– بيىل اۋداندا ءۇي كەزەگىندە تۇرعان ازاماتتاردى جانە «قالادان – اۋىلعا» باعدارلاماسىنا نيەت بىلدىرگەن وتباسىلاردى تۇرعىن ۇيمەن قامتاماسىز ەتۋ ماقساتىندا اۋدانىمىزدا 115 باسپانا سالىنىپ جاتىر. ياعني اۋدانداعى 27 ەلدى مەكەندە جاڭا باسپانا سالىنادى, – دەيدى قازتالوۆ اۋدانىنىڭ اكىمى اسلانبەك سارقۇلوۆ.
جەرگىلىكتى باسپاناعا مۇقتاج تۇرعىنداردى جانە ەلگە كەلگەن جاس مامانداردى تۇرعىن ۇيمەن قامتاماسىز ەتۋ ءۇشىن بىلتىر بيۋدجەت قارجىسىنا 22 تۇرعىن ءۇي ساتىپ الىنعان ەكەن. سونىڭ تورتەۋى جاڭادان سالىنعان. سونىمەن قاتار جىل باسىندا اۋدان ورتالىعىنا كەلگەن 6 دارىگەر دە جاڭا تۇرعىن ۇيمەن قامتاماسىز ەتىلگەن. اكىمنىڭ ايتۋىنشا, قازىرگى تاڭدا اۋدان بويىنشا 511 ازامات ءۇي كەزەگىندە تۇر.
اۋداندا جاڭا ءۇي سالۋ جوباسىنا اتسالىسۋعا جەكە تۇلعالار, كاسىپكەرلەر, شارۋا قوجالىق جەتەكشىلەرى نيەت ءبىلدىرىپ وتىر. قازىردىڭ وزىندە قازتالوۆ اۋىلىندا رۋسلان راحمەتوۆ قوس پاتەرلى تۇرعىن ءۇي قۇرىلىسىن باستاپ كەتكەن.
«وڭىردە وبلىس اكىمى ناريمان تورەعالي ۇلىنىڭ باستاماسىمەن «قالادان – اۋىلعا» اتتى جوبا جۇزەگە اسىپ جاتىر. وسى جوبا اياسىندا اۋدانىمىزدىڭ 8 ەلدى مەكەنىنە 16 وتباسىن كوشىرىپ اكەلۋ جوسپارلاندى. جاڭا جىلدىڭ باسىندا ورال قالاسىنان سيسەنوۆتەر وتباسىن كوشىرىپ اكەلدىك. ولار بولاشاق اۋىلدىق وكرۋگىنىڭ جاڭاتاڭ ەلدى مەكەنىنە ورنالاستى, باسپانامەن, تۇراقتى جۇمىسپەن قامتىلدى», دەيدى اۋدان باسشىسى.
جاڭا تۇرعىن ۇيلەردىڭ قۇرىلىسى – قازىر اۋداندا ەرەكشە نازاردا تۇرعان ماسەلە. وكرۋگ اكىمدەرى مەن ءبولىم باسشىلارى جوبا اياسىندا سالىناتىن باسپانالاردىڭ مەردىگەرىن ناقتىلاپ, قۇرىلىس قارقىنىن قاداعالاپ وتىر. سونىمەن قاتار تۇرعىن ۇيلەردىڭ بەكىتىلگەن تالاپقا ساي بولۋى, ساپاسى دا – ءاردايىم نازاردا.
باتىس قازاقستان وبلىسى
