ولاردىڭ اراسىندا تۋىستىق قاتىناس قۇرىپ, ءبىر وتباسى بولعاندارى كوپ-اق. سولاردىڭ ءبىرى – 6698 اسكەري بولىمىندە قىزمەت اتقارىپ جۇرگەن تاجىك ۇلتىنىڭ وكىلى, اعا سەرجانت حامزا شاكاروۆ. ونىڭ وتباسىندا وزگە ۇلتپەن تۋىسقان بولعان ءوزى عانا ەمەس, ءىنىسى دە بار, ول نەمىس ۇلتىمەن ارالاس وزبەك قىزىن وزىنە جار ەتكەن. سوندىقتان دا بۇل وتباسىن بىرلىگى مەن بەرەكەسى جاراسقان وتباسى دەۋگە بولادى.
اعا سەرجانت حامزا شاكاروۆ جەتىساي اۋدانىندا دۇنيەگە كەلگەن. وتباسىندا ءىنىسى, اعاسى, قارىنداسى بار. اتاسىنىڭ ايتۋىنشا, اتا-باباسى وزبەكستاننىڭ جيزاق دەگەن قالاسىندا تۇرعان. سوعىستان كەيىن, 50-جىلدارى قازاقستاننىڭ جەتىساي اۋدانىنا قونىس اۋدارعان. 1999 جىلى ۆ.تەرەشكوۆا اتىنداعى ورتا مەكتەپتى اياقتاپ, 2000 جىلى تالدىقورعان قالاسىنداعى قورعانىس مينيسترلىگىنە قاراستى 18404 اسكەري بولىمىندە مەرزىمدىك اسكەري قىزمەتىن وتەيدى. ال 2006 جىلى شىمكەنت قالاسىنداعى 6506 اسكەري ءبولىمىنىڭ اتقىشتار باتالونىندا كەلىسىمشارت بويىنشا قىزمەتىن بولىمشە كومانديرى بولىپ باستايدى. كەيىننەن قاراۋىل باستىعىنىڭ كومەكشىسى, كۇزەتتىڭ ينجەنەرلىك-تەحنيكالىق قۇرالدارى مامانى قىزمەتىنە اۋىسادى. تۋرا ءبىر جىلدان كەيىن, 2007 جىلى جارى ۇلجانمەن تانىسادى. ءومىرىن ونەرمەن بايلانىستىرعان سكريپكاشى قازاق قىزىمەن تانىستىعى ۇلكەن ماحابباتقا ۇلاسىپ, 2008 جىلى وتباسىن قۇرادى.
«العاشىندا ۇلتىمىزدىڭ ءارتۇرلى بولۋىنا بايلانىستى ارقايسىسىمىزدىڭ اتا-انامىز ۇيلەنۋىمىزگە قارسى بولعانى راس. الايدا ءبىر-بىرىمىزگە دەگەن سەنىم مەن ماحابباتىمىز ءبارىن جەڭدى. اتا-انامىز باتالارىن بەرىپ, 2008 جىلى باس قوستىق. ءبىز سالت-داستۇرگە كەلگەندە بولىنبەيمىز, باستىسى – ءدىنىمىز, سەنىمىمىز ءبىر, ەكى ۇلتتىڭ دا جورالعىلارىن جاساپ, سىيلاستىقپەن قاراپ, تاتۋ-ءتاتتى ءومىر ءسۇرىپ كەلەمىز. ۇلجاننىڭ ۇيىندە قازاقتىڭ سالتىن جاساساق, ۇيىمىزدە تاجىك حالقىنىڭ ءداستۇرىن ۇستانامىز», دەيدى حامزا. بۇگىندە بىرلىگى جاراسقان شاڭىراقتا ايرۋزا, كاۋسار, دىنمۇحامەد ەسىمدى ۇل-قىزدار ءوسىپ كەلەدى. وتباسىنىڭ بارلىق مۇشەسى تاجىك, قازاق تىلىندە ەركىن سويلەپ, قاتىناس جاسايدى.
«تاجىك جانە قازاق تىلىندە ەركىن سويلەسە بەرەمىز. ۇلكەن قىزىما قازاقشا «اي», تاجىكشە «رۋز» دەگەن سوزدەردەن قۇرالعان اي مەن كۇن دەگەن ماعىنانى بىلدىرەتىن ايرۋزا ەسىمىن بەردىك. ال ۇلىمىزدىڭ ەسىمىن ەلىمىزدىڭ ءوسىپ-وركەندەۋىنە ۇلكەن ۇلەس قوسقان تاريحي تۇلعا قوناەۆ اتامىزدىڭ قۇرمەتىنە, سول كىسىدەي ەلگە قىزمەت ەتسىن دەپ دىنمۇحامەد دەپ اتادىق», دەيدى جارى ۇلجان.
وتباسىنىڭ بىرلىگى – سەنىم مەن سىيلاستىقتىڭ ۇلگىسى. سان ءتۇرلى ەتنوس وكىلىنە سايا بولعان كەڭ-بايتاق جەرىمىزدەگى ىنتىماق, تاتۋلىق, جاناشىرلىق, مەيىرىمدىلىك سەكىلدى اسىل قاسيەتتىڭ جىلدار بويىن جالعاسىپ كەلە جاتقانى دا بىرلىكتىڭ تۋىن بيىك ۇستاۋدان باستالاتىنىن اڭعارتسا كەرەك.
