فوتو: saryarka-samaly.kz
وبلىستىق ءبىلىم باسقارماسى باسشىسىنىڭ ورىنباسارى ورىنتاي بيمانوۆانىڭ ايتۋىنا قاراعاندا, مۇنداي شەشىمگە وقۋ-اعارتۋ مينيسترلىگىنىڭ 10 ساۋىردەگى حاتتاماسى نەگىز بولعان.
«مينيسترلىكتىڭ حاتتاماسىندا سۋ تاسقىنى بولىپ جاتقان ايماقتارداعى وقۋشىلار ءبولىم بويىنشا جيىنتىق (بجب) جانە توقسان بويىنشا جيىنتىق باعالاۋدان (تجب) بوساتىلاتىنى ناقتى ايتىلعان. وسىعان بايلانىستى وقۋشىلار كۇندەلىكتى ونلاين ساباققا قاتىسىپ, ءار پاننەن تاپسىرما ورىنداۋ ارقىلى فورماتيۆتىك قالىپتاستىرۋشى باعاسىن الادى. قازىر وبلىس مەكتەپتەرىندە ءدارىس الىپ جۇرگەن 149 مىڭ وقۋشى بار. ولاردىڭ ءبارى بجب جانە تجب-دان بوساتىلدى», دەدى ورىنتاي بيمانوۆا.
ونىڭ ايتۋىنشا, اتىراۋ وبلىسىندا وقۋشىلارعا 9 مىڭعا جۋىق پەداگوگ ءدارىس بەرەدى. ولاردىڭ اراسىندا بىلىكتىلىك ساناتىن ارتتىرۋعا ارنالعان اتتەستاتسيادان وتەتىن مۇعالىمدەر بار.
«سۋ تاسقىنىنا بايلانىستى مۇعالىمدەردىڭ اتتەستاتسيادان ءوتۋ مەرزىمىنە وزگەرىس ەنگىزىلدى. بيىلعى اتتەستاتسيا تامىز ايىندا وتەدى», دەدى ورىنتاي بيمانوۆا.
