البەتتە كەز كەلگەن ينۆەستور شارۋاشىلىق جۇرگىزۋگە وڭتايلى بولۋى ءۇشىن شيكىزات قورى مەن تاسىمال ءىسى, كاسىپورىن ورنالاساتىن جەردىڭ ينفراقۇرىلىمى ءۇشىن ىڭعايلى جەر ىزدەيدى. ويتكەنى ينۆەستور بەلگىلى ءبىر مەرزىمدەگى پەرسپەكتيۆادا تابىس تابۋدى كوزدەيدى. بۇل تۇرعىدان العاندا توعىز جولدىڭ تورابىندا ورنالاسقان شۋ اۋدانى – قولايلى ايماق.
اۋدان ىرگەسىندەگى بىرلىك اۋىلدىق وكرۋگىنە ات باسىن بۇرعان يراندىق ينۆەستور بىرنەشە جىل بەدەرىندە جەمىستى جۇمىس اتقارىپ ءجۇر. «KazIrAgro» جشس وندىرەتىن ماقسارى مايى نەگىزىنەن ەكسپورتقا باعدارلانعان. سەرىكتەستىك كەيىنگى جىلدارى اتالعان ءونىمدى ءوڭىر برەندىنە اينالدىرعان. جۇزەگە اسىرىلعان جوبانىڭ جالپى قۇنى 3 ميلليون دوللاردى قۇرايدى. كاسىپورىندا جەتپىسكە جەتەقابىل ادام ەڭبەك ەتەدى. ونىڭ جارتىسىنان كوبى – جەرگىلىكتى ازاماتتار. ءوندىرىس وشاعى تولىق قۋاتىندا جۇمىس ىستەگەن جاعدايدا تاۋلىگىنە 3 توننا ماقسارى مايىن وندىرۋگە قاۋقارلى.
سەرىكتەستىك باسشىلارى بىرقاتار ەۋروپا ەلىمەن تىعىز قارىم-قاتىناس ورناتقان. ماسەلەن, اليناگيان حاميدرەزانىڭ يەلىگىندەگى كاسىپورىن «Safloria» اتاۋىمەن شىعاتىن ءونىمدى بۇعان دەيىن قىتاي, رەسەي, نيدەرلاند, چەحيا ەلدەرىنە ەكسپورتتاپ كەلگەن. قايبىر جىلى جاپونيا ەلىنىڭ ازاماتتارى دا قازاقستاندا وندىرىلەتىن مايدى ساتىپ الۋ بويىنشا كەلىسىمگە كەلىپتى.
«راسىندا سەرىكتەستىك وندىرەتىن «Safloria» مايىنا دەگەن سۇرانىستىڭ ارتىپ جاتقانى كوڭىل قۋانتادى. يراندىق ينۆەستوردىڭ كەلۋىمەن جاندانعان جۇمىس بۇگىندە لايىقتى تۇردە جالعاسىپ جاتىر. ماسەلەن, 2018 جىلى وندىرىلگەن ءونىم كولەمى 991,7 مىڭ توننانى قۇراسا, 2019 جىلى 1419,73 تونناعا جەتكەن. وسىلايشا, وندىرىلگەن ماي كولەمى جىل سايىن ارتىپ وتىرعان. جۇمىس بارىسىندا كەزدەسكەن كەيبىر كەدەرگىلەر جەرگىلىكتى اتقارۋشى بيلىكتىڭ ارالاسۋىمەن دەر كەزىندە شەشىمىن تاۋىپ جاتىر. شۋ اۋدانى اۋماعىندا وندىرىلگەن ماقسارى مايىن ەۋروپا مەن ازيانىڭ ءبىراز ەلى تۇتىنادى», دەيدى شۋ اۋدانى كاسىپكەرلىك ءبولىمىنىڭ باسشىسى جەڭىس نۇرعاليەۆ.
ماماننىڭ دەرەگىنە جۇگىنسەك, 2020 جىلى «KazIrAgro» ءونىمى چەحيا, جاپونيا, قىتاي, وزبەكستان سەكىلدى ءتورت مەملەكەتكە جونەلتىلىپتى. وتكەن جىلى 360 توننا ماقسارى مايى قىتاي, وزبەكستان, گەرمانيا مەملەكەتتەرىنە ەكسپورتتالعان.
«جۇمىسشىلاردىڭ ورتاشا جالاقىسى 170 مىڭ تەڭگەنى قۇراپ وتىر. كومپانيانىڭ قۋاتى كۇنىنە 9,6 توننا ءونىم وندىرۋگە جەتەدى. سەرىكتەستىك باسشىلارى وتكەن جىلى 1 200 گەكتار اۋماققا ماقسارى داقىلىن ەككەن. «Safloria» مايىنىڭ ءوڭىر برەندىنە اينالعانىن اۋىز تولتىرىپ ايتا الامىز. وڭىرگە كەلگەن ءاربىر الەۋەتتى ينۆەستور جەرگىلىكتى حالىقتى جۇمىسپەن قامتۋعا اتسالىسادى. بۇل باعىتتاعى جۇمىستار الداعى ۋاقىتتا دا جالعاسادى», دەيدى ج. نۇرعاليەۆ.
جامبىل وبلىسى,
شۋ اۋدانى
