فوتو: akorda.kz
رەسەيدىڭ قاۋىپسىزدىك كەڭەسى ۇيىمداستىرعان ءىس-شارادا قاۋىپسىزدىك كەڭەستەرىنىڭ حاتشىلارى, ۇلتتىق قاۋىپسىزدىك جونىندەگى كەڭەسشىلەر, الەمنىڭ 106 ەلىنىڭ قۇقىق قورعاۋ جانە ارنايى ورگاندارىنىڭ, قورعانىس ۆەدومستۆولارىنىڭ باسشىلارى, سونداي-اق شىۇ, ۇقشۇ, تمد, اوسشك, اسەان, ەاەو, اراب مەملەكەتتەرى ليگاسى سياقتى حالىقارالىق ۇيىمداردىڭ جەتەكشىلەرى مەن وكىلدەرى باس قوستى.
پلەنارلىق وتىرىستا پوليورتالىققا نەگىزدەلگەن الەمدىك جاعداي قالىپتاستىرۋ جانە حالىقارالىق قاۋىپسىزدىكتىڭ, بەيبىتشىلىك پەن تۇراقتىلىقتىڭ اجىراماس بولىگى سانالاتىن ۇلتتىق بىرەگەيلىكتى ساقتاي وتىرىپ, اقپاراتتىق قاۋىپسىزدىكتى قامتاماسىز ەتۋ ماسەلەلەرى قاراستىرىلدى.
سونىمەن قاتار جيىنعا قاتىسۋشىلار زاڭسىز كوشى-قونعا قارسى تۇرۋ جانە اسكەري قاقتىعىستار, تابيعات اپاتى مەن تەحنوگەندىك سيپاتتاعى توتەنشە جاعدايلار كەزىندە حالىقتى قورعاۋ سالالارىنداعى حالىقارالىق ىنتىماقتاستىق ماسەلەلەرىن تالقىلادى.
قازاقستان رەسپۋبليكاسى قاۋىپسىزدىك كەڭەسىنىڭ حاتشىسى ءوز سوزىندە كيبەرقاۋىپسىزدىككە تونەتىن قاتەردىڭ ارتقانىن, سونىڭ ىشىندە اقپاراتتىق-كوممۋنيكاتسيالىق تەحنولوگيالار ەكسترەميستىك جانە تەرروريستىك توپتاردىڭ نەگىزگى قۇرالىنىڭ بىرىنە اينالعانىن اتاپ ءوتتى. وسى ورايدا عيزات نۇرداۋلەتوۆ حالىقارالىق اقپاراتتىق قاۋىپسىزدىكتىڭ جاڭا ارحيتەكتۋراسىن قۇرۋ قاجەتتىگىنە نازار اۋداردى. بۇل رەتتە اتالعان ارحيتەكتۋرا تەڭ قۇقىلىق, سەنىم, اشىقتىق قاعيداتتارى نەگىزىندە جانە بارلىق ەلدىڭ مۇددەسىن ەسكەرە وتىرىپ, بۇۇ اياسىندا قۇرىلۋعا ءتيىس.
فورۋم اياسىندا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى بىرقاتار شەتەلدىك ارىپتەسىمەن كەلىسسوزدەر جۇرگىزىپ, ەكىجاقتى ىقپالداستىق ماسەلەلەرىن قاراستىردى.
