203 394!

بۇل – توقسان بەستىڭ تورىندەگى تارالىمىمىز

تاۋەلسىزدىك تويىنىڭ قارساڭىندا «ۇلت ۇياسىنداعى ۇلاعات» دەگەن جيناق شىعارعانبىز. ەلباسىمىزدىڭ ۇلىتاۋ تورىندەگى تاريحي سۇحباتىنان تۋىنداعان تولعانىستاردىڭ باسىن قوسقان سول كىتاپتىڭ تۇساۋكەسەرىندە جۇرتشىلىققا مىنانداي جايدى ايتقانبىز. پرەزيدەنت سۇحباتىنا العاشقى ۇنقوسۋ پىكىرلەرى رەداكتسياعا  ول اڭگىمەنىڭ ءماتىنى گازەت بەتىنە باسىلماي تۇرىپ-اق ءتۇسىپ ۇلگەردى. ۇلىتاۋداعى سۇحبات   «حابار» ارناسىنان 24 تامىزدا كەشكى ساعات 22.00-دە  بەرىلدى. كۇن جەكسەنبى  بولاتىن. ەرتەسىنە تاڭەرتەڭ جۇمىسقا كەلسەك, سۇحباتقا ءۇن قوسقان ەكى  پىكىر ۇستەلىمىزدە جاتىر. تاعى ەكى پىكىر تۇسكە تامان ءتۇستى. ءبارى ەلەكتروندى پوشتامەن كەلگەن. «حاباردان» ەلباسىنىڭ اڭگىمەسىن تىڭداعاندارىن, كەيىننەن «اقوردا» سايتىنان  وقىعاندارىن ايتادى, رازىلىقتارىن بىلدىرەدى, ويلارىن ورتاعا سالادى. بۇل نەنى كورسەتەدى؟ بۇل ەل حالقىنىڭ  ەڭ دىلگەر ءسوزىن الدىمەن «ەگەمەن قازاقستانعا» ايتۋعا اسىعاتىنىن كورسەتەدى. بۇل وقىرماننىڭ ەل گازەتىنە سەنەتىنىن, وسىندا جاريالانعان ءسوز حالىققا بارىنشا كەڭىنەن تارايتىنىن بىلەتىنىن كورسەتەدى. سول سەنىم, مىنە, بۇگىن ءبىزدى تاعى ءبىر بيىككە شىعارىپ وتىر. وسى جاڭا عانا «ەگەمەن قازاقستان» باسىلاتىن بارلىق 15 باسپاحانادان ەڭ سوڭعى, تۇپكىلىكتى مالىمەتتەردى الدىرىپ بىتتىك. بۇگىننەن باس­تاپ استاناداعى «ەRNUR» مەديا حولدينگى – 11 144,  الماتىداعى «ءداۋىر» – 18 099, قاراعاندىداعى «قاراعاندى پوليگرافيا» – 14 821,  قوستانايداعى «قوستاناي پوليگرافيا» – 4 220, قىزىلورداداعى «ەنەرگوپرومسەرۆيس» – 18 945, اقتاۋداعى «Caspiy Print» – 6 315, اقتوبەدەگى «حابار سەرۆيس» – 10 488, اتىراۋداعى  «اتىراۋ اقپارات» – 13 413, شىمكەنتتەگى «Ernur Print» – 38 371, پاۆلودارداعى «دوم پەچاتي» – 11 827, پەتروپاۆلداعى «پوليگرافيا» – 7 909, تارازداعى «سەنىم» – 16 840,  ورالداعى «جايىق پرەسس» – 14 373, تالدىقورعانداعى «وفسەت» – 4 015, وسكەمەندەگى «پەچاتنوە اگەنتستۆو رەكلامنىي دايدجەست» – 12 614 دانا گازەت باسپاقشى. بارلىعى – 203 394 دانا! ويىمىزداعى بولىپتى. ورتامىز تولىپتى. گازەت 200 مىڭنان اساتىن تاماشا تارالىمىن ساقتاپ قالىپتى. ءتىپتى ءبىراز دانا قوسىپ تا الىپتى. سونىمەن, ەل گازەتى «ەگەمەن قازاقستاننىڭ» 2015 جىلعى وسى تۇڭعىش ءنومىرى ەكى ءجۇز ءۇش مىڭ ءۇش ءجۇز توقسان ءتورت دانا تارالىممەن باسىلىپ وتىر. بۇل وتكەن جىلعى كورسەتكىشتەن (201 715 دانا) 1 679 داناعا ارتىق. جاڭا جىلدىڭ تابالدىرىعىندا تۇرىپ ءبىز ەل گازەتىنە سەنىمىن تاعى كورسەتكەن بارشا وقىرمان اعايىنعا اق العىسىمىزدى ايتامىز. ءبىز باعىندىرعان بۇل بيىكتىڭ استارىندا ەڭ الدىمەن ەل حالقىنىڭ ەلدىك ساناسىنىڭ جوعارىلاي ءتۇسۋى, ءبىز ءدايىم ناسيحاتتاۋدان تانبايتىن ەلباسى ساياساتىن قولداۋى, مەملەكەتتىك ءتىل مارتەبەسىنىڭ جىلدان-جىلعا ورنىعۋى,  جۇرتشىلىقتىڭ ءال-اۋقاتىنىڭ ارتۋى تۇرعانىن جاقسى تۇسىنەمىز. «مەملەكەت گازەتىنىڭ مەملەكەتتىك ساياساتتى مەملەكەتتىڭ كومەگىمەن اتقاراتىنى ابدەن تابيعي جاي» دەپ جاقىندا ءوزىمىز جازعانىمىزداي, گازەتكە جازىلىم ناۋقانىنا جاناشىرلىق تانىتقان بارشا ازاماتتارعا دا العىسىمىزدى ايتامىز. توقسان بەس جاستىڭ تورىنە كوتەرىلگەن «ەگەمەن قازاقستان» الداعى كەزدە دە ەلدىكتىڭ جارشىسى, مەملەكەتتىلىكتىڭ مىنبەرى, جاسامپازدىقتىڭ جىلناماشىسى ميسسياسىن ابىرويمەن اتقارا بەرەدى دەپ سەندىرەمىز. جاڭا جىلدا جازار جاقسىلىعىمىز كوپ بولسىن! ساۋىتبەك ابدراحمانوۆ.