قىزىلوردا قالاسىنداعى قورقىت اتا كىتابىنىڭ 1300 جىلدىعىنا ارنالعان ەسكەرتكىش, امانگەلدى يمانوۆ, جانقوجا نۇرمۇحامەد ۇلى ەسكەرتكىشتەرىنىڭ اۋماعىنا تال تىگىلدى. ءجالاڭتوس ءباھادۇر, مۇستافا شوقاي, بۇقارباي باتىر, عاني مۇراتباەۆ, ساياسي قۋعىن-سۇرگىن قۇرباندارىنا ارنالعان مەموريالدى ەسكەرتكىشتەرى مەن س.قوجانوۆ, ى.جاقاەۆ مۇسىندەرى ماڭى تازالاندى.
ارالدىقتار بالىقشىلار مۋزەيىنىڭ اۋلاسىن كوركەيتىپ, ءابدىجامىل نۇرپەيىسوۆ مۋزەيى اۋماعىن تازالادى. قازالى اۋدانىنداعى جانقوجا باتىر كەسەنەسى مەن ع.مۇراتباەۆتىڭ مەموريالدىق مۋزەيىنىڭ اۋماعىندا تازالىق جۇمىسى قارقىندى ءجۇردى. جانكەنت قالاشىعى مەن بەگىم انا مۇناراسى, كەردەرى كەسەنەلەرىنىڭ اۋماقتارى دا اباتتاندىرىلدى. قارماقشىلىقتار تۇركى جۇرتىنا ورتاق قاسيەتتى مەكەن قورقىت اتا ەسكەرتكىش-كەشەنى مەن مارال يشان, قالقاي يشان كەسەنەلەرىنە تازالىق جۇمىستارىن جۇرگىزدى.
جالاعاش اۋدانىندا دا بۇقارباي باتىر, ەكىنشى دۇنيەجۇزىلىك سوعىس قۇرباندارىنا ارنالعان ەسكەرتكىش, تۇمەن اۋليە كەسەنەسىنىڭ ماڭايىن رەتكە كەلتىردى. سىرداريا اۋدانىنىڭ اساناس, قىشقالا قالاشىقتارى مەن قالجان احۋن مەشىت-مەدرەسەسى اۋماعىنداعى يگى باستاماعا تۇرعىندار بەلسەنە اتسالىستى. جاڭاقورعاندىقتار قوراسان اتا كەسەنەسى, سىعاناق قالاشىعى مەن تاريحى تەرەڭ مادەني ەسكەرتكىشتەر اينالاسىن تازارتتى.
«كيەلى مەكەن» اپتالىعى شيەلى اۋدانى قاراتاۋ جوتاسىنىڭ بالا ساۋىسقاندىق شاتقالىنداعى ساۋىسقاندىق پەتروگليفتەرى اۋماعىندا قورىتىندىلانىپ, وعان مادەنيەت, ونەر سالاسىنىڭ قىزمەتكەرلەرى, قوعام بەلسەندىلەرى, ەرىكتىلەر, اۋىل تۇرعىندارى قاتىستى. مىڭداعان جىلدار دەرەگىن جەتكىزگەن پەتروگليفتەر ماڭى تازارتىلىپ, كوشەت وتىرعىزىلدى. اپتالىق كەزىندە وبلىستاعى تاريحي-مادەني نىسانداردا تازالىقپەن قاتار تانىمدىق شارالار ۇيىمداستىرىلدى.
قىزىلوردا
