرلەرىنىڭ 30 پايىزى جۇمىسسىز قالدى. ايتا كەتەيىك, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى بۇرىنعى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى مەن مەملەكەتتىك قىزمەت ىستەرى جونىندەگى اگەنتتىكتى بىرىكتىرىپ, قايتا قۇرۋ ناتيجەسىندە جاڭادان قۇرىلعان بولاتىن. اسقار شومانوۆ ءمالىم ەتكەندەي, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىندە ءالى شتات جاساقتالىپ جاتىر, قىزمەتكەرلەردىڭ سانى 125-كە جەتۋى ءتيىس. قازىر بوس ورىندارعا كونكۋرس جاريالاندى. وعان بۇرىنعى قارجى پوليتسەيلەرى قاتىسۋىنا بولادى. بىراق ولار قايتادان مەملەكەتتىك قىزمەتكە قابىلداناتىن راسىمدەردەن ءوتۋى قاجەت, سونىمەن قاتار دەنەشىنىقتىرۋ نورمالارىن تاپسىرۋى كەرەك. تاعى ءبىر ايتا كەتەر جايت, اتالمىش دەپارتامەنتتە قوعامدا جۇمىسى سىبايلاس جەمقورلىققا قارسى مادەنيەتتى قالىپتاستىرۋ جانە ازاماتتاردىڭ قۇقىقتىق ساۋاتىن كوتەرۋگە باعىتتالعان جاڭا ەكى ءبولىمنىڭ اشىلۋىنا بايلانىستى لاۋازىمدىق قىزمەت ورنى 15-تەن 25-گە دەيىن كوبەيدى. ولاردى كونكۋرس ارقىلى ەمەس, تاعايىندايدى. ءنازيرا جارىمبەتوۆا. دەرەك, سۋرەت: egemen.kz.