ءبىر عاسىردان استام ۋاقىتتان بەرى تويلانىپ كەلە جاتقان مەيرامنىڭ تاريحي ءمانى زور. سەبەبى 1920 جىلى 23 ساۋىردە تۇركيا ۇلى ۇلتتىق ءماجىلىسى قۇرىلدى. سودان باستاپ تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرىك بۇل كۇندى «ۇلتتىق ەگەمەندىك جانە بالالار كۇنى» دەپ جاريالاپ, بالالارعا تارتۋ ەتكەن ەكەن. وسىدان كەيىن جىل سايىن تۇركيادا 23 ءساۋىر «ۇلتتىق ەگەمەندىك جانە بالالار كۇنى» رەتىندە اتالىپ, ەلدىڭ تۇكپىر-تۇكپىرىندە بالالارعا ارنالعان ۇلكەن ءىس-شارالار ۇيىمداستىرىلادى.
ەلىمىزدەگى تۇركيا ەلشىلىگى دە ءوز ەلدەرىندەگى مەنشىكتى مەيرامدى ۇمىت قالدىرماۋ ماقساتىندا استانالىق بالالارعا كوڭىلدى مەرەكە ۇيىمداستىردى. ەرتەگى كەيىپكەرلەرىمەن بي بيلەپ, سيقىرعا تولى ويىنعا قاتىسقان بالدىرعانداردىڭ قۋانىشىندا شەك جوق. سونىمەن بىرگە مۋلتفيلم قاھارماندارىنىڭ بەينەسىن سومداعان انيماتورلاردىڭ سۇيەمەلدەۋىمەن جانە ءتۇرلى بوياۋ جۇمىستارىمەن تانىسىپ, وزدەرى دە ءبىر ءسات عاجايىپ الەمىنىڭ كەيىپكەرىنە ەندى. ولاردىڭ قاتارىندا قازاقستاندا تۇراتىن تۇرىك بالالار عانا ەمەس, ەلورداداعى قيىن ومىرلىك جاعدايعا تۇسكەن وتباسىنىڭ بالالارى مەن بالالار ءۇيىنىڭ 20 تاربيەلەنۋشىسى دە شاقىرتىلدى. مەرەكەگە وراي استاناداعى تۇركيا رەسپۋبليكاسى ەلشىلىگىنىڭ ۇيىمداستىرۋىمەن مەرەكەلىك باعدارلاما ۇيىمداستىرىلدى.
ەڭ قىزىعى, جىلداعى ءداستۇر بويىنشا بيىل دا تۇركيا رەسپۋبليكاسىنىڭ ەلشىسى مۇستافا كاپۋدجۋ ەلشىلىككە كەلگەن كىشكەنتاي قوناقتارعا كرەسلوسىن تابىستادى. مەرەكەلىك ءىس-شارا سوڭى قوناقتارعا ارنالعان اس مازىرىمەن جالعاسىپ, مەرەكەلىك شارالارعا قاتىسۋشى بالالارعا ءتۇرلى سىيلىقتار تابىس ەتۋمەن اياقتالدى.
