فوتو: satbayev.university
حالىقارالىق پاندىك رەيتينگ بويىنشا بارلىعى 149 ەلدەن بەس مىڭعا جۋىق الەمدىك ۋنيۆەرسيتەتتىڭ كورسەتكىشتەرى تالداندى. حالىقارالىق جوعارى وقۋ ورىندارىندا وقىتىلاتىن پاندەردىڭ ساپاسىن بريتاندىق «Quacquarelli Symonds» اگەنتتىگى باعالادى. ونىڭ ناتيجەسى بويىنشا ەۋرازيا ۇلتتىق ۋنيۆەرسيتەتى جوعارى كورسەتكىشتەردى باعىندىرۋمەن قاتار, رەيتينگتەگى وكىلدىگىن 20 پانگە دەيىن كەڭەيتتى. ەلىمىزدىڭ جەتەكشى ۋنيۆەرسيتەتى 17 پاندىك جانە 3 سالالىق رەيتينگتە ۇسىنىلعان. سولاردىڭ ىشىندە «قوناقجايلىلىق جانە دەمالىستى ۇيىمداستىرۋ» باعىتىندا رەكوردتىق ناتيجە كورسەتىپ, 2253 ۋنيۆەرسيتەت اراسىندا ۇزدىك 50 جوعارى وقۋ ورنىنىڭ قاتارىنان كورىنگەن. ايتا كەتەيىك, بۇل – ورتالىق ازيا بويىنشا ەڭ جوعارى كورسەتكىش. سونداي-اق وقۋ ورداسى 5 ءپان بويىنشا العاشقى جۇزدىككە ەندى. ولار: «اعىلشىن ءتىلى مەن ادەبيەتى», «زاماناۋي تىلدەر», «لينگۆيستيكا», «ونەر جانە ديزاين», «قوناقجايلىلىق جانە دەمالىستى ۇيىمداستىرۋ» پاندەرى.
«وتاندىق جوعارى وقۋ ورىندارىنىڭ پاندىك رەيتينگتەردەگى ورىندارى سانىنىڭ قىرىق بىردەن ەلۋ جەتىگە دەيىن جانە سالالىق رەيتينگتەردەگى توعىزدان ونعا دەيىن ءوسۋى – ايتارلىقتاي ۇلكەن ناتيجە. جاڭا ءتىزىمنىڭ ءبىرىنشى جۇزدىگىندە بىرقاتار پاندەر بويىنشا وكىلدىكتىڭ كەڭەيۋى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇزدىك ەلۋ ءپان بويىنشا كوش باستاۋى, مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ جاريالانعان رەيتينگتەردەگى دەبيۋتى جانە باسقا دا بىرقاتار ماڭىزدى جەتىستىك – باسشىلاردىڭ, پروفەسسور-وقىتۋشىلار قۇرامى مەن قىزمەتكەرلەردىڭ كاسىبيلىگىن كورسەتەدى», دەدى QS وڭىرلىك ديرەكتورى سەرگەي كريستوليۋبوۆ.
پاندىك رەيتينگتە ۋنيۆەرسيتەتتىڭ اكادەميالىق ساراپشىلار مەن جۇمىس بەرۋشىلەر اراسىنداعى بەدەلى, اكادەميالىق زەرتتەۋلەردىڭ دايەكسوزدەرى, حالىقارالىق زەرتتەۋ جەلىسىنىڭ يندەكسى بويىنشا باعالانادى. كوپتەگەن سالا بويىنشا ەۋرازيا ۇلتتىق ۋنيۆەرسيتەتى بىرنەشە ساتىعا جوعارى كوتەرىلىپ, وتكەن جىلعى ناتيجەلەرىن جاڭارتتى. اتاپ ايتساق, ء«تىل ءبىلىمى» بويىنشا 94-تەن 69-ورىنعا, «زاماناۋي تىلدەر» – 88-دەن 84-ورىنعا, «تەحنيكا جانە تەحنولوگيا» سالاسى بويىنشا 200 ورىنعا العا ىلگەرىلەگەن. سونداي-اق وتكەن جىلمەن سالىستىرعاندا «ارحەولوگيا», «ونەر جانە ديزاين», «اعىلشىن ءتىلى مەن ادەبيەتى», «تاريح», «قازىرگى تىلدەر», «ەكونوميكا جانە ەكونومەتريكا», «ينجەنەريا جانە تەحنولوگيا» پاندەرى بويىنشا كورسەتكىشتەر ەداۋىر جوعارىلاعان. العاش رەت الەمدىك رەيتينگكە ء«بىلىم», «الەۋمەتتانۋ» جانە «ەلەكترلى جانە ەلەكتروندىق ينجەنەريا» پاندەرى كىردى.
ايتا كەتەيىك, ەۋرازيا ۇلتتىق ۋنيۆەرسيتەتى 2017 جىلدان باستاپ QS پاندىك رەيتينگتە باق سىناپ كەلەدى. ءار جىل سايىن ۇزدىك ناتيجەلەر كورسەتىپ جۇرگەن وقۋ ورداسى ەلىمىزدەگى ۋنيۆەرسيتەتتەر اراسىندا QS پاندىك رەيتينگىسىنىڭ ۇزدىك جۇزدىگىندە كوش باستاپ تۇر.
