فوتو: bugin.kz
ماجىلىسمەن بۇگىنگى ساۋالىن حالىق ءسوزى دەپ قابىلداۋدى سۇرادى. ول بيىلعى سۋ تاسقىنى تابيعي اپات رەتىندە سيپاتتالسا دا, ادامي سالعىرتتىقتىڭ دا بار ەكەنىن جوققا شىعارمادى.
«توسىننان كەلگەن توپان سۋدى قانشا جەردەن تابيعي قۇبىلىس دەسەك تە, اپاتقا كىنالى ادامي سالعىرتتىقتار دا بار. دالەلىمەن ايتساق, اتىراۋ وبلىسى مەن قۇلسارى قالاسىنىڭ ماڭىنان زاڭسىز سالىنعان سۋ بوگەتتەرى, جەرگىلىكتى بيلىكتىڭ كوكتەمگى سۋ تاسقىنىنا ءالسىز ازىرلەنگەنى, سىن ساعاتتا ابدىراعان جۇرتتىڭ ارەكەتىن ۇيلەستىرە الماۋى دا وسىنداي سالدارعا اكەلىپ سوقتى», دەدى رينات زايتوۆ.
دەپۋتات جاقىندا پارلامەنت كۋلۋارىندا كوتەرىلگەن ماسەلەگە جەتە كوڭىل بولمەۋدىڭ دە سالدارى تيگەنىن اشىق ايتتى. ماجىلىسمەندەردىڭ اتىنان ءسوز العان دەپۋتات: «پرەزيدەنتىمىز ايتقانداي, جاۋاپكەرشىلىك الۋدان قاشىپ, جۇمىستى ءبىر-بىرىنە سىلتەپ وتىراتىن قىزمەتكەرلەر مەن جەرگىلىكتى ءىرى كومپانيالار جازالانۋ ءتيىس», دەدى.
سونداي-اق دەپۋتات مەملەكەت تاراپىنان كورسەتىلەتىن كومەكتىڭ جۇيەلى جوسپارىن ازىرلەپ, حالىققا ءتۇسىندىرۋدى ۇسىندى.
«اپات سالدارىنان زارداپ شەككەن حالىق ءوز شىعىندارى قالاي ەسەپتەلىپ, قالاي وتەلەتىنىن ءالى دە تولىق بىلمەيدى, ويتكەنى, بۇل شارالاردىڭ ناقتى الگوريتمى جاسالماعان, كوميسسيا قالاي قۇرىلىپ, قالاي جۇمىس جاسايتىنى جايلى حالىققا دۇرىس حابارلانباعان. سول سەبەپتەن كوميسسيا جۇمىسىن جەڭىلدەتىپ, حالىقپەن تىكەلەي بايلانىستىرۋ ماقساتىندا ونىڭ قۇرامىنا ەل سەنىمىنە يە بولعان جەرگىلىكتى بەلسەندى ازاماتتاردى قوسۋ كەرەك دەپ ەسەپتەيمىز. اپات بولعان ايماقتاردىڭ تۇرعىندارىنا ۋاقىتشا نەسيەلىك كانيكۋل قاراستىرۋدى سۇرايمىز. سونىمەن قاتار باسپاناسىنان ايىرىلعان ازاماتتاردى وڭتايلى ورنالاستىرۋدى جەدەلدەتۋدى سۇرايمىز», دەدى دەپۋتات.
رينات زايتوۆ ۇكىمەتتەن وت پەن سۋدا تەمىردەي توزىمدىلىك تانىتىپ جاتقان حالىق سەنىمىنە سەلكەۋ تۇسىرمەۋدى, ولاردىڭ تالاپ-تىلەگىن ورىنداۋدى سۇرادى.
ء«توزىم مەن بىرلىكتىڭ ارقاسىندا ءبىز ءبارىمىز بۇرىنعى بيلىكتىڭ جاقتاستارى جاساعان قاستاندىقتى دا, مەملەكەت تۇتاستىعىن بۇزعىسى كەلەتىن سايقال ساياساتتارىن دا ىسكە اسىرۋعا جول بەرمەي كەلەمىز. بۇل – ۇلى ەرلىك! ەندىگى كەزەكتە ارسىز ارانداتۋدىڭ جەتەگىندە كەتپەي, جۇدىرىقتاي جۇمىلىپ, تاۋەلسىزدىكتى ساقتاۋ جولىندا مالىن دا, جانىن دا قۇربان ەتىپ جاتقان, حالىقتىڭ تالاپ-تىلەگى ءتيىستى دەڭگەيدە ورىندالادى دەگەن ۇمىتتەمىز», دەپ تۇيىندەدى رينات زايتوۆ.
