وبلىستى ءبىر اي بويى ابىگەرگە سالعان تاسقىن كەزىندە بارلىعى 1 311 تۇرعىن ءۇي, 15 166 ساياجاي ءۇيى سۋعا كەتكەنى بەلگىلى بولدى. قازىردىڭ وزىندە جەرگىلىكتى جولداردىڭ 15 بولىگى ءب ۇلىنىپ, تەرەكتى اۋدانىندا اقسوعىم, اقجايىق اۋدانىندا تاسوبا اۋىلدارى قاتىناسسىز قالدى.
سۋ تاسقىنى باستالعالى بەرى وڭىردە 14 019 ادام قاۋىپسىز جەرگە كوشىرىلگەن بولسا, سونىڭ 5 793-ءى – بالا ەدى. ولاردىڭ ءبىرازى قازىر تۇرعىلىقتى جەرىنە قايتقانىمەن, ەۆاكۋاتسيالىق بەكەتتەردە ءالى دە 2 428 ادام تۇرىپ جاتىر. سونداي-اق 5 078 باس مال دا قاۋىپسىز جەرگە ايدالىپ, امان قالدى.
ءساۋىر ايىنىڭ 5-ىنەن باستاپ كەلە باستاعان گۋمانيتارلىق كومەكتىڭ كولەمى 29 ساۋىردە 1 240,4 تونناعا جەتتى.
جايىق وزەنىندە سۋ دەڭگەيى كۇرت كوتەرىلگەن كەزدە وعان قۇياتىن شاعان وزەنىنىڭ اعىسى توقتاپ, العا جۇرە الماي قالدى. قازىر شاعان سۋ قويماسى 169,11% تولىپ تۇر. وزەن جايىلماسىنداعى ساياجايلار سۋدا تۇر. 28 ساۋىردە جايىق دەڭگەيى – 5 سم, 29 ساۋىردە 8 سم-گە ءتۇسىپ, قاۋىپتى دەڭگەيدەن اقىرىن تومەندەي باستادى.
كەيىنگى جىلدارى باتىس قازاقستان وبلىسىنىڭ وڭتۇستىك اۋداندارى قۋاڭشىلىق سالدارىنان قيىندىق كورىپ جۇرگەن ەدى. جايىقتىڭ تاسقىن سۋىن وسى وڭىرگە بۇرۋ ماسەلەسى دە شەشىمىن تاۋىپ جاتىر. مىسالى, جاڭاقالا اۋدانى اۋماعى نەگىزىنەن سارىوزەن, قاراوزەن, كوشىم ارناسى ارقىلى سۋ الاتىن. بيىل وڭىرگە سۋ جاقسى كەلدى.
– جاڭاقالا اۋدانىندا 48 مىڭنان اسا كولتابان, 426,67 كم كانال, 18 كول, 3 وزەن, 2 سۋ قويماسى بار. 2023 جىلى 22 180 گا كولتابانعا سۋ شىعارىلدى, سۋ كولەمى 85 393 ملن شارشى مەتر بولدى. اۋدان كولەمىندەگى سوركول, جالتىركول, ەدىلسور, ورىسقوپا, قيسىق-قامىس, بىرقازان, قاندىكول, ايدىن, سارى ايدىن, سۋلىكول كولدەرىنە, قامىس سامار جايماسىنا سۋ الىندى. قاراقۇدىق كانالىنىڭ 28 شاقىرىمىنا مەحانيكالىق تازارتۋ جۇمىسى جۇرگىزىلىپ, 4 قاقپا جوندەلدى. بيىل دا سارىوزەن, قاراوزەن جانە كوشىم ارناسى ارقىلى وزەن-كولدەرگە, كانالدارعا, كولتاباندارعا سۋ شىعارۋ جۇمىسى قىزۋ ءجۇرىپ جاتىر, – دەيدى جاڭاقالا اۋدانىنىڭ اكىمى الپامىس كوشكىنباەۆ.
اۋدان كولەمىندەگى سۋ ارناسىنىڭ جالپى ۇزىندىعى 426,67 شاقىرىم ەكەنىن ايتتىق. وسى ارنالاردىڭ 175 شاقىرىمى قازسۋشار مەكەمەسىنە قاراسا, قالعان 251,6 كم اۋدان تەڭگەرىمىندە تۇر. سۋدى رەتتەگىش قاقپا سانى – 112.
بيىلعى جاعىمدى جاڭالىق سول, كوشىم ارناسىنىڭ ساعاسىنداعى سوركول, جالتىركول, ەدىلسور, ورىسقوپا, قيسىققامىس, قاندىكول ت.ب كولدەرگە, قاراوزەن, سارىوزەن بويىنداعى ايدىن, سارىايدىن, پاۆەلكولى, قاڭباقتى, قاشقار كولدەرىنە, قامىس سامار جايىلمالارىنا سۋ بەرىلىپ, كەۋىپ قالعان كولدەر قايتادان جاندانا باستاعان. مىنە, تاسقىن سۋ ءبىر جاعىنان ءتىلسىز جاۋ بولسا, ول سۋدى قاجەتتى ارناعا بۇرىپ, ساقتاپ قالساق, ەل مەن جەردىڭ ىرىسى بولعالى تۇر.
باتىس قازاقستان وبلىسى
