فوتو: Polisia.kz
قاراتال اۋدانىنىڭ تۇرعىنى جولداسىنىڭ دوسىنىڭ سەنىمىنە قيانات جاساپ, سمارتفونى ارقىلى ميلليون تەڭگەدەن استام ونلاين نەسيە العان.
«ول كىسى قويشى بولىپ جۇمىس ىستەيدى. سمارتفوندى قالاي قولدانۋ كەرەك ەكەنىن تۇسىنبەي, جاقىن دوسىنىڭ ايەلىنەن كومەك سۇراعان. كەلىنشەك كەيبىر قوسىمشالاردى ورناتۋ ءۇشىن ەر ادامنىڭ جەكە كۋالىگىن سۇراعان. الاياق ونلاين نەسيە الۋ ءۇشىن جابىرلەنۋشىنىڭ تەلەفونىنان ءوتىنىش بەرە باستاعان, كەيىن ونى الداپ, بانك مىندەتتەگەن بەينە تەكسەرۋدەن ءوتۋىن سۇراعان», دەدى قاراتال روپ باستىعىنىڭ ورىنباسارى ارمان سۇلتانوۆ.
وسىلايشا, كەلىنشەك جابىرلەنۋشىنىڭ ۇيىنە بارعان سايىن «سمارتفونىن تەكسەرەمىن» دەپ ءتۇرلى سىلتاۋ ايتىپ, جاڭا نەسيە الىپ وتىرعان. جابىرلەنۋشى ءوزىنىڭ اتىندا نەسيە بار ەكەنىن, بانك قىزمەتكەرلەرى تولەۋ مەرزىمى ءوتىپ كەتكەنىن جانە ونى قايتارۋ كەرەكتىگىن ايتقانشا ءمان-جايدان بەيحابار بولعان.
قاراتال اۋداندىق سوتى الاياقتى كىنالى دەپ تانىپ, كامەلەتكە تولماعان ءتورت بالاسىنىڭ بولۋى, سونداي-اق جابىرلەنۋشىگە كەلتىرىلگەن زالالدى تولىق وتەۋىن ەسكەرە وتىرىپ, ەكى جىلعا باس بوستاندىعىن شەكتەۋ جازاسىن تاعايىندادى.
«قۇرمەتتى ازاماتتار, سمارتفوندارىڭىزدى جانە جەكە قۇجاتتارىڭىزدى بەيتانىس ادامدارعا بەرمەۋلەرىڭىزدى سۇرايمىز. مۇنداي جاعدايلاردىڭ الدىن الۋ ءۇشىن ونلاين نەسيە بەرۋ قىزمەتىن ءوشىرىڭىز, ول ءۇشىن ۇيالى تەلەفونىڭىزعا Egov ءموبيلدى قوسىمشاسىن جۇكتەپ الىپ, ىزدەۋ تەرەزەسىندەگى «قىزمەتتەر» قوسىمشاسىنداعى «باس تارتۋ» باتىرماسىن باسىپ, «بانك نەسيەسىن الۋدان ەرىكتى تۇردە باس تارتۋ» فۋنكتسياسىن تاڭداڭىز», دەپ ەسكەرتتى ارمان سۇلتانوۆ.
قىرمىزى جۇماعاليقىزى,
ەۇۋ ستۋدەنتى
