حالقىمىز «ەر باسىنا كۇن تۋسا, ەتىگىمەن سۋ كەشەر» دەيدى. بەيبىت كۇننىڭ وزىندە ءتۇرلى قىلمىستىڭ الدىن الىپ, قارا باسىن قاۋىپ-قاتەرگە تىگىپ جۇرەتىن پوليتسيا قىزمەتكەرلەرى قازىردە ءتىپتى قاۋىرت جۇمىس كەستەسىنە كوشكەن.
وسى كەزگە دەيىن باتىس قازاقستان وبلىسىندا 8 مىڭداي ادام تاسقىن سۋدان قاۋىپسىز جەرگە كوشىرىلسە, سونىڭ بارلىعىنىڭ باسى-قاسىندا قۇقىق ساقشىلارى ءجۇردى. سۋ شايىپ, جابىنى ب ۇلىنگەن جولداردىڭ تۇسىندا دا تاۋلىك بويى كەزەكشىلىك ۇيىمداستىرىپ, قاۋىپسىزدىكتى قامتاماسىز ەتىپ ءجۇر.
بقو پوليتسيا دەپارتامەنتىنىڭ باسشىسى, پوليتسيا پولكوۆنيگى ارمان ورازاليەۆتىڭ ايتۋىنا قاراعاندا, وبلىس بويىنشا سۋ تاسقىنىنا قارسى ءىس-شارالارعا كۇنى بۇگىن 700-دەن استام پوليتسيا قىزمەتكەرى مەن 104 تەحنيكا جۇمىلعان.
ادام بالاسى قىزىق. كەيبىر كىسىلەر بۇكىل ەلگە كەلگەن قاۋىپ-قاتەر جالعىز ءوزىن اينالىپ ءوتىپ كەتەردەي قامسىز جۇرەدى. ءتىلسىز جاۋ تابالدىرىعىنا كەلىپ, شەگىنەتىن جەر قالماعاندا شاراسىز كۇيگە تۇسەدى. پوليتسيا قىزمەتكەرلەرى وسىنداي تالاي جاندى اجالدان اراشالاپ الىپ شىقتى.
مىسالى, وتكەندە ەرىگەن سۋ ۇزىنكول سۋ قويماسىنا جان-جاقتان قۇيىلىپ, بوگەتتى بۇزىپ كەتە جازدادى. ىرگەدەگى اۋىلدى باسىپ كەتۋ قاۋپى ءتوندى. سىن ساعاتتا اۋىل تۇرعىندارىنىڭ ءوزىن عانا ەمەس, مال-مۇلكى مەن ءتورت ت ۇلىك مالىن قۇتقارۋ قاجەت بولدى. وسى قاربالاستىڭ ىشىندە توتەنشەلىكتەر جانە ۇلتتىق ۇلان ساربازدارىمەن بىرگە پوليتسيا قىزمەتكەرلەرى دە ءجۇردى. سول كۇندەرى ۇزىنكول, ءجاڭاومىر, كەمەر, يۋبيلەينىي ەلدى مەكەندەرىنەن 2 829 ادام كوشىرىلگەن ەكەن.
ءساۋىردىڭ 4-ءى كۇنى «ۆىمپەل» ساياجايىندا توسىن وقيعا بولدى. الدىن الا حابارلاندىرۋعا قاراماستان, ساياجاي ۇيلەرىنىڭ بىرىندە ادام قالىپ قويعان. قاس پەن كوزدىڭ اراسىندا اينالاعا لاپ قويعان تاسقىن سۋدىڭ ورتاسىندا قالعان بەيشارا ءۇيىنىڭ شاتىرىنا شىعىپ ۇلگەرىپ, ساياجاي توراعاسىنا حابارلاسىپتى. دابىل شاعان پوليتسيا بولىمىنە دە ءتۇستى. جەرگىلىكتى پوليتسيا قىزمەتى بولىمشەسى №21 ۋچاسكەلىك پوليتسيا پۋنكتىنىڭ اعا ۋچاسكەلىك ينسپەكتورى, پوليتسيا كاپيتانى ديدار وتەپوۆ وقيعا ورنىنا جەدەل جەتىپ, سۋ ورتاسىندا قالعان ازاماتتى قايىقپەن قۇتقارىپ الدى.
