وقيعا اقتوبەدە 2018 جىلدىڭ 16 ساۋىرىندە بولعان. رىسقالي جۇمىستان ۇيىنە بارا جاتقان كەزدە ماحامبەت كوشەسىندەگى تۇرعىن ۇيلەردىڭ بىرىندە تومەنگى قاباتتاعى تەرەزەنىڭ بىرىنەن قويۋ ءتۇتىن شىعىپ جاتقانىن كورگەن. اسكەري قىزمەتكەر ويلانباستان ءۇيدىڭ ىشىندەگى ادامداردى قۇتقارۋ ءۇشىن جانىپ جاتقان پاتەردىڭ ىشىنە قويىپ كەتەدى.
«كەشكى ساعات التى جارىمدا جۇمىستان شىعىپ, ۇيگە بارا جاتقان ەدىم. بۇل جەردەن كۇندە وتەمىن. سول كۇنى ءۇي جاقتان قالىڭ ءتۇتىن شىعىپ جاتقان تۇرعىن ءۇيدى بايقادىم. جاقىنداي بەرگەندە «كومەكتەسىڭدەر!» دەگەن داۋىستى ەستىدىم. ويلانباستان داۋىس شىققان جاققا قاراي جۇگىردىم. ەكى قاباتتى ۇيدەن ءتۇتىن شىعىپ جاتتى. كورشىلەر پاتەرلەردىڭ بىرىندە مۇگەدەكتىگى بار ادام مەن ەگدە جاستاعى ايەل بار ەكەنىن ايتىپ ۇلگەردى. جۇگىرىپ بارا جاتىپ تاعى ءبىر ەر ادامنىڭ ەكىنشى قاباتتا قالعان بالالارىنا كومەكتەسۋىن سۇرادى. ولاردى تەرەزە ارقىلى تۇسىردىك. بارلىعى بولعان وقيعادان قورقىپ قالعان ەكەن. ابىروي بولعاندا, ادامداردى قاۋىپ قۇشاعىنان شىعارىپ ۇلگەردىك. مۇنداي سىن ساتتە كەز كەلگەن ادام مەنىڭ ارەكەتىمدى ورىنداعان, قايتالاعان بولار ەدى», دەيدى ر.ەڭسەپباەۆ.
ءوز ءومىرىن قاۋىپ-قاتەرگە تىككەن لەيتەنانت جانىپ جاتقان ۇيدەن ەگدە جاستاعى ەكى ادام مەن 2-4 جاستاعى بالالاردى دا الىپ شىققان. ء«تۇتىندى كورگەن بويدا ونداعى ادامداردىڭ اماندىعىن عانا ويلادىم. كورشىلەر ۋاقتىلى ءورت ءسوندىرۋشى قىزمەتكەرلەرىن شاقىردى. باسقا ادامدار دا ۇيلەرىنەن شىعىپ ۇلگەردى. مەن بۇل ءىس-ارەكەتىمنەن ەشقانداي ەرلىك كورىپ تۇرعان جوقپىن», دەيدى كەيىپكەرىمىز.
دەگەنمەن ەفرەيتور رىسقالي ەڭسەپباەۆ انتىنا ادالدىعى ءۇشىن پرەزيدەنتتىڭ جارلىعىمەن «ەرلىگى ءۇشىن» توسبەلگىسىمەن ماراپاتتالىپ, جوعارى باسشىلىقتىڭ قولداۋىمەن اسكەري بولىمدە كادر بولىمشەسىنىڭ باسشىسى لاۋازىمىنا تاعايىندالدى. ال جاقىندا العاشقى «لەيتەنانت» اسكەري شەنىنە قول جەتكىزدى. «بۇل وقيعا ءومىرىمدى تۇبەگەيلى وزگەرتتى دەسەم بولادى. وسىدان كەيىن اعايىن-تۋىس, قارۋلاس دوستار مەن ارىپتەستەر اراسىندا سىي-قۇرمەتىم ءوستى. وفيتسەر اتاندىم, وتباسىمدا دا بارلىعى ويداعىداي. ماراپات ءۇشىن ەمەس, ءوزىمىز ۇلاندىق بولعان سوڭ بورىشىمىزدى اتقارامىز. بۇل – ءبىزدىڭ ومىرلىك تاڭداۋىمىز. سۋ تاسقىنى بولسىن, ءورت بولسىن, ەل ىشىندە قانداي وقيعا بولسىن, ءبىز كومەككە كەلۋگە دايىنبىز», دەيدى اعىنان جارىلعان رىسقالي. اتا-بابامىز «جاقسىلىق ەككەن العىس ورادى» دەپ وسىندايدا ايتسا كەرەك-ءتى.
