اتالعان راسىمگە دەپارتامەنت باستىعى پولكوۆنيك ءا.كايۋپوۆ باستاعان قوناقتار, شەكارا قىزمەتىنىڭ ارداقتى ارداگەرلەرى, سالتاناتتى تۇردە انت قابىلداعان ساربازداردىڭ اتا-انا, تۋىستارى قاتىستى. ساپتىق الاڭعا جاۋىنگەرلىك تۋ شىعارىلعاننان كەيىن, جينالعان قالىڭ قاۋىم تاعاتسىزدانا كۇتكەن شارا باستالىپ كەتتى.
ايتا كەتۋ كەرەك, شەكاراشىلار ساپىنا كوكتەم مەزگىلى باستالعان كەزدە الىنعان ساربازدار مۇندا وزدەرىنىڭ جاۋىنگەرلىك دايارلىقتارىن شىڭداپ قانا قويماي, ەل شەبىنە قاجەتتى ماماندىقتاردى دا يگەرىپ شىعاجى. بۇل – اسپاز, بايلانىسشى جانە سانيتارلىق نۇسقاۋشى ماماندىقتارى. سونداي-اق وتان الدىنداعى بورىشتارىن ەل شەبىندە وتەۋگە دايىندالىپ جاتقان ساربازداردى الداعى ۋاقىتتا تاماشا مۇمكىندىكتەر كۇتىپ تۇر. اتاپ ايتقاندا, ساربازدىق مىندەتتەرىن ابىرويمەن وتەگەن مەرزىمدى قىزمەتتىڭ جاۋىنگەرلەرى وزدەرى قالاعان وتاندىق جوعارى وقۋ ورىندارىنا تەگىن تۇسە الادى. بۇعان قوسا, ايتا كەتسەك, ءوزىنىڭ سانالى عۇمىرىن ەل شەبىمەن بايلانىستىرعىسى كەلەتىندەر ءۇشىن ەلىمىزدەگى جانە شەتەلدىك جوعارى اسكەري ءبىلىم ۇستاحانالارىنىڭ ەسىگى ايقارا اشىق. وسى ورايدا, دەپارتامەنت باستىعى الىبەك كايۋپوۆ اتالعان مۇمكىندىكتى يەلەنگەن «كوكتەم-2023» شاقىرىلىمىنىڭ ءۇش ساربازى: دياس حامزين, ماقسات زادا, ارسەن ماتقۇرمانوۆتارعا وزدەرى تاڭداعان جوعارى وقۋ ورىندارىنىڭ سەرتيفيكاتتارىن سالتاناتتى تۇردە تاپسىردى.
سارباز عۇمىرىندا ءبىر رەت قانا بولاتىن ماڭىزدى مەزەتكە كۋا بولعان اتا-انا, باۋىر, قۇربى-دوستاردىڭ ەرەكشە تولقىنىسى بال-بۇل جانعان جۇزدەرىنەن بايقالىپ تۇردى. اسىرەسە, نەمەرەلەرىن ساعىنىپ كەلگەن اتا-اجەلەردىڭ قۋانىشتارىندا شەك جوق.
شەكاراشىلاردى انت قابىلداۋلارىمەن قۇتتىقتاعان دەپارتامەنت باستىعى ءا.كايۋپوۆ جاس تولقىنداردىڭ الداعى قىزمەتتەرىنە ساتتىلىك تىلەدى. كەلەسى كەزەكتە ءسوز العان ناۋرىزباي اۋدانى اكىمى ورىنباسارى ميراس نىساناليەۆ, سونداي-اق, شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى الماتى وبلىسى بويىنشا فيليالىنىڭ توراعاسى زاپاستاعى پولكوۆنيك د.مامىرحانوۆ, اتالعان اۋدان ارداگەرلەرى كەڭەسىنىڭ توراعاسى مادەنيەت كارپەنوۆتەر ەل تىنىشتىعىمەن تىكەلەي بايلانىستى شەكاراشى ماماندىعىنىڭ قاستەرلى سانالاتىنىن تىلگە تيەك ەتتى, ساربازداردىڭ بەرگەن انتتارىنا ادالدىق تانىتاتىندارىنا سەنىم ءبىلدىردى.
سونداي-اق ساپتا تۇرعان ساربازداردىڭ اتىنان مىنبەرگە كوتەرىلگەن قوس شەكاراشىنىڭ ءبىرى, قاتارداعى جاۋىنگەر ەميل ماليكوۆ قۇددى ماعجان جۇماباەۆتىڭ ء«بىز جانباساق لاپىلداپ, اسپان قالاي اشىلماق...» دەگەن ولەڭىن ەرىكسىز ەسكە سالىپ تۇرعانداي ەكەن. ءىس-شارانى قاراساي اۋدانى بويىنشا شەكارا باسقارماسىنىڭ ارناۋلى ماقساتتاعى ۇتقىر ءىس-قيمىلدار توبىنىڭ سايىپقىراندارى جالعاستىرىپ, جينالعان قاۋىم ارنايى جاساقتىڭ قويان-قولتىق ۇرىس تاسىلدەرىن تاماشالادى. سونىمەن قوسا, كۇردەلى جاۋىنگەرلىك تاپسىرمالاردى ورىنداۋعا ماشىقتانعان اسكەري قىزمەتشىلەر مەملەكەتتىك شەكارا بۇزۋشىنى ۇستاۋدىڭ تاسىلدەرىن شەبەر كورسەتتى.
ءىس-شارا سوڭىندا ناۋرىزباي اۋدانى اكىمدىگىنىڭ ۇيىتقى بولۋىمەن, جاس بيشىلەر مەن انشىلەر تاماشا ونەرلەرىمەن مەرەكەلىك كوڭىل-كۇي ۇستەدى.
تاعى ءبىر ايتا كەتەتىن جايت, ءراسىم كەزىندە اتا-انالار ۇلدارىنىڭ مەرزىمدى اسكەري قىزمەتتەرىن وتكەرگەن سوڭ ەلىمىزدەگى جوعارى وقۋ ورىندارىنىڭ بىرىنە گرانتقا ۇمىتكەر بولا الاتىنىن ءبىلدى.
مەرەكەلىك ءىس-شارا اياقتالعان سوڭ العاش رەت ساربازدارعا جاقىندارىمەن بىرگە قالاعا سەرۋەندەپ كەلۋگە رۇقسات بەرىلدى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