ال ءساۋىر ايىنىڭ 2-سىنەن 3-ىنە قاراعان ءتۇنى بولعان مىنا وقيعا دا ءبىر وتباسىنىڭ تراگەدياسىنا اينالا جازدادى. 1966 جىلى تۋعان ازامات اقساي قالاسىندا ۆاحتالىق جۇمىسىنان شىعىپ, ءوزى تۇراتىن كەڭتۇبەك اۋىلىنا جاياۋ تارتىپ كەتىپتى. اۋىلعا 5 شاقىرىم جاقىن كەلىپ, اينالانى سۋ باسىپ كەتكەنىن كورەدى. كەشىپ وتۋگە سۋدىڭ اعىسى قاتتى, اينالۋعا باسى كورىنبەيدى, تاس قاراڭعى. ءسويتىپ, جۇرگەندە تەلەفونىنىڭ قۋاتى تاۋسىلادى. امالسىزدان تۇرعان جەرىندە كومەك كۇتۋگە تۋرا كەلەدى. جاعدايدى ايتىپ, پوليتسيادان كومەك سۇراعان جۇبايى قاتتى الاڭداۋلى ەدى. ءتۇن ىشىندە اۋىلدىڭ ۋچاسكەلىك پوليتسيا ينسپەكتورى, پوليتسيا اعا لەيتەنانتى اسحات كاۋكەەۆ جولعا شىعىپ, اۋىل ادامدارىمەن بىرگە تراكتورمەن توڭىرەكتى شارلاپ شىقتى. ابىروي بولعاندا ازامات تابىلدى, قاتتى توڭىپ قالعانىمەن ءدىن امان بولىپ شىقتى. ايتا بەرسە, مۇنداي مىسالدار كوپ.
قازىر باتىسقازاقستاندىقتار جايىقتان كەلەتىن جويقىن سۋ تاسقىنىن قارسى الۋعا دايىندالىپ جاتىر. مىڭداعان ادام وزەن جايىلمالارىنداعى ەلدى مەكەندەردەن قاۋىپسىز جەرگە كوشىرىلدى. ولاردىڭ تۇرعىن ۇيلەرىن دە سۇعاناق قولداردان پوليتسيا كۇزەتىپ تۇر. ءوڭىردىڭ سۋ باسۋ قاۋپى بار ايماقتارى مەن سۋ نىساندارىندا 24 ساعاتتىق كەزەكشىلىك ۇيىمداستىرىلعان.
وبلىستىق پوليتسيا دەپارتامەنتىنىڭ باسشىسى ارمان ورازاليەۆ جاقىندا وبلىس پروكۋرورى, 3-سىنىپتى مەملەكەتتىك ادىلەت كەڭەسشىسى سەرىك شالاباەۆپەن بىرگە قالا ماڭىنداعى ەلدى مەكەندەر مەن ساياجاي قوعامدارىن ارالاپ شىققان ەدى.
جەرگىلىكتى تۇرعىندارمەن بولعان بۇل كەزدەسۋلەر وتە پايدالى بولدى. حالىقتىڭ كوڭىلىندەگى ۋايىم سەيىلگەن سىڭايلى. جەكە م ۇلىكتىڭ ساقتالۋى, ادام قۇقىعىنىڭ قورعالۋى, تابيعات اپاتىنان كەلگەن شىعىنداردىڭ ورنىن تولتىرۋ ماسەلەسى كوپشىلىكتى الاڭداتاتىنى انىق. قۇقىق قورعاۋ سالاسىنىڭ جوعارى لاۋازىمدى باسشىلارىمەن تىكە جۇزدەسىپ, ساۋالدارىنا ناقتى جاۋاپ العان حالىق جەرگىلىكتى بيلىك وكىلدەرى, مەملەكەت تاراپىنان جاسالىپ جاتقان كەشەندى قامقورلىققا العىس ايتتى.
– «اپات ايتىپ كەلمەيدى». سۋ تاسقىنى كۇتپەگەن ساتتە كەلىپ, ءبىرشاما اۋىلدى, ۇيلەردى شايىپ كەتتى. بىراق مەن سىزدەرگە باتىس قازاقستان پوليتسياسىنىڭ جەكە قۇرامى قاشاندا حالىقپەن بىرگە ەكەنىن ايتقىم كەلەدى. ءبىز ءۇشىن ەڭ ماڭىزدىسى – ازاماتتاردىڭ اماندىعى, قوعامدىق ءتارتىپتى ساقتاۋ, قوعامداعى, جولداعى قاۋىپسىزدىكتى قامتاماسىز ەتۋ. پوليتسيا قىزمەتكەرلەرى تىكەلەي مىندەتتەرىمەن قاتار سۋ باسقان جانە سۋ باسۋ قاۋپى بار اۋىلداردا, ساياجايلاردا تاۋلىك بويى قىزمەت ەتىپ, قولىنان كەلەتىن بارلىق كومەكتى كورسەتىپ جاتىر. ەلىمىزدىڭ باسىنا تۇسكەن بۇل سىناقتى بىرگە ەڭسەرۋگە ءبىز دايىنبىز, – دەدى ءوز سوزىندە پوليتسيا دەپارتامەنتىنىڭ باسشىسى.
باتىس قازاقستان وبلىسى
