تاسقىننان كەيىن قۇرىلىس ارتادى

وبلىستىق قۇرىلىس باسقارماسىنىڭ باسشىسى الىبەك انتازيەۆتىڭ ايتۋىنشا, تابيعات اپاتى كەزىندە قاراتوبە اۋدانىندا – 116, سىرىم اۋدانىندا – 243, بورلىدە – 218, تەرەكتى اۋدانىندا – 649, بايتەرەكتە – 62, تاسقالادا – 6, ورال قالاسىندا 17 ۇيگە سۋ كىرگەن ەكەن. وسىنىڭ ىشىندە 1 150 ۇيگە ارنايى كوميسسيا بارىپ, تەحنيكالىق تەكسەرىس جۇرگىزىلگەن. تەكسەرىس ناتيجەسىندە 413 ءۇي ودان ءارى تۇرۋعا جارامسىز دەپ تانىلعان. ياعني قاراتوبە اۋدانىندا – 90, سىرىمدا – 114, تەرەكتىدە – 81, بايتەرەكتە – 7, ءبورلى اۋدانىندا 121 ءۇي جاڭادان سالىناتىن بولدى. ايتا كەتەيىك, باسپاناسى تاسقىننان زارداپ شەككەن تۇرعىنداردىڭ ءوتىنىشى ءالى دە ءتۇسىپ جاتىر. سوندىقتان قۇرىلىس اۋقىمى بۇدان كوبىرەك بولۋى مۇمكىن.

– جاڭادان سالىناتىن تۇرعىن ۇيلەر ورتالىق مەم­لەكەتتىك ورگان بەكىتكەن ۇلگى جوبا بويىنشا سالىنادى. قا­زىر ءبىزدىڭ قولىمىزدا ەكى ەسكيز­دىك جوبا بار. ياعني جاڭا ۇيلەر 3 بولمەلى, جالپى اۋماعى 80 شارشى مەتر بولماق. ءبىر پاتەرلى جەكە تۇرعىن ءۇي جانە ەكى پاتەرلى 160 مەترلىك تۇرعىن ءۇي سالىنادى. بۇل ۇيلەردىڭ بار­لىق ينجەنەرلىك جەلىسى قو­سىلعان, بىردەن كىرىپ, تۇرا بەرۋ­گە دايىن بولادى. ءبىز قازىر ءۇيى سۋعا كەتىپ, دالادا قالعان جەر­لەس­تەرىمىزدى بارىنشا قىس­قا ۋاقىتتا باسپانامەن قامتا­ماسىز ەتۋ ءۇشىن بار كۇشتى سالامىز, – دەدى الىبەك سايىن ۇلى.

قازىر جوعارىدا اتالعان التى اۋداندا دا جارامسىز دەپ تانىلعان تۇرعىن ۇيلەردى قالپىنا كەلتىرۋ بويىنشا قىزۋ جۇمىس باستالدى. ەڭ باستىسى, جاڭا قۇرىلىس سۋ باسپايتىن, قاۋىپسىز جەرگە سالىنادى. بۇل ءۇشىن ارنايى گەولوگيا جانە توپو-ءتۇسىرىلىم جۇمىستارى جۇرگىزىلىپ, جەر ۋچاسكەلەرى انىقتالىپ جاتىر. ءا.انتازيەۆتىڭ ايتۋىنشا, قاراتوبە اۋدانىندا – «سترويكونسالتينگ» جشس, سىرىم اۋدانىندا –«Shine Project» جشس, تەرەكتى اۋدانىندا – «Smاrtech» جشس, ءبورلى اۋدانىندا «ەۆروپليۋس» سەكىلدى فيرمالار ۇلگى جوبا نەگىزىندە بايلام جاساۋعا كىرىسىپ تە كەتكەن. سونىمەن قاتار ءۇي قۇرىلىسىمەن اينالىساتىن جەرگىلىكتى مەردىگەر ۇيىمداردىڭ تىزبەسى دە ءازىر كورىنەدى. تەرەكتى اۋدانىنىڭ پودستەپنوە كەنتىندە قيراعان ۇيلەردىڭ ورنى تازارتىلىپ, ىرگەتاس قۇيىلا باستاعان.

بۇعان قوسا جاقىندا «قازاق­­ستان حالقىنا» قوعام­دىق قورى مەن باتىس قازاق­ستان وبلىسىنىڭ اكىمدىگى مەمو­راندۋمعا قول قويىپ, سىرىم اۋدانىندا سۋ تاسقىنىنان زارداپ شەككەن وتباسىلار ءۇشىن تۇرعىن ءۇي سالۋ تۋرالى كەلىسكەن ەدى. بۇل مەموراندۋم اياسىندا قور قاراجاتى ەسەبى­نەن جىمپيتى اۋلىندا – 49 ءۇي, بۇلدىرتى اۋلىندا – 25 ءۇي, ولەڭتى اۋلىندا – 38 ءۇي, جەتىكول اۋلىندا – 1 ءۇي, جاڭاقونىس اۋلىندا 1 ءۇي سالىناتىن بولدى.

ال وزگە اۋداندارداعى جارامسىز ۇيلەردى قاراشىعاناق پەترولەۋم وپەرەيتينگ ب.ۆ. كومپانياسى, جەرگىلىكتى بيزنەس وكىلدەرى جيناعان جانە قايىرىمدىلىق قورلارىنان تۇسكەن قاراجات ەسەبىنەن سالۋ جوسپارلانعان.

مەملەكەت باسشىسى جاڭا تۇرعىن ۇيلەردىڭ قۇرى­لى­سى جىلىتۋ ماۋسىمىنا دەيىن اياقتالۋىن قاتاڭ تاپسىر­دى. قازىر بۇل ماسەلە – وب­لىس اكىم­دىگىنىڭ جەكە باقىلاۋىندا.

باتىس قازاقستان وبلىسى