«تاسقا اينالعان, مينەرالدانعان اعاشتار پالەنتولوگيالىق ەسكەرتكىشتەر ساناتىنا كىرەدى. ءبىزدىڭ مۋزەي قورىندا تاسقا اينالعان ءتورت اعاش ساقتالعان. ولاردىڭ پىشىندەرى دە ءارتۇرلى. كوبىنەسە ەرتەرەكتە مەحانيزاتورلار جەر جىرتىپ ءجۇرىپ, تاۋىپ الىپ, قورعا وتكىزگەن. ەكسپوزيتسيادا تۇرعان اعاش – بىزگە اكەلىنگەندەردىڭ ەڭ ءىرىسى. عالىمدار وسى اعاش 330 ميلليون جىلعا سوزىلعان پالەزوي زامانىنىڭ دەۆون (70-50 ملن جىل بۇرىن) نەمەسە تاسكومىر (55-75 ملن جىل بۇرىن) كەزەڭىندە وسكەن قاراعاي بولۋى مۇمكىن دەيدى. ويتكەنى دەۆون كەزەڭىندە جەردە قاراعاي اعاشتارى كوپ وسكەن ەكەن. كورمەدەگى اعاشتىڭ قۇرامىندا بىرنەشە باعالى مينەرال بار. تابيعاتتىڭ ءتۇرلى قۇبىلىستارىنا شىداپ, اۋا رايىنىڭ كۇرت وزگەرىستەرىنە توتەپ بەرىپ, شىرىمەي, بۇزىلماي-اق وزدىگىنەن مينەرالدانۋى ارقاسىندا وسى كۇنگە دەيىن جەتتى», دەيدى اقتوبە وبلىستىق تاريحي-ولكەتانۋ مۋزەيىنىڭ تابيعات جانە ەكولوگيا عىلىمي- زەرتتەۋدى قامتاماسىز ەتۋ ءبولىمىنىڭ مەڭگەرۋشىسى مايرا بۋحانوۆا.
تابيعاتتىڭ وسىنداي تاماشا قۇبىلىستارىن تابيعي تۋريزمگە جاقسى پايدالانىپ جاتقان ەلدەر كوپ. ماسەلەن, اقش-تىڭ اريزونا شتاتىندا تاسقا اينالعان اعاشتار 1936 جىلدان بەرى تابيعي ەسكەرتكىشتىڭ سيرەك كەزدەسەتىن ءتۇرى رەتىندە مەملەكەت قورعاۋىنا الىنعان. مەكسيكا ءوز جەرىندە وسەتىن كاكتۋستەردى تابيعي تۋريزمگە ءساتتى پايدالانىپ, جارناماسىن اسىرىپ كەلەدى.
ەلىمىزدىڭ ءار جەرىندە وسىنداي مينەرالدانعان اعاشتار ءجيى كەزدەسەدى. بۇرىنعى زاماندا ولاردى جيناپ, مۋزەي قورىنا وتكىزەتىن تابيعات جاناشىرلارى بولدى. ەستە جوق ەسكى زاماندا وسى جەردە كوكتەي وسكەن تابيعات ەسكەرتكىشتەرىن اسپان استىنداعى مۋزەيگە جاساقتاسا, قولعا الىنعان جاقسى جوبا بولار ەدى.
اقتوبە وبلىسى
