قوستانايداعى گۋمانيتارلىق كومەك ورتالىقتارىنىڭ ءبىرى «اۋەجاي» شاعىن اۋدانىنداعى ءاليحان بوكەيحان اتىنداعى مەكتەپتىڭ سپورت زالىنا ورنالاسقان. اتالعان ورتالىققا ارنايى بارىپ قايتتىق. ءبىز كەلگەندە احمەت بايتۇرسىن ۇلى اتىنداعى قوستاناي ۋنيۆەرسيتەتىنىڭ وقىتۋشىلارى مەن ستۋدەنتتەرى الماتى مەنەدجمەنت ۋنيۆەرسيتەتى جىبەرگەن گۋمانيتارلىق كومەكتى ءتۇسىرىپ جاتتى.
«الماتىداعى ارىپتەستەرىمىز الدىن الا حابارلاسىپ, كولىكتى كۇتىپ الىپ, جۇكتى ءتۇسىرىسىپ جىبەرسەڭىزدەر ەكەن دەگەن سوڭ, ۆولونتەر ستۋدەنتتەرمەن بىرگە وسىندا كەلىپ قالدىق. 10 توننا جۇكتى «قازلوگيستيك» سەرىكتەستىگى سوناۋ الماتىدان تەگىن جەتكىزىپ بەردى. جارتىسىن وسىندا تۇسىرەمىز, قالعانىن اقتوبەگە اپارىپ بەرەدى. بىزگە كوبىنە ەلەكتر گەنەراتورلارى, ازىق-ت ۇلىك, كيىم-كەشەك, رەزەڭكە ەتىك كەرەك. بۇل كەلگەن گۋمانيتارلىق كومەك الماتى مەنەدجمەنت ۋنيۆەرسيتەتىنىڭ وقىتۋشىلارى مەن پروفەسسورلارىنىڭ, جالپى قالا, وبلىس تۇرعىندارىنىڭ كۇشىمەن جينالعان. مىسالى, كەگەن اۋدانى سۇيىق ماي جىبەرگەن», دەدى ا.بايتۇرسىن ۇلى ۋنيۆەرسيتەتى تاريح كافەدراسىنىڭ مەڭگەرۋشىسى راۋان بايدالى.
ۆولونتەرلەر جۇكتى ءتۇسىرىپ بولا بەرگەندە قوستانايعا كەلىپ جاتقان گۋمانيتارلىق كومەكتى قابىلداپ, ونى ءارى قاراي تاراتۋعا جاۋاپتى بولىپ بەكىتىلگەن وبلىس اكىمىنىڭ ورىنباسارى رينات مۇحامەتقاليەۆ تە كەلدى. جانگەلدين اۋدانىنا ەلەكتر گەنەراتورلارىن تيەپ جىبەرۋ كەرەك ەكەن. رينات زاكي ۇلى ورتالىق باسشىسىنىڭ ەسەبىن تىڭداپ, تورعايعا جىبەرىلەتىن جۇكتىڭ كولەمىن ناقتىلاپ بولعان سوڭ, گۋمانيتارلىق كومەكتىڭ قالاي تاراتىلىپ جاتقانىن ايتىپ بەردى.
