جۇمىس ورنىمىزعا ارنايى ات باسىن بۇرعان سوعىس ارداگەرىنىڭ ۇلى «اكەمە دەگەن ساعىنىشىم مەن قۇرمەتىمدى گازەت بەتىندە كورسەتسەم دەگەن نيەتپەن كەلدىم», دەدى. ايتۋىنشا, اكەسى مايدان دالاسىندا ەكى رەت اۋىر جاراقات السا دا, العى شەپتەن قايتپاعان.
«مەن اكەممەن ماقتانامىن. ول كىسى 1911 جىلى قازىرگى بايزاق اۋدانىنىڭ بۇرىنعى تەسپە اۋىلىندا كەدەي وتباسىندا دۇنيەگە كەلگەن. اتام سارشا بايدىڭ جالشىسى رەتىندە قىزمەت ەتسە, اجەم ءۇي شارۋاسىندا جۇرگەن. اكەم مەدرەسەدە ەسكىشە ساۋات اشىپتى», دەيدى ول.
امانعالي سارشاەۆ كەلتىرگەن دەرەككە جۇگىنسەك, اكەسى الماتىداعى جوعارى پارتيا مەكتەبىن 1934 جىلى اياقتاعان. كەيىننەن قازىرگى اباي وبلىسىنا قاراستى تاسبۇلاق كەڭشارىندا فەرما مەڭگەرۋشىسى بولىپ ەڭبەك جولىن باستاپتى. ارادا از ۋاقىت وتكەندە مەركى اۋدانىنداعى كۋزمينكا مەكتەپ-ينتەرناتىنا ديرەكتورلىققا تاعايىندالىپ, تۋعان جەرگە ورالعان. سونداي-اق قازاقستان, ءتاتتى اۋىلدارىنداعى مەكتەپتەردى دە باسقارعان.
«اكەم 1942 جىلى مايدانعا اتتانعان. ەۋروپانىڭ ءبىراز ەلىن جاۋدان ازات ەتۋ بارىسىندا ەكى رەت اۋىر جاراقاتتانعان. سوعان قاراماستان گوسپيتالدان شىققان سوڭ, قايتا الدىڭعى شەپكە گەرمانيانىڭ ۆالدەنبۋرگ قالاسىندا جەڭىس شەرۋىنە قاتىسقان. اكەمنىڭ مايدان دالاسىنداعى ەرلىگى ەسكەرۋسىز قالعان جوق. بىرقاتار وردەن-مەدالمەن ماراپاتتالعان. ەلگە ورالعاننان كەيىن بۇرىنعى سۆەردلوۆ اۋدانىنداعى بىرقاتار مەكتەپتە ديرەكتور قىزمەتىن اتقاردى. 1949 جىلى سوعىس كەزىندە العان اۋىر جاراقاتى سىر بەرىپ, ماڭگىلىك مەكەنىنە اتتاندى», دەيدى ا.سارشاەۆ.
اكەسى تۋرالى مالىمەت ىزدەگەن امانعالي اعا رەسەي قورعانىس مينيسترلىگىنە حات تا جولداعان ەكەن. مينيسترلىكتىڭ مۇراعاتىنان جەتكەن مالىمەتتە لەيتەنانت ساپارباي سارشاەۆتىڭ مايداندا 1239-اتقىشتار پولكىنىڭ ديۆيزيا قۇرامىندا بولعانى, سوعىس كەزىندە كورسەتكەن ەرلىگى باعالانىپ, «جاپونيانى جەڭگەنى ءۇشىن», «گەرمانيانى جەڭگەنى ءۇشىن» سەكىلدى وزگە دە بىرقاتار وردەن-مەدال العانى تۋرالى دەرەك كەلتىرىلگەن.
«ول كىسى بىزگە ارقاشان ەر ازامات ءۇشىن وتان قورعاۋدان اسقان مىندەت جوق ەكەنىن ايتىپ وتىراتىن. اكەمنىڭ عيبراتقا تولى اڭگىمەلەرىن مەن ەندى ءوز نەمەرەلەرىمە جەتكىزۋشىمىن. مايداندا ەرەن ەرلىك كورسەتكەن اسقار تاۋىمنىڭ ءومىر جولى قاي كەزدە دە ۇلگى بولىپ قالا بەرەدى», دەيدى ا.سارشاەۆ.
تاراز
