ۇلتتىق ۇلان كومەك كۇشىن ەسەلەدى

قازىر باتىس قازاقستان جانە اتىراۋ وبلىستارىندا سۋ باسۋ قاۋپى وتە جوعارى. اپاتتىڭ الدىن الۋ ءۇشىن ۇلاندىقتار سۋ باسقان اۋدانداردىڭ تۇرعىندارىن ەۆاكۋاتسيالاۋمەن بەلسەندى شۇعىلدانىپ, تۇرعىن الاپتاردا قۇم سا­لىنعان قاپتاردان بوگەت تۇرعىزىپ جاتىر. ماسەلەن, باتىس قازاقستان وبلىسىنىڭ ەلدى مەكەندەرىنەن تۇرعىنداردى ەۆاكۋاتسيا­لاۋ بارىسىندا ۇلتتىق ۇلاننىڭ 5517 اسكەري ءبولىمىنىڭ اسكەري قىزمەتشىسى ماۋلەن مارلەنوۆ سۋ ورتاسىندا قالعان ادامداردى دەر كەزىندە قۇتقاردى. ول سۋ تاسقىنىنىڭ ورتاسىندا تۇرىپ قالعان جۇك كولىگىنەن 30 ادامدى شىعارىپ, قاۋىپسىز اي­ماققا ەۆاكۋاتسيالادى.

ورال قالاسىنداعى ۇلتتىق ۇلاننىڭ جەر­گىلىكتى پولكىنە 300 ادامنان تۇراتىن شىم­كەنت جەدەل بريگاداسىنىڭ جەكە قۇرامى جانە قىزىلوردادان 200 سارباز كومەككە كەلدى. اتىراۋ وبلىسىندا دا سۋ تاسقىنى جاع­­دايى كۇردەلى بولىپ تۇر. اتىراۋ قالا­سىن­داعى 5546 اسكەري ءبولىمىنىڭ 120-دان اس­تام ساربازى پوليتسيا قىزمەتكەرلەرىمەن بىر­لەسىپ, قۇلسارى قالاسىنىڭ كوشەلەرىندە يەسىز ۇيلەردەگى دۇنيە-م ۇلىكتى توناۋعا جول بەرمەۋ بويىنشا قىزمەت اتقارىپ ءجۇر. سونداي-اق جەكە قۇرامنىڭ ءبىر بولىگى گۋ­مانيتارلىق جۇكتەردى تۇسىرۋگە, جاعالاۋدى نىعايتۋ جۇمىستارىنا تارتىلدى. ولارعا قاراعاندى قالاسىندا ورنالاسقان 5451 اس­كەري بولىمىنەن 500 جاۋىنگەر كومەككە كەلدى. اقتوبە مەن قوستانايدا سۋ تاسقىنىنا قارسى ءىس-شارالار مەن قوعامدىق ءتارتىپتى قورعاۋ ءۇشىن جەكە قۇرامدى تارتۋ جالعاسىپ جاتىر. جەرگىلىكتى 6655 جانە 6697 اسكەري بولىمدەرى وسى ماقساتتار ءۇشىن 400-دەن اسا اسكەري قىزمەتشى ءبولدى.

ەلىمىزدىڭ سولتۇستىك وڭىرىندە دە قاۋىپ سەيىلگەن جوق. پەتروپاۆلعا اسكەري اكا­دەميانىڭ 400 كۋرسانتىنا جانە جەرگىلىكتى ۇلتتىق ۇلان پولكىنىڭ 200 ساربازىنا استا­نالىق ساربازدار كومەككە كەلدى. سۋ تاسقىنى باستالعاننان بەرى ۇلتتىق ۇلاننىڭ 3 مىڭنان اسا جاۋىنگەرى, 145 اۆتوموبيل تەحنيكاسى جانە 7 اۋە ترانسپورتى ىسكە ارالاستى. 1 644 ادام ەۆاكۋاتسيالانىپ, ينەرتتى ماتەريالدارى بار 462 مىڭ قاپشىق دايىندالىپ, ءتيىستى جەرلەرگە توسەلدى جانە 110 توننا گۋمانيتارلىق كومەك جەتكىزىلدى.