«الدىمەن سۋ تاسقىنى بولعان اۋدانداردان ءوتىنىم قابىلدايمىز. بىزگە حابارلاسىپ «نە كەرەك, قانداي زات اكەلگەن دۇرىس؟» دەپ سۇراعان باسقا وڭىرلەرگە ءبىز اۋدانداردان تۇسكەن سۇرانىسقا سايكەس كەرەك دۇنيەلەردىڭ ءتىزىمىن بەرەمىز. مىسالى, قازىر ءبىرشاما اۋىلدا ەلەكتر جارىعى جوق, سوندىقتان حابارلاسقان ادامدارعا بىزگە اۆتونومدى گەنەراتورلار كەرەك ەدى دەپ جاتىرمىز. كەلگەن گەنەراتورلاردى بىردەن جارىقسىز وتىرعان ەلدى مەكەندەرگە جونەلتەمىز. قازىر وزدەرىڭىز كورىپ تۇرعان جۇك كولىگى تىركەمەسىنە سىيعانىنشا تورعايعا 100 شاقتى گەنەراتور الىپ كەتەدى. جارىقسىز وتىرعان امانگەلدى, جانگەلدين اۋداندارى قازىر اۋىزسۋ تاپشىلىعىن سەزىنىپ وتىر. سوندىقتان ءبىز كومەك كورسەتۋگە نيەت بىلدىرگەن جەرگىلىكتى ازاماتتارعا, وزگە وڭىرلەرگە تازا اۋىزسۋ اكەلگەندەرىڭىز دۇرىس دەگەن تىلەگىمىزدى ءبىلدىرىپ جاتىرمىز. اۋىزسۋ بىزگە سوناۋ شىمكەنتتەن دە كەلدى. جامبىل, شىمكەنت, الماتى, استانا, قىزىلوردا سياقتى ءوز وڭىرلەرىمىزدىڭ سىرتىندا, قىرعىزستان, وزبەكستان ءتارىزدى الىس-جاقىن شەتەلدەن دە كومەك كەلىپ جاتىر. مۇنىڭ سىرتىندا, گۋمانيتارلىق كومەك اكەلدىك, بىراق حالىققا ءوزىمىز تىكەلەي تاراتىپ بەرگىمىز كەلەدى دەپ جاتقان اعايىن بار. ءبىز مۇنداي كىسىلەردى ارقالىق, امانگەلدى, جانگەلدين اۋداندارىنا جىبەرىپ جاتىرمىز», دەدى اكىمنىڭ ورىنباسارى.
احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتى مەن قوستاناي اۋدانىنداعى ءالجان اۋىلىندا دا گۋمانيتارلىق كومەك تاراتۋ بەكەتتەرى جۇمىس ىستەپ جاتىر. بۇل ورىندارعا كەلىپ ءتۇسىپ جاتقان دۇنيەلەردى سۇرىپتاپ, رەتتەپ, ونى ءارى قاراي حالىققا تاراتۋ ىسىندە ۋنيۆەرسيتەت وقىتۋشىلارى مەن ستۋدەنتتەردىڭ, ۆولونتەرلەردىڭ ەڭبەگى زور.
بۇگىندە وڭىردە وبلىس اكىمدىگىنىڭ جانىنان قۇرىلعان قوعامدىق شتابتىڭ قۇرامىنداعى ءماسليحات دەپۋتاتتارى, وڭىرگە بەلگىلى ازاماتتار, ءدىن قىزمەتكەرلەرىنەن تۇراتىن 58 ادام بەلسەندى جۇمىس ىستەپ جاتىر. ولار تىكۇشاقپەن ءالى دە سۋ قۇرساۋىندا جاتقان ەلدى مەكەندەردى ارالاپ, تۇرعىندارمەن جۇزدەسىپ, قاي ەلدى مەكەنگە نە جەتپەي جاتقانىن انىقتاپ, حالىقتىڭ قاجەتىن دەر كەزىندە تاۋىپ بەرۋدىڭ قامىمەن ءجۇر.
«اتالعان قوعامدىق شتاب وكىلدەرى وزدەرى بارعان اۋىلدىڭ احۋالى تۋرالى ماعان كۇندەلىكتى اقپارات بەرىپ وتىرادى. مەن وسى اقپارات نەگىزىندە جەدەل كومەك ۇيىمداستىرىپ, شالعايداعى اۋىلدىڭ قاجەتىنە جارايتىن جۇكتى جىبەرىپ وتىرامىن. مىسالى, كەشە تاڭەرتەڭ امانگەلدى اۋدانىنداعى قوعامدىق شتاب وكىلدەرىنەن گەنەراتور جەتپەي جاتىر دەگەن حابار كەلىپ ءتۇستى. ءبىز بىردەن كاسىپكەرلەرمەن سويلەسىپ, كولىك تاۋىپ, كەشكە دەيىن 100-دەن اسا گەنەراتور جەتكىزىپ بەردىك», دەيدى رينات زاكي ۇلى.
قوستاناي وبلىسى
