تۇتىنۋشى سۇرانىسىن تولىقتاي قامتاماسىز ەتەمىز

ۇدەمەلى يندۋستريالىق-يننو­ۆاتسيالىق دامۋ باعدارلاماسى اياسىندا وتاندىق وندىرىستىك بۋىندار قاتارىنىڭ تولىعۋى ەلىمىزدىڭ الەۋمەتتىك-ەكونوميكالىق جا­ڭارۋلار تىنىسىنا تىڭنان لەپ قوسىپ, حالىقتىڭ ءال-اۋقاتىن جاقسارتۋعا ۇلكەن ىقپال ەتىپ وتىر­عانىن ايتۋ ءلازىم. وتپەلى كەزەڭ تۇسىندا ەلىمىزدەگى جەڭىل ونەر­كاسىپ سالالارى اقساپ قالعا­نى, قازاقستاننىڭ ءاربىر ءىرى قالا­­لارىندا جۇمىس ىستەپ تۇر­عان تىگىن فابريكالارى جابىلىپ, ولاردىڭ عيماراتتارى, تەح­ني­كالىق قۇرال-جابدىقتارى مەن مۇلكى تالان-تاراجعا ءتۇسىپ, قانشاما قىز-كەلىنشەكتەرىمىز, تاجىريبەلى تىگىنشى اپا-اپكەلەرىمىز جۇمىسسىز قالعان ەدى. قۇدايعا شۇكىر, حالقىمىزدىڭ «ورنىندا بار وڭالار» دەگەن اتالى ءسوزى ەس جيىپ, ەڭسە كوتەرۋىمىزگە سەپ بولعانداي, مىنە, وتاندىق جەڭىل ونەركاسىپ سالاسىنا تاعى ءبىر جاڭا فابريكا كەلىپ قوسىلدى. «قازاقستاننىڭ جاڭا يندۋس­ترياسى: 2014 جانە العاشقى بەسجىلدىق جەتىستىكتەرى» دەپ اتالاتىن تەلەكوپىر بارىسىندا ءبىزدىڭ جاس كاسىپورىننىڭ ىسكە قوسىلۋى, ونىڭ العاشقى قادامىن ەلباسى نۇرسۇلتان نازارباەۆتىڭ ءوزى جاساتۋى – ءبىزدىڭ كاسىپورىن ءۇشىن جانە قىزمەتكەرلەرىمىز ءۇشىن ۇلكەن ماقتانىش, رۋحاني دەمەۋ. سوندىقتان دا, ءبىز مەملەكەتىمىز سەنىپ تاپسىرىپ وتىرعان جاۋاپ­كەرشىلىك ۇدەسىنەن شىعامىز دەپ, ەل دامۋىنا ازاماتتىق ۇلەسىمىزدى قوسامىز دەپ شىنايى كوڭىلىمدى جەتكىزگىم كەلەدى. وتاندىق جەڭىل ونەركاسىپتىڭ دامۋى تەك ەكونوميكالىق ەمەس, الەۋمەتتىك سالانىڭ دا ىلگەرى باس­ۋىنا زور ىقپال ەتەدى. ءبىز ءونىمنىڭ مول ءتۇرىن شىعاراتىن بولامىز. بۇل ىشكى نارىقتى ساپاسى جوعارى وتاندىق وندىرىستەگى ماتالارمەن قامتاماسىز ەتۋگە مۇمكىندىك بەرەدى. تىگىن فابريكاسىندا نەگىزىنەن ءوزىمىزدىڭ قىز-كەلىنشەكتەر جۇمىس ىستەيتىن بولعاندىقتان, جاڭا كاسىپورىنداعى 200 جۇمىسكەردىڭ 80 پايىزى ايەلدەر ەكەنىن ايتىپ وتكىم كەلەدى. كەلەشەكتە ءبىز ءوز ونىمدەرىمىزبەن ەل اۋماعىن قامتي وتىرىپ, ساپالى ءارى زامانعا ساي كيىم-كەشەكتەردى الىس-جاقىن شەت­ەلدەرگە دە شىعاراتىن بولامىز. مەملەكەت باسشىسى نۇرسۇل­تان نازارباەۆتىڭ تاپسىرماسىمەن جانە ارنايى باقىلاۋىمەن ەلىمىزدە جۇرگىزىلىپ وتىرعان ۇدەمەلى يندۋستريالىق-يننوۆا­تسيالىق باعدارلامانىڭ ءتيىم­دى ناتيجەسىنىڭ ارقاسىندا قازاق­ستاننىڭ ءار ايماعىندا جاڭا كاسىپورىندار مەن زامان تالابىنا ساي زاۋىتتار, فابريكالار بوي كوتەرىپ, مىڭداعان ازاماتتارىمىزدى جۇمىس ورىندارىمەن قامتىپ وتىرعانى بەلگىلى. «باسىم بولىگى ايەلدەر جۇمىس ىستەيتىن تىگىن فاب­ريكاسى تەك قانا وندىرىستىك ەمەس, سونىمەن بىرگە الەۋمەتتىك ماڭىز­دى جوبا», دەپ مەملەكەت باسشى­سى جەڭىل ونەركاسىپتىڭ وسى ءبىر سالا­سىنىڭ ماڭىزىنا ەرەكشە كوڭىل بولگەنى ءالى كۇنگە ەسىمىزدە. وسى وراي­دا, ءبىزدىڭ كاسىپورىن دا ەل دامۋى­نا, ەكونوميكامىزدىڭ تۇراق­تى­لىعىنا قىزمەت ەتىپ, ءوز ۇلەسىن قوسادى دەپ سەنىممەن ايتا الامىز. ەلىمىزدەگى سان-سالالى زاۋىتتار, وندىرىستىك كاسىپورىندار مەن ءتۇرلى تەحنيكالىق قىزمەت كورسەتۋ ورىندارىنان تۇسەتىن تاپسىرىستارعا سايكەس تىگىلەتىن ارناۋلى جۇمىس كيىمدەرىن دە تىگۋمەن قاتار, ءبىزدىڭ فابريكا تۇرعىنداردىڭ تالاپ-تالعامىنا ساي زاماناۋي ۇلگىدەگى ءساندى كيىم تۇرلەرىن دە شىعارادى. قازاقستاندىق مازمۇنداعى ۇلەس-سالماعى 80 پايىزدان اسقان ونىمدەرىمىزدىڭ وتىمدىلىگىن ءوسىرۋ ءۇشىن ساپا, فاب­ريكا قابىرعاسىندا ديزاين زەرتحاناسى قۇرىلدى. يننوۆاتسيالىق كونسترۋكتورلىق بيۋرو جۇمىس ىستەيدى. ءىستىڭ ءبارى وسى زامانعى وزىق تەحنولوگيالىق قوندىرعىلار ارقىلى اتقارىلادى. وندىرىستىك مۇمكىندىكتەردى كەڭەيتۋ ارقاسىندا 200 جاڭا جۇمىس ورنى قۇرىلدى. تۇتىنۋشى تالابىن تولىقتاي قامتاماسىز ەتەتىن ىسمەر ماماندار سانىن ارتتىرۋ ءۇشىن سەرىكتەستىك جانىنان اشىلعان قىسقا مەرزىمدى قايتا دايارلاۋ توپتارىن اشىپ, ءوزىمىزدىڭ جاس قىزدارىمىزدى, قولىنان ءىس كەلەتىن كەلىنشەكتەردى تاجىريبەلىك تۇرعىدا وقىتىپ, بىلىكتىلىگىن ارتتىرىپ جاتىرمىز. «ساۋلە» تىگىن-ماتا فابريكاسى – ەلىمىزدەگى ماتا وڭدەۋ جانە كيىم تىگۋ ىسىندەگى بىردەن-ءبىر الدىڭعى قاتارلى وزىق تەحنولوگيامەن قامتىلعان فابريكا. سونداي-اق, الداعى كۇندەردە ءبىزدىڭ ءونىمىمىز ەڭ ساپالى بۇيىمدارىمەن, ءساندى دە قونىمدى كيىم-كەشەكتەرىمەن ىشكى نارىق پەن وتانداستارىمىزدىڭ تالابىن تولىق قامتاماسىز ەتە الاتىن بولادى. وعان ءبىزدىڭ كۇش-جىگەرىمىز دە, باسەكەلەستىككە دەگەن قابىلەتىمىز دە تولىق جەتەتىندىگىنە سەنىمىمىز زور. داۋرەن الىمبەكوۆ, «ساۋلە» ماتا-تىگىن فابريكاسىنىڭ ديرەكتورى.                           الماتى.