جەرگىلىكتى جۇرتپەن توننىڭ ىشكى باۋىنداي ارالاسىپ كەتكەن دۇنگەن جۇرتى قازاقى ءداستۇردى بەرىك ۇستانادى. ۇلىستىڭ ۇلى كۇنى ناۋرىز مەرەكەسىن قازاق حالقىمەن بىرگە تويلاتىپ جاتاتىندارى دا بار. ەڭ باستىسى, ولاردىڭ باسىم كوپشىلىگى مەملەكەتتىك ءتىلدى مەڭگەرۋگە تالپىنىپ, تالاپتانىپ ءجۇر. ءتىپتى قازاق ءتىلىن بىزدەن ءبىر مىسقال كەم بىلمەيتىندەرى دە بار.
اسىرەسە ماسانشى اۋىلىن مەكەندەگەن دۇنگەن وكىلدەرىنىڭ باسىم كوپشىلىگى مەملەكەتتىك ءتىلدى ءبىر كىسىدەي مەڭگەرگەن. ولار جەرگىلىكتى ۇلت وكىلدەرىمەن قازاق تىلىندە ەركىن تىلدەسەدى. سولاردىڭ ءبىرى – مەملەكەتتىك ءتىلدى جەرگىلىكتى مەكتەپ وقۋشىلارىنا دا ۇيرەتىپ, وقىتىپ جۇرگەن دۇنگەن قىزى ششەحۋار مۋساروۆا.
ششەحۋاردىڭ ايتۋىنشا, مەملەكەتتىك تىلگە دەگەن قۇرمەت ونىڭ قازاق ءتىلى مەن ادەبيەتى ءپانىنىڭ مۇعالىمى بولۋىنا ىقپال ەتكەن. سودان دا بولسا كەرەك, ماسانشى اۋىلىنداعى مەكتەپتە 12 جىل بويى قازاق ءتىلى مەن ادەبيەتى ءپانىنىڭ مۇعالىمى بولىپ قىزمەت اتقارىپ ءجۇر.
«اۋەلى قوردايداعى «بەرەكە» كوللەدجىندە ارناۋلى ورتا ءبىلىم الدىم. كەيىننەن تاراز قالاسىنداعى بۇرىنعى جامبىل گۋمانيتارلىق ۋنيۆەرسيتەتىندە وقۋىمدى جالعاستىرىپ, قازاق ءتىلى مەن ادەبيەتى ءپانىنىڭ مۇعالىمى مامانى اتاندىم. مەن ءۇشىن وقۋشىلارمەن جۇمىس ىستەگەن وتە قىزىق. ءار بالانىڭ بويىندا مەملەكەتتىك ءتىلدى مەڭگەرۋگە دەگەن قۇلشىنىس جوعارى. مۇنىڭ ءوزى ەتنوس وكىلدەرىنىڭ جەرگىلىكتى حالىققا دەگەن قۇرمەتىن ايقىنداپ تۇرسا كەرەك. قازىرگى كەزدە ءال-فارابي اتىنداعى №50 مەكتەپتە 5, 10-سىنىپ وقۋشىلارىنا, باستاۋىش سىنىپ ءبىلىم الۋشىلارىنا ساباق بەرەمىن. بولاشاق ۇرپاقتىڭ ساناسىنا ءبىلىم ءنارىن سەۋىپ جۇرگەنىمدى ماقتان تۇتامىن. وقۋشىلارىمنىڭ قازاق ءتىلىن ۇيرەنۋگە دەگەن قۇلشىنىسى مەنى كادىمگىدەي قاناتتاندىرادى. سوندىقتان دا بار بىلگەنىمدى ۇيرەتۋگە كۇش سالامىن», دەيدى شش.مۋساروۆا.
دۇنگەن ەتنوسى كوپ شوعىرلانعان اۋىلدا ەڭبەك ەتىپ جۇرگەن ول باستاپقىدا تالىمگەر رەتىندە جۇمىس ىستەپتى. كەيىننەن جەرگىلىكتى بالالاردى قازاق تىلىنە باۋلۋ ماقساتىندا قازاق ءتىلى مەن ادەبيەتى ءپانىنىڭ مۇعالىمى رەتىندە ىسكە كىرىسكەن.
قازاقستان مەن قىرعىز رەسپۋبليكاسىنىڭ شەكاراسىندا تۇرعان قورداي اۋدانىندا قازاق حالقىنان كەيىن دۇنگەن ۇلتىنىڭ وكىلدەرى تىعىز شوعىرلانعان. ولار قازىرگى كەزدە جەرگىلىكتى ۇلتپەن بىتە قايناسىپ, تاتۋ-ءتاتتى عۇمىر كەشىپ جاتىر. بىرلىك پەن دوستىقتى, تاتۋلىقتى بارىنەن بيىك قويعان دۇنگەندەردىڭ قازاقتارعا دەگەن قۇرمەتى بولەك.
«مەملەكەت باسشىسى قازاق ءتىلى بولاشاقتا ەتنوسارالىق قاتىناس تىلىنە اينالاتىنىن ايتتى. شىنى كەرەك, قازاق دالاسىندا دۇنيەگە كەلىپ, كيەلى توپىراعىندا ءوسىپ-ونگەننەن كەيىن مەملەكەتتىك ءتىلدى ءبىلۋ پارىزىم دەپ ەسەپتەيمىن. ويتكەنى قاي قالاعا بارساق تا, قانداي قىزمەتكە تاۋەلدى بولساق تا, قازاق ءتىلىن بىلۋگە ءتيىسپىز. مەملەكەتتىك تىلدە ەركىن سويلەپ, ءوز ويىمىزدى ايقىن ءبىلدىرۋىمىز كەرەك. بىرلىك بار جەردە بەرەكەنىڭ ارتاتىنى انىق. بۇل – دالەلدەۋدى قاجەت ەتپەيتىن اكسيوما. تاتۋلىق پەن دوستىق قاي كەزدە دە بارىنەن بيىك تۇرادى. جانى جايساڭ ازاماتتار قونىستانعان جامبىل وبلىسىندا بىرلىك پەن بەرەكەلى تىرلىكتىڭ ارقاسىندا جانعا جايلى عۇمىر كەشىپ جاتىرمىز. دوستىقتان اسقان قۇندىلىق جوق. كەز كەلگەن ازامات وسىنى ەسىنەن شىعارماسا ەكەن دەگەن تىلەگىم بار. جۇدىرىقتاي جۇمىلعان ەلدىڭ باعىندىرمايتىن بەلەسى, المايتىن اسۋى بولمايدى», دەيدى شش.گۋساروۆا اعىنان جارىلىپ.
ماسانشى اۋىلىنداعى مەكتەپتە ەڭبەك ەتەتىن وزگە ۇلت وكىلدەرىنىڭ قازاق تىلىنە دەگەن قۇرمەتى بولەك. ولاردىڭ ءبىرى جەرگىلىكتى ءبىلىم ورداسىندا ساباق بەرىپ جۇرسە, ەندى ءبىرى بالاباقشاداعى دۇنگەن بالالارىنا مەملەكەتتىك ءتىلدى ۇيرەتۋدەن جالىققان ەمەس.
جامبىل وبلىسى,
قورداي اۋدانى
