فوتو: inbusiness.kz
ء«بىز اسا ماڭىزدى, اسىرەسە قوس ەل اراسىنداعى قاۋىپسىزدىك تاۋەكەلدەرىن ايتارلىقتاي ازايتاتىن ارمەنيا مەن ازەربايجان اراسىنداعى شەكارانى ءبولۋدىڭ تاجىريبەلىك ۇدەرىسىن باستادىق», دەدى ن.پاشينيان. ونىڭ ايتۋىنشا, كسرو ىدىراعان كەزدە قالعان 1991 جىلعى شەكارا سىزىعىن قالپىنا كەلتىرۋ قاجەت.
ال ارمەنيا سىرتقى ىستەر مينيسترلىگى 19 ءساۋىر كۇنى ەرەۆان مەن باكۋ شەكارانىڭ جەكەلەگەن ۋچاسكەسىنىڭ دەليميتاتسياسى, ونىڭ ىشىندە ءتورت اۋىلدىڭ قاي ەلگە ءتان ەكەندىگى تۋرالى الدىن الا كەلىسكەنىن جانە ول ەلدى مەكەندەردى ازەربايجان العانىن مالىمدەدى.
جالپى شەكارانى دەليميتاتسيالاۋ – شەكارالاس ەلدەر اراسىنداعى الدىن الا جاسالعان كەلىسسوزدەر ارقىلى شەكارانىڭ ورنى مەن باعىتىن انىقتاپ, كوورديناتتارىن قاعازعا ءتۇسىرۋ. وسى قۇجات, ياعني دەليميتاتسيانىڭ ماتەريالدارى دەماركاتسياعا – شەكارانى ءىس جۇزىندە جۇرگىزۋگە نەگىز بولادى.
تاراپتار 15 مامىرعا دەيىن جەرگىلىكتى جەردەگى گەودەزيالىق ەسەپتەۋلەر نەگىزىندە ناقتىلانعان كوورديناتتاردى ەسكەرە وتىرىپ, شەكارا سىزىقتارى تۇسىرىلەتىن حاتتاماعا قول قويۋعا ءتيىس. ۇدەرىس تولىق اياقتالعانعا دەيىن شەكارالار دەليميتاتسيالانعان بولىپ سانالادى.
پاشينيان بۇعان دەيىن ازەربايجانعا وتكەن ءتورت اۋىل ارمەنيانىڭ تاۋەلسىز اۋماعىندا ورنالاسپاعانىن ايتقان. بىراق ولاردىڭ تاۆۋش وبلىسىنداعى ءتورت ارميان اۋىلىنا جاقىن ماڭدا ورنالاسقانىن ءتۇسىندىرىپ ءوتتى. ارمەنيا پرەمەر-ءمينيسترى ول اۋىلداردىڭ ازەربايجانعا بەرىلۋ مۇمكىندىگىن جوققا شىعاردى. پاشينيان سونىمەن قاتار ەگەر ەرەۆان شەكارانى تۇزەتۋگە قازىردەن قامدانباسا, كورشىمەن ەگەس قايتا باستالۋى مۇمكىن ەكەنىن جانە ول جاقىن ارادا بىتپەيتىنىن اشىپ ايتتى.
دەليميتاتسيا ۇدەرىسى تمد-نىڭ نىساندارى مەن قاعيداتتارى تۋرالى 1991 جىلعى 21 جەلتوقسانداعى الماتى دەكلاراتسياسىنا نەگىزدەلمەك. بۇل قۇجات بەلوۆەج كەلىسىمىندە ماقۇلدانعان جانە ول بويىنشا كسرو-نىڭ بۇدان بىلاي «حالىقارالىق قۇقىق سۋبەكتىسى» رەتىندە عۇمىرى توقتاتىلىپ, «جانازاسى شىعارىلعان» بولاتىن. سونىمەن قاتار بۇل قۇجات 1991 جىلعى شەكارانى ساقتاپ, بۇرىنعى كەڭەستىك ەلدەردىڭ اۋماقتىق تۇتاستىعىن بەكىتكەن.
كوپ ۇزاماي ارمەنيا مەن ازەربايجان اراسىنداعى شەكارادا كوورديناتسيالىق جۇمىستار اياسىنداعى گەودەزيالىق ولشەۋلەرگە سۇيەنە وتىرىپ, تاۆۋش-گازاح ۋچاسكەسىنە العاشقى شەكارالىق باعان قاعىلدى. بۇل اقپاراتتى نيكول پاشينيان ءوزىنىڭ Facebook-تەگى پاراقشاسىندا جاريا ەتتى.
ال وڭىردەگى گەوساياسي احۋالدى رەتتەۋگە جەتەلەيتىن بۇل جاڭالىققا العاشقى بولىپ ەستونيا ۇكىمەتى ءۇن قاتتى. اتالعان ەلدىڭ سىرتقى ىستەر مينيسترلىگى شەكارالىق باعاننىڭ ورناتىلۋىن, ياعني 1991 جىلعى الماتى دەكلاراتسياسىن نەگىزگە العان دەماركاتسيالىق ۇدەرىستەردىڭ باستالعانىن ايتۋلى وقيعا دەپ باعالاپ, بۇل ءىستىڭ جالعاساتىنىنان ءۇمىتتى ەكەندەرىن ءبىلدىردى.
