سۋ تاسقىنىنان زارداپ شەككەن ازاماتتارعا اپتا سوڭىنا دەيىن وتەماقى تولەنەدى

باسپاناسىنان ايىرىلعان تۇرعىندار ءۇشىن زارداپ شەگۋشىنىڭ ءوز تاڭداۋى بويىنشا جاڭا ۇيلەر سالىنادى نەمەسە نارىقتان دايىن باسپانا ساتىپ الىنادى. ساياجاي بويىنشا, ەگەر ول زارداپ شەككەن ادامنىڭ جالعىز ءۇيى بولسا, وسىنداي تەتىك قولدانىلادى.

كەڭەستە سۋ تاسقىنى سالدارىنان زارداپ شەككەن وڭىرلەردىڭ اكىمدەرى كەلتىرىلگەن زالالدى وتەۋ بويىنشا جۇرگىزىلىپ جاتقان جۇمىستاردىڭ ناتيجەلەرى تۋرالى باياندادى. ماسەلەن, پاۆلودار وبلىسىندا دەمەۋشىلەرمەن بىرگە 119 ءۇي بويىنشا زالال وتەلىپ, تۇرۋعا جارامسىز 5 ءۇيدىڭ قۇرىلىسى باستالدى. قوستاناي وبلىسىندا زارداپ شەككەندەر ءۇشىن ارقالىق قالاسىنان 27 پاتەر ساتىپ الىندى, 1 600 وتباسىنا الەۋمەتتىك كومەك تولەندى. اقتوبە وبلىسىندا 44 وتباسىنا 94,3 ملن تەڭگە كولەمىندە ماتەريالدىق شىعىن وتەلدى; 57 جاڭا ءۇيدىڭ قۇرىلىسى باستالدى. 

اكىمدىكتەردىڭ جەدەل دەرەكتەرى بويىنشا, بۇگىندە زارداپ شەككەن ۇيلەر سانى – 9 627, ونىڭ ىشىندە 9 610 جەكە, 17 كوپپاتەرلى تۇرعىن ءۇي. 2 123 ۇيگە جۇرگىزىلگەن تەحنيكالىق تەكسەرۋ ناتيجەلەرىنە سايكەس 1 067 ءۇي قالپىنا كەلتىرۋگە جاتپايتىنى انىقتالدى, ال 1 056 ۇيگە جوندەۋ جۇمىستارىن جۇرگىزۋگە رۇقسات ەتىلگەن. 

زارداپ شەككەن تۇرعىن ۇيلەرگە كەلتىرىلگەن زالالدى باعالاۋ جۇمىستارى جالعاسىپ جاتىر. 

ۇكىمەت باسشىسى بۇل الدىن الا جاسالعان دەرەكتەر ەكەنىن جانە بىرقاتار وڭىرلەردەگى كۇردەلى سۋ تاسقىنى جاعدايىن ەسكەرە وتىرىپ, شىعىن اۋقىمى ارتا ءتۇسۋى مۇمكىن ەكەنىن اتاپ ءوتتى. 

«پرەزيدەنت سۋ تاسقىنىنان زارداپ شەككەن ازاماتتاردىڭ بارلىعىنا بارىنشا كومەك كورسەتۋدى باستى مىندەت ەتىپ قويدى. سۋ تارتىلعان وڭىرلەردە اكىمدىكتەر زارداپ شەككەن ازاماتتاردىڭ, جوعالعان نەمەسە ب ۇلىنگەن م ۇلىكتەردىڭ ءتىزىمىن جاساۋ جانە باعالاۋ جۇمىستارىن اياقتاپ, شىعىنداردى وتەۋگە كىرىسۋى كەرەك. بۇل رەتتە, تىزىمگە ۇيلەرى ساۋ, ەشقانداي زارداپ شەكپەگەن ادامدار كىرىپ كەتپەۋگە ءتيىس. كوميسسيالاردىڭ جۇمىسىن ەشقانداي بيۋروكراتياعا سالماي, جەدەل ۇيىمداستىرۋ قاجەت. بارلىق ءتيىستى قىزمەتتەر جۇمىلىپ, كۇشەيتىلگەن رەجيمدە جۇمىس ىستەسىن», دەپ اتاپ ءوتتى ولجاس بەكتەنوۆ. 

زارداپ شەككەن وڭىرلەر اكىمدىكتەرىنە جاۋاپتى تۇلعالاردى جەكەلەگەن ۋچاسكەلەرگە بەكىتە وتىرىپ, سۋ باسقان عيماراتتاردى تەحنيكالىق تەكسەرۋ جۇمىستارىن جەدەل اياقتاۋ, جوبالاردى جەرگىلىكتى جەرگە بايلانىستىرۋ ءۇشىن تەز ارادا جاڭا جەر تەلىمدەرىن انىقتاۋ تاپسىرىلدى. پرەمەر-مينيستر ىقتيمال سۋ تاسقىنىنان بارىنشا قاۋىپسىز, دامۋ پەرسپەكتيۆاسى جوعارى جانە ينفراقۇرىلىممەن قامتاماسىز ەتىلگەن دايىن ۋچاسكەلەردى پايدالانۋدى باسىمدىق رەتىندە بەلگىلەدى.