جوعارىدا اتالعان سۋ باسقان اۋدانداردىڭ تۇرعىندارىنا گۋمانيتارلىق كومەك قاجەت, اتاپ ايتقاندا اۋىزسۋ, نان, گيگيەنالىق قۇرالدارعا شۇعىل قاجەتتىلىك بار. مۇندا قر ۇلتتىق ۇلانىنىڭ اسكەري قىزمەتشىلەرى – ۇشاقتار مەن تىكۇشاقتارداعى ۇشقىشتار حالىققا كومەككە كەلدى. ۇشقىشتار باسقا ايماقتاردىڭ تۇرعىندارى, كورپوراتسيالار, سونداي-اق كورشى مەملەكەتتەردەن جينالعان 140 تونناعا جۋىق گۋمانيتارلىق جۇكتى جەتكىزدى. ءوز كەزەگىندە, ۇلاندىقتار 600 توننادان استام جۇك ءتۇسىردى. گۋمانيتارلىق كومەكتىڭ نەگىزگى بولىگى اقتوبە, اتىراۋ, باتىس قازاقستان, قوستاناي جانە سولتۇستىك قازاقستان وبلىستارىنا جىبەرىلدى.
بۇگىنگى كۇنى اسكەري قىزمەتشىلەر پوليتسيا قىزمەتكەرلەرىمەن جانە قۇتقارۋشىلارمەن بىرلەسىپ سۋ تاسقىنى سالدارىن جويۋدى جالعاستىرىپ جاتىر. سونداي-اق سۋ تاسقىنىنا قارسى ءىس-شارالار مەن اۆاريالىق-قۇتقارۋ جۇمىستارى, ەرىگەن سۋلاردى ايداۋ, ينەرتتى ماتەريالدارى بار قاپشىقتاردى توسەۋ, سۋ ايدىندارىنىڭ جاعالاۋدى نىعايتۋ جۇمىستارى, كانالدار مەن ارىق جۇيەلەرىن تازارتۋ, ادامداردى قاۋىپسىز ورىندارعا ەۆاكۋاتسيالاۋ جۇرگىزىلىپ جاتىر.
ماسەلەن, اتىراۋ وبلىسىندا 5546 (اتىراۋ ق.) جانە 5451 (قاراعاندى ق.) اسكەري بولىمدەرىنەن 600-گە جۋىق قۇقىقتىق ءتارتىپ اسكەرى تارتىلدى. بۇدان باسقا, 6506 اسكەري ءبولىمىنىڭ (شىمكەنت ق.) 300 اسكەري قىزمەتشىسى جانە 5547 اسكەري ءبولىمىنىڭ (قىزىلوردا ق.) جەكە قۇرامىنىڭ 200 ادامى باتىس قازاقستان وبلىسىندا جاعالاۋدى نىعايتۋ جۇمىستارىنا, قاپشىقتاردى دايىنداۋعا جانە سالۋعا كومەكتەسەدى. سونىمەن بىرگە 5517 اسكەري ءبولىمىنىڭ (ورال ق.) 80 اسكەري قىزمەتشىسى پاترۋلدىك-بەكەتتىك قىزمەت اتقارادى. تاعى 300-گە جۋىق سارباز سۋ تاسقىنىنا قارسى ءىس-شارالاردا جەرگىلىكتى حالىققا كومەك كورسەتىپ كەلەدى.
ۇلاندىقتار سۋ باسقان اۋماقتاردا كۇندىز-ءتۇنى تىنباي كومەك كورسەتىپ ءجۇر. قاۋىپسىزدىك ماقساتىندا ساربازدار ازاماتتاردى سۋ باسقان ۇيلەرگە جىبەرمەيدى. اسكەري قىزمەتشىلەر توناۋ ارەكەتتەرىن بولدىرماۋ ءۇشىن بار كۇشىن سالادى.
سۋ تاسقىنى سالدارىن جويۋعا قوستاناي جانە سولتۇستىك قازاقستان وبلىستارىنىڭ قالالارى مەن كەنتتەرىندە 6697 (قوستاناي ق.) جانە 6637 (پەتروپاۆل ق.) اسكەري بولىمدەرىنىڭ اسكەري قىزمەتشىلەرى, قر ۇلتتىق ۇلانى اكادەمياسىنىڭ كۋرسانتتارى بەلسەندى قاتىسادى. ولارعا ەلوردالىق جەدەل بريگادانىڭ ءتارتىپ ساقشىلارى كومەككە جىبەرىلدى. سولتۇستىك ايماقتارداعى ۇلتتىق ۇلاننىڭ كۇشتەر توبى 400-دەن استام ادامدى قۇرايدى.
جالپى, سۋ باسقان وڭىرلەردە سالداردىڭ الدىن الۋ جانە جويۋ ءۇشىن پوليتسەيلەرمەن, قۇتقارۋشىلارمەن جانە ەرىكتىلەرمەن بىرلەسىپ سۋ تاسقىنىنا قارسى ءىس-شارالارعا بەلسەندى قاتىساتىن 3000-نان استام قۇقىقتىق ءتارتىپ اسكەرى تارتىلدى. ۇلاندىقتار 120-دان استام اۆتوكولىك تەحنيكاسىن پايدالانادى, 1769 ادام ەۆاكۋاتسيالاندى, 1 ميلليون 101 مىڭ قاپ دايىندالىپ, توسەلدى.
