حالىققا بەرىلگەن كرەديتتەر 2024 جىلعى اقپاندا 2,2%-عا ۇلعايىپ, 17,2 ترلن تەڭگەگە جەتتى. 2024 جىلدىڭ باسىنان بەرى 3,4%-عا وسكەن. يپوتەكالىق نەسيە كولەمى 1,3%-عا, 5,4 ترلن تەڭگەگە وسسە, تۇتىنۋشىلىق قارىز 2,7%-عا, 10,7 ترلن تەڭگەگە دەيىن ارتقان.
ۇلتتىق بانك دەرەگى بويىنشا, 2022 جىلدان باستاپ بانك جۇيەسى ورتاشا ەسەپپەن اي سايىن نەسيە پورتفەلىن 1,7 پايىزدىق تارماققا ۇلعايتقان. 2024 جىلدىڭ اقپان ايىنىڭ سوڭىنداعى جاعداي بويىنشا بانك جۇيەسىنىڭ نەسيە پورتفەلى 28,4 ترلن تەڭگە دەڭگەيىندە بولدى, بۇل 2024 جىلدىڭ قاڭتارىمەن سالىستىرعاندا 2,1%-عا ارتىق. جىلدىق ماندە نەسيە پورتفەلى 2024 جىلعى اقپاننىڭ سوڭىندا 24,2 پايىزدىق تارماققا ءوستى (2023 جىلدىڭ اقپان ايىنىڭ قورىتىندىسىمەن سالىستىرعاندا).
ەكونوميكاعا ەڭ كوپ نەسيەنى بەرگەن – «قازاقستان حالىق جيناق بانكى» اق. قارجى ينستيتۋتى جالپى سوماسى 9,4 ترلن تەڭگەنى ماقۇلداعان. بۇل ەكىنشى دەڭگەيلى بانكتەر (ەدب) جالپى نەسيە پورتفەلىنىڭ 31,9%-ىن قۇرايدى. ودان كەيىن 4,5 ترلن تەڭگە سوماسىمەن «Kaspi Bank» اق, 3,2 ترلن تەڭگە سوماسىمەن «وتباسى بانك» اق جانە 3 ترلن تەڭگە سوماسىمەن «تسەنتر كرەديتبانكى» اق تۇر. ەدب جيىنتىق نەسيە پورتفەلىندەگى ولاردىڭ ۇلەسى تيىسىنشە 15,3%, 10,9% جانە 10,3%-دى قۇرايدى.
سونىمەن قاتار ەڭ كوپ مەرزىمى وتكەن نەسيە بەرەشەگى Kaspi-دە جينالىپ قالىپتى. ودان كەيىن «قازاقستان حالىق جيناق بانكى» اق مەن «First Heartland Jusan Bank» اق بانكتەرى ورنالاسقان.
جالپى, 90 كۇننەن اسىپ وتەلمەگەن نەسيە بەرەشەگىنىڭ (NPL 90+) كولەمى نەسيە پورتفەلىنىڭ 3,0%-ىن نەمەسە 906 ملرد تەڭگەنى قۇراپ وتىر. 2024 جىلعى 1 قاڭتاردا بۇل كورسەتكىش 2,9% نەمەسە 863 ملرد تەڭگە دەڭگەيىندە بولعان.
«ماكروەكونوميكالىق تۇرعىدان العاندا نەسيە پورتفەلى ءوسىمىنىڭ وڭ قىرى دا بار. بىرىنشىدەن, بۇل ءۇردىس قازاقستانعا ەكونوميكالىق ودان ءارى دامۋ مۇمكىندىكتەرىن بەرەدى, ونىڭ وندىرىستىك قۋاتىن كەڭەيتۋگە جانە جاڭعىرتۋعا مۇمكىندىك اشادى. جۇمىسپەن قامتۋدىڭ وسۋىنە جانە حالىقتىڭ ءومىر ءسۇرۋ ساپاسىن جاقسارتۋعا ىقپال ەتەدى», دەيدى ساراپشىلار.
2024 جىلعى اقپاننىڭ قورىتىندىسى بويىنشا بانكتەردىڭ تازا پايداسى 390 ملرد تەڭگە بولدى. بۇل 2023 جىلعى اقپانعا قاراعاندا 18,0%-عا كوپ. بانكتىك اكتيۆتەردىڭ رەنتابەلدىلىگى (ROA) 2024 جىلعى 1 ناۋرىزداعى جاعداي بويىنشا 4,7%-دى (2023 جىلعى 1 ناۋرىزداعى جاعداي بويىنشا – 3,8%), كاپيتال رەنتابەلدىلىگى (ROE) 35,6%-دى (2023 جىلعى 1 ناۋرىزداعى جاعداي بويىنشا – 31,6%) قۇرادى.
