«وزىق دامىعان مەملەكەت قۇرۋ ءۇشىن ءبىزدىڭ ازاماتتارىمىز جاڭاشا ويلاي بىلۋگە جانە جاسامپازدىققا ۇمتىلۋى كەرەك. سول سەبەپتى ءبىز قوعامدا بىلىمپازدىقتى دارىپتەۋگە, ءبىلىم جانە عىلىم سالاسىن دامىتۋعا باسا ءمان بەرىپ كەلەمىز», دەگەن ەدى ەل پرەزيدەنتى اتىراۋدا وتكەن ۇلتتىق قۇرىلتايدا.
«مەكتەپتىڭ جاسىل اۋماعى» جوباسى نەگىزىندە قانات قاققان جاڭا جوباعا قاراعاندى وبلىستىق ەكومۇراجاي قىزمەتكەرلەرى, «قازاقمىس» كورپوراتسياسى» جشس جانە «The Ulytau Educational Foundation» قايىرىمدىلىق قورى قولداۋ كورسەتكەن.
ەندى مەكتەپ وقۋشىلارى تامشىلاتىپ سۋارىلاتىن تاجىريبەلىك الاڭدا كوگالداندىرۋمەن ءوز بەتىنشە اينالىسىپ, زەرتتەۋ جۇمىستارىن جۇرگىزەدى. بۇعان دەيىن ءدال وسىنداي تاجىريبە شاھارداعى رۋساكوۆ اتىنداعى №2 مەكتەپ-ينتەرناتىندا جاسالعان. جوبا جەتەكشىلەرى بالقاشتىق وقۋشىلاردان وڭ ناتيجە كۇتىپ وتىر. قازىرگى كەزدە جوبا اياسىندا 100 كوشەت ەگىلىپ, سۋارۋعا ارنالعان كونتەينەرلەر ورناتىلدى. جىلىجاي مەن زەرتحاناداعى ساباقتار جاراتىلىستانۋ جانە بيولوگيا پاندەرى بويىنشا وتەدى. بالالار ءوز وڭىرلەرىنىڭ جاعدايىنا بەيىمدەلگەن وسىمدىكتەردى ءوسىرۋ تەحنولوگيالارىن تاڭداۋ بويىنشا زەرتتەۋلەرىن جۇرگىزەدى. مۇنىمەن قوسا, جىلىجاي ونىمدەرىن باپتايدى. ەكو-جوبا بالالارعا تابيعاتتى ايالاۋدى عانا سەزىنبەي, وسىمدىكتى ءوسىرىپ, ءونىم الۋ جولىن تەوريالىق-تاجىريبەلىك تۇرعىدان ۇيرەتەدى.
– قاراعاندى وبلىسى ءۇشىن, اتاپ ايتقاندا, بالقاش قالاسى ءۇشىن ەكولوگيا ماسەلەسى ءبىرىنشى كەزەكتە. قازىردىڭ وزىندە بار جانە بولاشاقتا وقۋشىلاردىڭ وزدەرى مەكتەپ اۋماعىنا ەگەتىن اعاشتار شۋدى ازايتادى جانە اۋا ساپاسىن جاقسارتادى, – دەيدى قاراعاندى وبلىستىق ەكولوگيالىق مۇراجايىنىڭ ءوندىرىس جونىندەگى ديرەكتورى ەكاتەرينا وبورينا.
جوبا اۆتورلارى جىلىجايدا تەك بيولوگيا ءپانى مۇعالىمدەرى عانا جۇمىس ىستەمەيتىنىن, وسىمدىكتى جانى سۇيەتىن پەداگوگتەرگە دە مۇمكىندىك بارىن ايتادى.
– ە.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ بوتانيكا كافەدراسىنىڭ وقىتۋشىسى دەنيس سيرمان وقۋشىلارعا سەمينار وتكىزدى. ول وسىمدىك شارۋاشىلىعىنداعى جالپى قاعيداتتار مەن زاماناۋي تەحنولوگيالار تۋرالى ايتىپ, زەرتحانادا, جىلىجايدا جانە تاجىريبە الاڭىندا جۇمىس ىستەۋ بويىنشا ەگجەي-تەگجەيلى ۇسىنىستار بەردى. سەميناردا ءبىز تۇقىمداردى قالاي دۇرىس ەگۋ جانە وسىمدىك قالدىقتارىن كومپوستاۋ كەرەكتىگىن بىلدىك. سونداي-اق ءوزىمىزدىڭ العاشقى وسىمدىكتەرىمىزدى ەكتىك, ولارعا ءبىز ودان ءارى كۇتىم جاسايمىز, – دەيدى ءالىمحان ەرمەكوۆ اتىنداعى مەكتەپ-ليتسەيىنىڭ 8-سىنىپ وقۋشىسى امەليا ىسقاقوۆا.
الداعى ۋاقىتتا جىلىجاي كەشەنىندە وقۋشىلار عىلىمي-زەرتتەۋ جۇمىسىن جۇرگىزىپ, رەسپۋبليكالىق بايقاۋلاردا جۇمىستارىن قورعايتىن بولادى.
بالقاش قالاسى
