– «كەلەشەك-2024» حالىقارالىق تۋرنيرىنە قىرعىزستان, قازاقستان, وزبەكستان جانە ازەربايجاننان 600-دەن اسا گيمناستشىلار قاتىستى. ا توبىندا ازەربايجان جانە قىرعىزستان ۇلتتىق قۇراما مۇشەلەرى باق سىناستى. ماڭعىستاۋدان بارعان 22 گيمناستشى ۇلكەن ارەنادا ونەر كورسەتتى. جارىس ناتيجەسى بويىنشا سپورتشىلاردىڭ 12-ءسى قولا, 13-ءى كۇمىس جۇلدەنى ەنشىلەپ, 11-ءى التىن مەدالمەن ماراپاتتالدى. بۇل – ءبىز ءۇشىن ۇلكەن جەتىستىك. دايىندىقتى جالعاستىرا بەرەمىز. ماڭعىستاۋ گيمناستشىلارى الدا زور جەتىستىكتەرگە جەتەتىنىنە سەنىم مول, – دەيدى وبلىستىق اتالعان سپورت ءتۇرى فەدەراتسياسىنىڭ باسشىسى ايدا ساداتقىزى.
فەدەراتسيا باسشىسىنىڭ ايتۋىنشا, قازاقستان قۇراماسى سپورت شەبەرلەرى جانە سپورت شەبەرىنە ۇمىتكەر باعدارلاماسىندا ونەر كورسەتكەن توپتار بويىنشا جالپى ەسەپتە 2-ورىنعا يە بولعان جانە بىرقاتار ماڭعىستاۋلىق گيمناستشىلاردىڭ ۇزدىك ناتيجەلەرى ءۇشىن قىرعىزستان كوركەم گيمناستيكا فەدەراتسياسى كۋبوگىمەن ماراپاتتالۋى دا ءوڭىر گيمناستيكاسىنىڭ بۇگىنگى دەڭگەيىن, قارقىنىن تانىتا تۇسەدى.
ءارى ونەر, ءارى سپورت سانالاتىن كوركەم گيمناستيكا ادام تۇلعاسىنىڭ قالىپتاسۋ, جەتىلۋ سىمباتىنا ەرەكشە كۇش بەرەدى. قيىندىعى مەن قىزىعى قاتار جۇرەتىن جاتتىعۋعا قاتىسۋشىلار قاتارىنىڭ سيرەمەۋى دە سول سەبەپتى بولسا كەرەك.
ماڭعىستاۋ وبلىسى
