فوتو: gov.kz
«بيىلعى سۋ تاسقىنى قازاقستان تاۋەلسىزدىك العالى ونىنشى ءىرى سۋ تاسقىنىنا جاتادى. الايدا وسى كەزگە دەيىن سۋ تاسقىنىنىڭ الدىن الماعانى نەمەسە سالعىرتتىق تانىتىپ, جول بەرگەنى ءۇشىن ەشبىر جوعارى لاۋازىمدى تۇلعا جاۋاپكەرشىلىككە تارتىلماعان. بۇل جەردە مەن جەرگىلىكتى اتقارۋشى ورگاننىڭ, ياعني اكىمدەردىڭ جاۋاپكەرشىلىگى تۋرالى ايتىپ وتىرمىن. نەگە جەرگىلىكتى اتقارۋشى ورگان؟ ويتكەنى وزەن بويىنداعى سۋ جايىلمالارىنان جەر بەرگەن, ساياجايلاردى ءىس جۇزىندە تۇرعىن ۇيگە اينالدىرعان, ياعني جارىق, گاز تارتىپ, ازاماتتاردى تۇراقتى تىركەۋگە رۇقسات بەرگەن, ول ۇكىمەت ەمەس, باسقا ەمەس, جەرگىلىكتى اتقارۋشى ورگان, ياعني اكىمدىكتەر. ال كەلتىرىلگەن شىعىنداردى وتەۋ سالماعى اركەز مەملەكەت موينىنا ارتىلادى», دەدى ابزال قۇسپان.
ماجىلىسمەن سۋ تاسقىنىنا بايلانىستى مامانداردىڭ بولجامىن ەلەمەگەن جەرگىلىكتى اتقارۋشى ورگاندار تاسقىن تاقاعاندا دۇربەلەڭگە سالىنعانىن ايتتى. دەپۋتات كىنالىلەردى جازاعا تارتۋدى ۇسىندى.
«ابدەن تاقاعاندا جەرگىلىكتى اتقارۋشى ورگان دۇربەلەڭگە سالىنىپ, بۇكىل ەلدى دۇرلىكتىرىپ, جان-جاقتان تەحنيكا مەن ەرىكتىلەردى الدىرتتى, سۋ دەڭگەيى 10 مەتردەن اسىپ كەتەدى دەپ بوگەتتەر تۇرعىزدى. ادامداردى شۇعىل ەۆاكۋاتسيالادى, قازاقستاندى ايتپاعاندا شەتەلدەن گۋمانيتارلىق كومەكتەر الدىردى. ناتيجەسىندە كەلگەن سۋدىڭ ماكسيمالدى دەڭگەيى 8 مەتر 64 سم قۇراعانىن كورىپ وتىرمىز. بۇل سالعىرتتىققا جانە كەلگەن شىعىندار ءۇشىن جاۋاپتى شەنەۋنىكتەر زاڭ الدىندا جاۋاپ بەرۋگە ءتيىس», دەدى دەپۋتات.
حالىق قالاۋلىسى ورال دا 2011 جىلى سۋعا كەتسە دە تاعى سول اۋماقتان ۋچاسكە بەرىلگەنىن سىنادى.
«تولىقتاي سۋعا كەتكەن «نۇرلى جەر» اۋدانىنىڭ سحەماسى وتە قارابايىر, بىراق ول ونداعان جىلدار بويى ەش كەدەرگىسىز جۇمىس جاساپ جاتىر, اكىمدىككە جاقىن پىسىقتار مەن پىسىقايلار گەكتارلاپ تەگىن جەر الىپ الادى دا, قارا حالىققا ون سوتىقتان ءبولىپ ساتادى, بولدى. ناتيجەسىندە, جەرگىلىكتى اكىمدىك قىزمەتكەرلەرى سول جەردى ءبولۋ مەن بەرۋدىڭ «قىزىعىن» كورەدى, قاراپايىم حالىق زاردابىن تارتادى, ال بارلىق شىعىندى مەملەكەت ءوز موينىنا الادى. وتىز جىلعى ەسكى سحەما قاشانعى جالعاسا بەرمەك؟!», دەدى ءماجىلىس دەپۋتاتى ابزال قۇسپان.
