اپتا باسىندا اسپاناستى ەلىنىڭ ىلە-قازاق اۆتونوميالىق وبلىسىنىڭ ىسكەرلىك بىرلەستىگىنىڭ 70 وكىلى قوناەۆ قالاسىنا كەلدى. ولار وتاندىق كاسىپكەرلەرمەن ەكىجاقتى ىنتىماقتاستىق قۇرۋعا قىزىعۋشىلىق تانىتىپ وتىر.
الماتى وبلىسىنىڭ اكىمدىگىندە القالى جيىن ءوتىپ, وندا ءوزارا ءتيىمدى ىنتىماقتاستىق پەن ەكونوميكانىڭ ءتۇرلى سالالارىنداعى جوبالاردى بىرلەسىپ جۇزەگە اسىرۋدىڭ كەلەشەگى تالقىلاندى. وندا تۋريزم, اۋىل شارۋاشىلىعى جانە قۇرىلىس سالالارىنا ەرەكشە كوڭىل ءبولىندى. كەزدەسۋگە قاتىسۋشىلار سەرىكتەستىكتى كەڭەيتۋ جانە وسى سالالاردى دامىتۋعا باعىتتالعان ناقتى باستامالاردى جۇزەگە اسىرۋ مۇمكىندىكتەرىن ورتاعا سالدى.
شۇار ساۋدا-ونەركاسىپ پالاتاسى باسشىسىنىڭ ورىنباسارى تۇرسىنجان مۇحات ۇلى ءوز سوزىندە, الماتى وبلىسىنىڭ كاسىپكەرلەرى مەن قىتايدىڭ ىلە-قازاق اۆتونوميالىق ايماعى بيزنەس-قاۋىمداستىعى وكىلدەرى اراسىنداعى ىنتىماقتاستىقتىڭ كەلەشەگى زور ەكەنىنە سەنىم ءبىلدىردى. ول ءوڭىردىڭ ينۆەستيتسيالىق تارتىمدىلىعىنىڭ جوعارى دەڭگەيى ەكونوميكانىڭ ءتۇرلى سالالارىندا, بىرلەسكەن جوبالاردى جۇزەگە اسىرۋعا قولايلى الاڭ تۋعىزاتىنىن باسا ايتتى. سونداي-اق وڭىردە تۋريزم, اۋىل شارۋاشىلىعى جانە قۇرىلىس سالالارىنىڭ بەلسەندى دامۋى ينۆەستيتسيا مەن ءوزارا ءتيىمدى ىنتىماقتاستىققا كەڭ مۇمكىندىكتەر بەرەتىنىن دە اتاپ ءوتتى.
ءوز كەزەگىندە الماتى وبلىسى اكىمىنىڭ كەڭەسشىسى ايبار تەمەنوۆ, قازاقستان مەن قىتاي اراسىنداعى ۇزاق مەرزىمدى قارىم-قاتىناستاردىڭ جوعارى دەڭگەيىن, تابىستى جۇزەگە اسىرىلعان جوبالاردىڭ سانىمەن راستالعانىن اتاپ ءوتتى.
«جىل سايىن ءوزارا ءتيىمدى بايلانىس تەك نىعايىپ كەلەدى, بۇل ىنتىماقتاستىقتى ودان ءارى دامىتۋعا جانە ەكى ەلدىڭ بيزنەسى مەن ەكونوميكاسى ءۇشىن جاڭا پەرسپەكتيۆالىق مۇمكىندىكتەر جاساۋعا ىقپال ەتەدى. الماتى وبلىسى مەن قىتايدىڭ ىلە-قازاق اۆتونوميالىق وبلىسى اراسىنداعى ارىپتەستىكتى ءوزارا كەڭەيتۋ ايماقتار اراسىنداعى ەكونوميكالىق بايلانىستى نىعايتۋعا سەپتىگىن تيگىزەتىنىنە سەنىمدىمىن», دەدى ايبار تەمەنوۆ.
