بىرەگەي لەنتالى ورماندى قالپىنا كەلتىرۋگە كۇش سالۋ ءۇشىن سەمەي قالاسى ماڭىنداعى بورودۋليحا اۋدانىنا مىڭنان اسا ادام اتتاندى. بۇگىندە اباي اۋدانىنىڭ تۇرعىندارى «اعاش وتىرعىزۋ – ءاربىر ادامنىڭ پارىزى» دەپ سانايدى. ويتكەنى بۇل ءوڭىر ەجەلدەن جەل مەن قۇمنان قورعايتىن قاراعايلى ورماننان تۇرادى.
«تازا قازاقستان» ەكولوگيالىق اكتسياسى «جاسىل ايماق» اپتالىعى بورودۋليحا اۋدانىندا باستالدى. وسىلايشا, «سەمەي ورمانى» اۋماعىندا «سەمەي ورمانى – جاسىل ايماق» اتتى اعاش وتىرعىزۋ بويىنشا كەڭ اۋقىمدى اكتسيا ءوتتى. الداعى ۋاقىتتا دا اعاش وتىرعىزۋ اكتسيالارى تۇراقتى تۇردە وتكىزىلمەك.
ءىس-شاراعا وبلىس اكىمى نۇرلان ۇرانحاەۆ, وبلىستىق جانە اۋداندىق ءماسليحات دەپۋتاتتارى, ارداگەرلەر كەڭەسىنىڭ مۇشەلەرى, بەلسەندى جاستار, ستۋدەنتتىك ۇيىمدار, ەڭبەك ۇيىمدارى, سەمەي قالاسى مەن بورودۋليحا اۋدانىنىڭ مەكەمەلەرىنەن مىڭنان اسا ادام قاتىستى.
«بۇگىن تۇتاس ەل كولەمىندە كەڭ قولداۋعا يە بولعان «تازا قازاقستان» – ەكولوگيالىق اكتسياسى اياسىندا وبلىسىمىزدا ەرەكشە ماڭىزى بار ءىس-شارا ءوتىپ جاتىر. مەملەكەت باسشىسىنىڭ تىكەلەي باستاماسىمەن جۇزەگە اسقان بۇل اكتسيانىڭ ارقاسىندا وتانىمىزدىڭ ءار وبلىسى, قالاسى مەن اۋىلى اباتتانىپ, كوشەتتەر وتىرعىزىلىپ, ءوڭىرىمىز جاڭا كەيىپكە ەنىپ كەلەدى. بۇل – «اتادان مال قالعانشا, تال قالسىن» دەگەن يگى ءداستۇردىڭ جالعاسى», دەدى وبلىس اكىمى ن.ۇرانحاەۆ.
ناۋقاننىڭ نەگىزگى ماقساتى كوشەت وتىرعىزۋ ارقىلى ەكولوگيامىزدى جاقسارتىپ, قاراعايلى ورمانىمىزدى جەدەل قالپىنا كەلتىرۋگە باعىتتالعان. ماسەلەن, «جاسىل ايماق» اپتالىعىنىڭ باسىندا «تازا قازاقستان» اكتسياسى اياسىندا سەمەي قالاسى مەن بورودۋليحا اۋدانىنىڭ جۇزدەگەن تۇرعىنى جاڭا كوشەتتەرگە ءومىر سىيلاۋ ءۇشىن «سەمەي ورمانى» مەملەكەتتىك ورمان شارۋاشىلىعى زاۋىتىنىڭ قىزمەتكەرلەرى دايىنداعان ۋچاسكەلەرگە كەلىپ, جۇمىلا ىسكە كىرىسىپ كەتتى. جاپپاي اكتسياعا بارلىعى 30-دان استام ۇيىم قاتىسقان. ونىڭ ىشىندە شاكارىم اتىنداعى ۋنيۆەرسيتەتتىڭ «جاسىل ەل» بولىمشەلەرىنىڭ جاستارى العاش بولىپ ءۇن قوستى.
«بۇگىن جىلداعى ءداستۇرلى ءىس-شارانى وتكىزۋگە اتسالىسىپ جاتىرمىز. بۇل – ءبىزدىڭ ۋنيۆەرسيتەتتىڭ ميسسيالارىنىڭ ءبىرى. سوندىقتان GLPR قىزمەتكەرلەرىمەن بىرگە قوعامعا قىزمەت ەتۋگە دايىنبىز. سونىمەن قاتار ءبىز دوڭگەلەك ۇستەل وتكىزىپ, وندا تەك قورشاعان ورتانى قورعاۋ عانا ەمەس, ورمان ورتتەرىمەن كۇرەسۋ ماسەلەلەرى دە كوتەرىلدى. «تازا قازاقستان» اكتسياسى اياسىندا 50 وقۋشىمىز ەكى ايدىڭ كەلەسى اپتالارىندا كوگالداندىرۋعا قاتىسىپ جاتىر», دەدى شاكارىم ۋنيۆەرسيتەتىنىڭ رەكتورى دۋمان ورىنبەكوۆ.
اكتسيا اياسىندا ۆوسكرەسەنوۆكا اۋلىنىڭ ماڭىنداعى ورمان القابىنداعى 5 گەكتار اۋماقتا 23 مىڭنان استام قاراعاي كوشەتى وتىرعىزىلدى. ايتا كەتەيىك, ونىڭ ىشىندە ورماندى القاپ – 87 773 گا بولسا, سۋ ايدىندارى 14 301 گەكتاردى قۇرايدى.
«تازا قازاقستان» ەكولوگيالىق اكتسياسى باستالعالى «سەمەي ورمانى» قورىعىنىڭ اۋماعىنا 70 مىڭنان استام كوشەت وتىرعىزىلدى.
