فوتو: ن.بايبۋلين
ء«اليا مولداعۇلوۆانىڭ ەرلىگى جاس بۋىن ءۇشىن قاشاندا ۇلگى. ول نەبارى جيىرما جاسىندا قاھارماندىعىمەن تانىلدى. ءبىز ەلىمىزدە بەيبىتشىلىك پەن كەلىسىم ساقتالىپ, جەرىمىزدە ەشقاشان سوعىس بولماۋى ءۇشىن جۇدىرىقتاي جۇمىلۋىمىز قاجەت. وسى جولدا ەل بولىپ ەڭبەك ەتۋىمىز كەرەك. پرەزيدەنتىمىز قاسىم-جومارت كەمەل ۇلى توقاەۆتىڭ تاپسىرماسى بويىنشا قازىر ەلىمىزدە جەڭىس كۇنىنە ارنالعان ءىس-شارالار ءوتىپ جاتىر. سوعىس كەزىندە ءبىر ميلليون ەكى ءجۇز مىڭ قازاقستاندىق مايدانعا اتتاندى. ولاردىڭ جارتىسى ەلگە ورالعان جوق. جەتى ءجۇز مىڭنان استام وتانداسىمىز تىلدا كۇندىز-ءتۇنى ەڭبەك ەتتى. مۇنىڭ ءبارى جەڭىستى جاقىنداتۋعا قوسىلعان ۇلكەن ۇلەس ەكەنى انىق. سوندىقتان وتان ءۇشىن وپات بولعانداردىڭ ەرلىكتەرىن ۇمىتپاي, ونى دارىپتەۋ ءبىز ءۇشىن اسا ماڭىزدى», دەدى ماۋلەن اشىمباەۆ.
سونىمەن قاتار بۇگىن پالاتا سپيكەرى ءبىر توپ دەپۋتاتپەن بىرگە سوعىس ارداگەرى رزاعۇل بايكەشەۆتى جەڭىس كۇنىمەن قۇتتىقتادى. اقساقال 1923 جىلى تۋعان. سوعىس كەزىندە ول كالينين وبلىسىندا, رىجوۆ, ۆەليكي لۋگ قالالارىنداعى شايقاستارعا جانە پولشا, رۋمىنيا, ۆەنگريانى ازات ەتۋگە قاتىسقان. ەرلىگى ءۇشىن وتان سوعىسى وردەنىمەن, مارشال گ.ك.جۋكوۆ مەدالىمەن جانە باسقا دا ناگرادالارمەن ماراپاتتالعان.
ماۋلەن اشىمباەۆ مايدانگەردى قۇتتىقتاپ, جەڭىس كۇنى كەلەر ۇرپاقتىڭ بەيبىت زامانى ءۇشىن ءوز ومىرلەرىن بايگەگە تىگىپ, ەتىگىمەن سۋ كەشكەن ەرلەردىڭ ەرلىگىنە كورسەتىلگەن قۇرمەت ەكەنىن ايتتى. سونداي-اق سەنات توراعاسى ارداگەرگە ەل-جۇرتتىڭ ىزگى تىلەگىن جەتكىزدى.
«سوعىس جىلدارىندا اعا بۋىن ەرەن ەرلىكتىڭ وزىق ۇلگىسىن كورسەتتى. ەرلىك ەشقاشان ۇمىتىلمايدى. سوندىقتان بۇگىن ءسىزدى قۇتتىقتاۋ ءۇشىن ارنايى كەلدىك. مايدانگەرلەرگە قۇرمەت كورسەتۋ, اتالارىمىز بەن اكەلەرىمىزدىڭ رۋحىنا تاعزىم ەتۋ – ءبىزدىڭ پەرزەنتتىك پارىزىمىز. ءبىزدىڭ بۇگىنگى بەيبىت ءومىرىمىز بەن تىنىشتىعىمىز, ءبىرىنشى كەزەكتە, سىزدەردىڭ ەرلىكتەرىڭىزدىڭ ناتيجەسى. مۇنىڭ ءبارى وسكەلەڭ ۇرپاق ءۇشىن ءاردايىم ۇلگى-ونەگە بولىپ قالا بەرەدى. مەملەكەت باسشىسىنىڭ باستاماسىمەن قابىلدانعان «ايبىن» وردەنىنىڭ ءۇش دارەجەسىن داڭقتى باتىرلارىمىز – ساعادات نۇرماعامبەتوۆتىڭ, باۋىرجان مومىش ۇلىنىڭ جانە راقىمجان قوشقارباەۆتىڭ اتىمەن اتاۋ تۋرالى زاڭ دا سونى كوزدەيدى», دەدى ماۋلەن اشىمباەۆ.
