فوتو: saryarka-samaly.kz
قازىرگى ۋاقىتتا پاۆلودار وبلىسى بويىنشا سۋ تاسقىنىنان زارداپ شەككەن تۇرعىنداردىڭ بارلىق ءوتىنىمى تولىق كولەمدە وتەلگەن. دەمەۋشىلىك قاراجات ەسەبىنەن 120 وتباسى جالپى سوماسى 98 ملن تەڭگە وتەماقى الدى. بۇعان قوسا اتالعان وتباسىلارعا جەرگىلىكتى بيۋدجەتتەن 100 ايلىق ەسەپتىك كورسەتكىش كولەمىندە بىرجولعى كومەك تولەنگەن.
– اقتوعاي اۋدانىنىڭ جالاۋلى اۋلىندا 5 ءۇي جانە شارباقتى مەن تەرەڭكول اۋداندارىندا 2 ءۇي قالپىنا كەلتىرۋگە جارامسىز دەپ تانىلعان. جالاۋلى اۋلىندا دەمەۋشى قاراجاتىنا قازىرگى كۇنى 5 ءۇي سالىنا باستادى. ءار باسپانانىڭ قۇنى 22 ملن تەڭگە تۇرادى. قۇرىلىستى الداعى ءۇش اي ىشىندە اياقتاۋ كوزدەلگەن. بۇعان قوسا شارباقتى اۋدانىنىڭ كراسيلوۆكا اۋلىندا تۇرۋعا جاراماي قالعان ءۇي ەسەپتەن شىعارىلىپ, زيان شەككەن وتباسىنا دەمەۋشى ەسەبىنەن قۇنى 1,1 ملن تەڭگە تۇراتىن وزگە باسپانا ساتىپ اپەرىلدى. ال تەرەڭكولدىڭ تومارلى اۋلىندا تۇراتىن وتباسىنىڭ ءۇيى دە سۋدان زارداپ شەككەنى سەبەپتى دەمەۋشىلەر 3 ملن تەڭگە تۇراتىن باسپانانى سىيعا تارتتى. وسىلايشا وبلىس بويىنشا جارامسىز دەپ تانىلعان 7 ءۇيدىڭ بارلىق شىعىنىن دەمەۋشىلەر كوتەرىپ وتىر, – دەيدى پاۆلودار وبلىسى اكىمى اپپاراتىنىڭ باسشىسى ديدار ەلۋباەۆ.
ونىڭ ايتۋىنشا, ايماقتاعى تۇرعىن ۇيلەردى سۋ باسۋ قاۋپى تولىعىمەن جويىلدى. وبلىستىق شتاب تاۋلىك بويى جۇمىس ىستەپ تۇر. جوعارىدا اتالعان 98 ملن تەڭگە تاسقىن سۋدان دۇنيە-م ۇلىكتەرى, ءۇي تەحنيكالارى مەن اسپاپتارى, شارۋاشىلىق عيماراتتارى ب ۇلىنگەن وتباسىلارعا وتەماقى رەتىندە تولەنگەن. كومەكتىڭ ەڭ از مولشەرى – 70 مىڭ, ال ەڭ كوبى 6 ملن تەڭگە بولعان.
بۇعان دەيىن ۇكىمەت باسشىسى تاسقىننان زارداپ شەككەندەرگە تۇرمىستىق تەحنيكا الاتىن اقشا دا بەرەمىز دەپ مالىمدەگەن ەدى. قارعىن سۋعا بايلانىستى ناۋرىز ايىندا توتەنشە جاعداي جاريالانعان جالاۋلى اۋلىندا تۇرعىنداردىڭ وتىنىمدەرىن جەرگىلىكتى كوميسسيا مۇقيات قاراستىرىپ جاتىر. جوعارىدا اتالعان كومەكتەردەن بولەك, وتباسىلارعا اۋدان قاراجاتى ەسەبىنەن 150 ايلىق ەسەپتىك كورسەتكىشكە دەيىن وتەماقى تولەنەدى دەپ كۇتىلىپ وتىر.
جالاۋلى اۋلىنداعى 6 ءۇيدىڭ قۇرىلىسىن ERG توبى ءوز موينىنا الدى. اۋىل اينالاسىندا بۇگىندە 6 كم قورعانىس بوگەتى سالىندى. ويپاڭ جەردە ورنالاسقان ەلدى مەكەننىڭ قارعىن سۋعا قاتىستى ماسەلەسىن كەشەندى تۇردە شەشۋ ءۇشىن كولەمى 200 مىڭ تەكشە مەتر بولاتىن 3 قازانشۇڭقىر قازىلدى.
پاۆلودار وبلىسى
