فوتو؟ Copilot GPT
تاۋەلسىز ساراپشىلاردىڭ ايتۋىنشا, بىزدە ەميتەنت پەن ينۆەستور ءۇشىن قىزمەتتەردىڭ تولىق سپەكترىن الاتىن ءبىر ناقتى پلاتفورما بولۋى كەرەك. ەلىمىز ەكى بيرجا ۇستايتىن دەڭگەيگە جەتپەدى دەيدى ولار.
ۇب توراعاسىنىڭ ايتۋىنشا, مەملەكەت باسشىسى بيرجالاردى بىرىكتىرۋدى ەمەس, بيرجالاردىڭ الەۋەتىن بىرىكتىرۋدى تاپسىردى. بۇل ءارتۇرلى سۇراق, ويتكەنى بيرجالاردىڭ بىرىگۋى ءبىر زاڭدى تۇلعانىڭ قۇرىلۋىن بىلدىرەدى.
«ناۋرىز ايىنىڭ سوڭىنا دەيىن شەشىمدى ازىرلەۋ تاپسىرىلدى. بۇل شەشىمدى ءبىز, ياعني ۇلتتىق بانك, قارجى نارىعىن رەتتەۋ جانە دامىتۋ اگەنتتىگى جانە «استانا» حالىقارالىق قارجى ورتالىعى ازىرلەدىك. كوپتەگەن ەلدە باعالى قاعاز نارىعى – ەكونوميكانى قارجىلاندىرۋدىڭ ماڭىزدى جولدارىنىڭ ءبىرى. دەگەنمەن بۇگىندە ەل ەكونوميكاسىن تەك بانكتەر قارجىلاندىرادى. قور نارىعىن دامىتپاي, جالپى ەكونوميكانىڭ دامۋى تۋرالى ويلاۋ قيىن. سوندىقتان بيرجالىق ينفراقۇرىلىم مۇمكىندىگىنشە جاقىن بولۋى, ال وتىمدىلىك بىركەلكى بولۋى كەرەك. سوندا كەز كەلگەن قۇرال ەكى پلاتفورمادا دا قولجەتىمدى بولادى», دەدى تيمۋر سۇلەيمەنوۆ.
قازاقستان قارجىگەرلەرى قاۋىمداستىعىنىڭ باسشىسى ەلەنا باحمۋتوۆا قوس بيرجانى KASE بازاسىندا بىرىكتىرۋ كەرەك دەگەن ويعا باسىمدىق بەرەدى. ونىڭ ايتۋىنشا, نەگىزگى وتىمدىلىك KASE-دە شوعىرلانعان.
قارجى نارىعىن رەتتەۋ جانە دامىتۋ اگەنتتىگىنىڭ باسشىسى ءمادينا ابىلقاسىموۆا قوس بيرجانى بىرىكتىرۋدە قاتار ەلىنىڭ تاجىريبەسىنە سۇيەنۋ قاجەت ەكەنىن ايتادى.
قازاقستان قور بيرجاسىنىڭ قۇرىلعانىنا بيىل – 31 جىل. 1993 جىلدىڭ 17 قاراشاسىندا شەتەل ۆاليۋتاسىنىڭ ساۋدا-ساتتىعىن ۇيىمداستىرۋ ءۇشىن قازاقستان بانكارالىق ۆاليۋتالىق بيرجاسى قۇرىلىپ, بىرنەشە جىلدان كەيىن اتاۋى قازاقستان قور بيرجاسى دەپ وزگەرتىلگەن. KASE-ءنى قازىرگى ۋاقىتتا ەلىمىزدەگى قور جانە ۆاليۋتالىق نارىققا قىزمەت كورسەتەتىن, قارجى نارىعىنىڭ اجىراماس ينفراقۇرىلىمى بولىپ سانالاتىن جانە وتاندىق ەكونوميكادا ماڭىزدى ورىن الاتىن بيرجا دەپ ايتا الامىز.
AIX 2017 جىلى «استانا» حالىقارالىق قارجى ورتالىعىن دامىتۋ شەڭبەرىندە قۇرىلعان. بيرجا اعىلشىن قۇقىعىنىڭ قاعيدالارىنا نەگىزدەلگەن نورماتيۆتىك-قۇقىقتىق بازا شەڭبەرىندە جۇمىس اتقارادى, وسى ارقىلى سەنىمدى ينۆەستيتسيالىق ورتانى قامتاماسىز ەتەدى.
